კოდუების დედამ თავი გაკოტრებულად გამოაცხადა

7 აგვისტოს განჩინებით, სასამართლომ არ მიიღო აღნიშნული საქმეები წარმოებაში ერთადერთი მოტივით _ კომპანიებს არ გააჩდათ საპროცესო ხარჯების გადახდის საშუალება.

სასამართლომ მიუთითა, რომ ლაურა ღაჭავას სამკერვალო ფაბრიკა და სს „პირიმზე“ გაკოტრებულად გამოცხადდებიან ერთი თვის ვადაში რეგისტრაციის გაუქმების შემდეგ, თუ ამ პერიოდის განმავლობაში კრედიტორმა იმავე მოვალის მიმართ არ შეიტანა სასამართლოში გადახდისუუნარობის შესახებ განცხადება.

არადა, 10 აგვისტოს, comersant.ge ლაურა ღაჭავას ამბიციური გეგმის შესახებ ავრცელებდა ინფორმაციას. სამკერვალო ფაბრიკა, რომელიც თავს გაკოტრებულად აცხადებს, უახლოეს მომავალში საქსოვი მანქანების შეძენას და ქართულ ბაზარზე ყველა სახის ტანსაცმლის გატანას აპირებს.

„ღაჭავას ინფორმაციით, უკვე გააფორმეს 5 წლიანი კონტრაქტი ევროპულ ბრენდ „მონკლერთან“, რომელიც საქართველოში შეკერილ ქურთუკებს უცხოეთში 1200 ევროდ ყიდის. მიმდინარე წლის ნოემბერში, სამკერვალო სახლი კონტრაქტს კიდევ ერთ მსოფლიო ბრენდ ,,არმანისთან” გააფორმებს,” _ ნათქვამია რადიოს მიერ გავრცელებულ ნიუსში.

ლაურა ღაჭავას სამკერვალო ფაბრიკას 26 მაისის სამრეწველო გამოფენაზე ყველაზე დიდი პავილიონი ეკავა და ათასობით დამთვალიერებლის თვალში აყვავებულ სამამულო ბიზნესს განასახიერებდა.

ლაურა ღაჭავა „ქართუ ბანკის“ ის ერთ-ერთი მსხვილი კრედიტორია, რომელიც არ უარყოფს დავალიანებას და აცხადებს, რომ ვალს გადაიხიდს.

2011 წლის ბოლოს, აღსრულების ეროვნულმა ბიურომ, „ქართუ ბანკის“ კრედიტორ ოთხ ბიზნეს-ჯგუფს (14 იურიდიული და ფიზიკური პირი) 100 მლნ ლარის ღირებულების ქონება დაუყადაღა.

ერთ-ერთი მსხვილი ბიზნესჯგუფი, რომელიც „ქართუ ბანკის“ კრედიტორია და რომლის უძრავ-მოძრავი ქონება თბილისის სააღსრულებო ბიურომ 2011 წლის 30 ნოემბერს და 7 დეკემბერს დააყადაღა, ლაურა ღაჭავას ეკუთვნოდა.

კოდუების დედა, რამდენიმე კომპანიას ფლობს, მათ შორისაა შპს „კავკასიის უძრავი ქონების ჯგუფი“,რომელიც ორ ფირმას – შპს „საჩოგბურთო კლუბ დინამოსა“ (92%) და შპს „ბულიტებს“ (8%)– ეკუთვნის. ორივე ფირმის მესაკუთრე ლაურა ღაჭავაა.

ლაურა ღაჭავას ურთიერთობა „ქართუ ბანკთან“ 2010 წელს იწყება.

მის მიერ 2010 წლის 23 ივნისს დაფუძნებული შპს „კავკასიის უძრავი ქონების“ ჯგუფმა, დაფუძნებიდან 2 დღეში, „ქართუ ბანკისაგან“ 10 მილიონი დოლარი ისესხა, აღნიშნული ვალი უზრუნველყოფილი იქნა იპოთეკით.

2011 წლის 24 ნოემბერს (3 კვირაზე უფრო მოკლე დროში მას შემდეგ, რაც პირველად ძალაში შევიდა საგადასახადო ყადაღის კანონები) შპს „კავკასიის უძრავი ქონების ჯგუფის“ „ქართუ ბანკში“ დაგირავებული აქტივები გადაეცა სს „პირიმზეს,“ რომელიც ასევე ეკუთვნოდა ლაურა რაჭავას.

შპს „კავკასიის უძრავი ქონების“ ჯგუფსა და სს პირიმზეს შორის 2011 წლის 24 ნოემბრით დათარიღებული წილის ნასყიდობის ხელშეკრულების ღირებულება 12,853,978 ლარია.

„პირიმზის“ მიერ „ქართუ ბანკის“ აქტივების ყიდვის შემდეგ,შემოსავლების სამსახურმა მოულოდნელად აღმოაჩინა”, რომ სს „პირიმზეს“ 2005 წლიდან ჰქონდა საგადასახადო ვალდებულება 25 000 000 ლარის ოდენობით.

22 დეკემბერს სს „პირიმზე“ „ქართუ ბანკში“ დატვირთული აქტივებიანად ნატურის სახით გადაეცა სახელმწიფოს.

შემდგომში, „პირიმზე“ აუქციონზე გაიყიდა და როგორც ამბობენ, ის კოდუების სამეგობრომ შეიძინა.

ალბათ, შემთხვევითი არც ის არის, რომ ორივე ორგანიზაციამ _ ღაჭავას ფაბრიკამ და გასხვისებულმა „პირიმზემ“ ერთ დღეს წამოიწყო გაკოტრების პროცესი.

სხვათაშორის, ლაურა ღაჭავას საქმე იმ სარჩელშიც მოხვდა, რომელსაც იურიდიული კომპანია „სკადენი“ საერთაშორისო არბიტრაჟში ბიძინა ივანიშვილის სახელით შეიტანს.

აჩიკო კბილაშვილი რომელიც ივანიშვილის ინტერესებს უცხოელ კონსულტანტებთან ერთად დაიცავს, „ გურია ნისუთან“ საუბარში აცხადებს, რომ ახლად დაწყებული გაკოტრების საქმე, შესაძლოა, ამ კომპანიებისთვის ვალების ჩამოწერის მიზნით ხდება.

„გაკოტრების პროცედურა ისეთი რეჟიმია, რომ ითვალისწინებს ასევე რეაბილიტაციას და შეიძლება ასე ვთქვათ, ვალების ჩამოწერა მოხდეს ისე, რომ საწარმოო ერთეული გადარჩება და ვალები დაიკარგება.”

არჩილ კბილაშვილი ლაურა რაჭავას მიერ გაკოტრების პროცედურის დაწყებასა და მათ მიერ საერთაშორისო არბიტრაჟში სარჩელის აღძვრასთან კავშირს ვერ ხედავს.

„ამ ქალბატონის კომპანიების გაკოტრება ჩვენს მიერ წამოწყებულ საერთაშორისო არბიტრაჟთან კავშირში აშკარად არ არის, რადგან ის რა დარღვევაც მოხდა და რა ზიანიც დადგა, უკვე მომხდარი ფაქტია და მომავალში, მასზე გავლენას ეს პროცედურა ვერ მოახდენს.

ეს იყო ბანკისათვის ყველაზე მეტად უზრუნველყოფილი კრედიტი, რომელიც ხელოვნურად იქნა ჩამოშორებული ბანკისაგან. ივანიშვილისა და „ქართუ ბანკისათვის“ ეს უკვე დაკარგული აქტივია. ხვალ და ზეგ რა მოხდება, ეს მხოლოდ და მხოლოდ შეფასების საგნად გამოდგება. ის ფაქტი, რომ მოხდა ამ აქტივის ხელოვნურად ჩამოშორება და მერე გაკოტრების პროცედურაში გადატანა, შესაძლოა ზიანის დამტკიცებადობის კუთხით გამოდგეს, რომ ეს იყო გამიზნული პოლიტიკა, რომელიც დაიწყო, განვითარდა და საბოლოოდ, გაკოტრების შედეგად, გამოვიდა გასუფთავებული კომპანია, რომელიც ისევ იმ პირებს ეკუთვნით,”_ აცხადებს კბილაშვილი „გურია ნიუსთან“ საუბარში.

ქართუ ბანკში მიიჩნევენ, რომ ლაურა ღაჭავამ ბანკს 23 მილიონი დოლარის ზარალი მიაყენა. თუმცა, პირველ ეტაპზე, ბანკი მას მხოლოდ 7 მილიონის გადახდას სთხოვდა.

გაკოტრების პროცესის დასრულების შემდეგ, გამორიცხული არ არის, ლაურა ღაჭავამ ჩანაფიქრი განახორციელოს „პირიმზის“ ჩამორთმევამდე, ის შენობაში ჰოლანდიელ პარტნიორებთან ერთად, სავაჭრო ცენტრ „ევროპა პლაზას“ გახსნას გეგმავდა.