შეხვედრა საღამოს 6 საათზე დაიწყო. "გურია ნიუსი" დაახლოებით 3 საათის განმავლობაში ადევნებდა თვალყურს საჯარო მოხელეების "საოჯახო შეხვედრების" ახალ ტენდენციას. აღსანიშნავია, რომ მსგავსი ტიპის შეხვედრა სოფელ შემოქმედში რამდენიმე დღის წინაც დაფიქსირდა, თუმცა, მაშინ "გურია ნიუსთან" ეს ინფორმაცია სოფლის რწმუნებულმა ბესიკ ლომინაძემ უარყო.
15 აგვისტოს, ააიპ სოფლის განვითარების ცენტრში დასაქმებული ბიძინა ქარჩავას ოჯახში საღამოს დიდი "ნაციონალური" შეკრება, "საპურმარილო" სუფრით 6 საათზე დაიწყო.
შეკრებილთა შორის "გურია ნიუსმა" დააფიქსირა სოფელ შემოქმედის რწმუნებული ბესიკ ლომინაძე, ოზურგეთის მუნიციპალიტეტის საკრებულოს თავმჯდომარე ალეკო მამეშვილი, რამდენიმე საჯარო მოხელე მუნიციპალიტეტის გამგეობიდან. ასევე გურიის სამხარეო ადმინისტრაციის თანამშრომელი ანი ჩუბინიძე და "ნაციონალური მოძრაობის" აქტივისტები, მხარდამჭერები და საარჩევნო კომისიის წევრები. შეხვედრაზე იმყოფებოდა შპს "საქართველოს ფოსტის" აჭარა-გურიის სამმართველოს ოზურგეთის ქვეგანყოფილების ხელმძღვანელი გია მამაკაიშვილი, რომელმაც "გურია ნიუსს" განუცხადა, რომ ის სუფრაზე იყო მიპატიჟებული.
"გურია ნიუსის" ინფორმაციით, შეხვედრა მომავალ საარჩევნო გეგმებს უკავშირდებოდა. ეს ჩვენთან საუბარშიც დაადასტურა ერთ ერთმა აქტივისტმა და საარჩევნო კომისიის წევრმა თამარ აბაშმაძემ. მისი თქმით, ის არის საარჩევნო კომისიის წევრი ნაციონალებიდან და არაფერი აქვს დასამალი: "მე ნაციონალი ვარ თავიდან ბოლომდე. მაგენს ვენაცვალე. იქ ვარ, სადაც ნაციონალები არიან. მაგია ჩემი გული და სული და მთელი ცხოვრება", _ გაგვიცხადა მან.
"რატომ ვარ მოსული და მთავრობას ვემსახურები და იმიტომ", _ გვითხრა ერთერთმა აქტივისტმა.
თუმცა, რამდენიმე სტუმარი ამბობდა, რომ ოჯახში იყო სუფრა, სადაც, უბრალოდ, მიპატიჟებულები იყვნენ. "გურია ნიუსის" მოკრძალებულ თხოვნაზე _ რატომ იყო გასაიდუმლოებული ეს შეხვედრა და სუფრა, და თუ არ იყო, ჩვენც ხომ არ მიგვიწვევდნენ, თუნდაც ერთი ჭიქა წყლის დასალევად, პასუხი სამი საათის განმავლობაში არავის გაუცია და არც წყალი მოუწოდებია…
აღსანიშნავია, რომ ოჯახის უფროსთან ბიძინა ქარჩავასთან დაკავშირება ვერანაირად ვერ მოვახერხეთ _ ის ჭიშკართან არც კი მოვიდა და ტელეფონი გათიშა.
"გურია ნიუსი" დაუკავშირდა ოზურგეთის მუნიციპალიტეტის სოფელ შრომის რწმუნებულს ბესიკ ლომინაძეს, რომელმაც ასე გვიპასუხა: _ სუფრაზე ვარ თამადა, როგორ გიპასუხოთ? _ და ტელეფონი გაგვითიშა.
სამსაათიანი შეხვედრის დასრულების შემდეგ ოზუგეთის მუნიციპალიტეტის საკრებულოს თავმჯდომარემ "გურია ნიუსთან" შეხვედრის დეტალებზე კომენტარი არ გააკეთა: "კარგად იყავით," _ ამ სიტყვებით დაგვტოვა მამეშვილმა.
