_ გუშინ მაესტროზე გასულ გადაცემა “პოლიტმეტრში” მოწვულმა სტუმარმა ლუბა ელიაშვილმა ისაუბრა კონკრეტულ შემთხვევაზე, რომელიც ლანჩხუთში მოხდა და შემდგომ ზოგადად მიმოიხილა პრობლემატიკა, თუ რატომ ხდება მსგავსი არასასიამოვნო ფაქტები. ქ. ლუბა, პასუხი ძალიან მარტივია _ წინა საარჩევნოდ შექმნილ სახელდახელო საინფორმაციო სააგენტოსა და ნაუცბათევად წამოჩიტულ “ჟურნალისტებისგან”, მგონი, უკეთესს არ უნდა ელოდეთ. ისინი საკუთარ თავს რომ იგდებენ უხერხულ მდგომარეობაში, ეს არახალია, ხოლო მათ არაპროფესიონალიზმს, უტაქტობასა და გადაჭარბებულ აქტიურობას ხშირად რესპონდენტებიც გამოჰყავს მდგომარეობიდან, მით უმეტეს, თუ რესპონდენტი ჩვეულებრივი მოქალაქეა და სულაც არ მოეთხოვება ანგარიში ჩააბაროს თქვენს “ჟურნალისტს”, თუ სად ან რატომ მიდის მეუღლესთან ერთად. სკანდალური მასალის მოძიებას, ქ. ლუბა, გამოცდილება და პროფესიონალიზმი სჭირდება, ამისთვის ადამიანები ძალიან დიდ და გზას გადიან და ზოგიერთი ისე ამთავრებს ჟურნალისტურ კარიერას, მიზანს ვერ აღწევს. ბევრი რომ არ გავაგრძელო, ერთ რიტორიკულ შეკითხვას დავსვამ _ დამთავრდება წინასაარჩევნო კამპანია, გადაივლის პოლიტიკური ვნებათა ღელვა ქვეყანაში, ყველაფერი თავის “კალაპოტს” იპოვის, შეუწყდება შავი ფინანსები შავი ჟურნალისტური თუ სხვა აქტივობებისთვის და მერე სად მიდიან ამდენი უფუნქციო ადამიანები? თუ ვინმე იმის იმედადაა, რომ ან ეს ყველაფერი გაგრძელდება ან ვიღაც წავა და ყველას ყველაფერი დაუფასდება? _ ამბობს ასკურავა.
ამ თემაზე უფრო კონკრეტული მოსაზრებების გასაგებად “გურია ნიუსი” ლანჩხუთის მუნიციპალიტეტის გამგებლის მოადგილეს კახა ასკურავას დაუკავშირდა.
_ ბატონო კახა, სანამ ლუბა ელიაშვილი გიპასუხებთ, მანამდე ჩვენ გვაქვს შეკითხვები. თქვენი ეს სტატუსი და ჟურნალისტების ლანძღვა პროფესიონალიზმს ნიშნავს?
_ არა. რა თქმა უნდა, არა. სადაა გალანძღული ჟურნალისტი, მითხარით.
_ ჟურნალისტები ბრჭყალებში, არაპროფესიონალიზმზე მითითება… რომელი ერთი ჩამოვთვალო…
_ ზოგადად არაპროფესიონალიზმზე ვსაუბრობ. რაც დღეს ხდება.
_ ხელისუფლებში პროფესიონალები მუშაობენ? თქვენ პროფესიონალი ხართ, როცა მიგაჩნიათ, რომ ბევრი ჟურნალისტი არჩევნების შემდეგ უფუნქციოდ დარჩება?
_ მერე ესე იმას კი არ ნიშნავს, რომ ყველა ერთ ქვაბშია ჩაყრილი. აბა, თქვენ როგორ ფიქრობ, ისინი ამ პროფესიას გააგრძელებენ? ჩვენ ორივე ვნახავთ, რომ არა.
_ თქვენი და თქვენი ხელისუფლების ფუნქცია უხვი დაპირებებია, განსხვავებით ჟურნალისტებისგან, რომლებიც შეიძლება, თქვენ არაპროფესიონალებად მიგაჩნიათ, მაგრამ ისინი თავიანთ საქმეს აკეთებენ, სვამენ კითხვებს და ცდილობენ პასუხები მიიღონ…
_ რაზე მედავებით ახლა? მოგწონთ, რაც დღეს ხდება?
_ ნამდვილად არ მოგვწონს და იმიტომაც ვსაუბრობთ ამ პრობლემებზე ღიად. რაც შეეხება პროფესიის გაგრძელებას, შესაძლოა თქვენს მსგავსად, ყველამ ვერ გამოიცვალოს ადგილი და ერთი ბანაკიდან მეორეში ვერ გადაბარგდეს.
_ მე სულ ერთი ბანაკი მქონდა და ეს ჩემის ქვეყნის უკეთესი მომავალია.
_ გააჩნია, ბანაკში რას გულისხმობთ. თუმცა, არც ერთი ბანაკი არ გაძლევთ იმის უფლებას, რომ ადამიანებს დასცინოთ და შეურაცხყოფა მიაყენოთ. ასე არ ფიქრობთ?
_ ტყუილია ის, რომ მე ვინმეს დავცინი. პირიქით კია.
_ ანუ?
_ ანუ ის, რომ ზოგჯერ ზედმეტი გამოგვდის და ვაჭარბებთ. მე რომ ჩინოვნიკი ვარ, არ მაქვს ყველაფრის უფლება და თქვენ რომ ჟურნალისტი ხართ, არც თქვენ. ყველაფერს მისი ჩარჩო აქვს _ მოქმედების და კანონის. მორალურზე აღარ ვსაუბრობ.
_ ეს თუ იცით, რატომ აყენებ შეურაცხყოფას ადამიანებს და უფუნქციოებს რატომ უწოდებთ?
_ მე ზოგად უფუნქციობაზე არ ვსაუბრობ. აბა, ვინც დღეს მიკროფონით დარბის, ყველა საკუთარ ადგილს იპოვის ჟურნალისტიკაში თუ რას მეუბნებით ახლა?
_ მაგის ფიქრი გაძლევს იმის საბაბს, რომ ადამიანები შეურაცხყოთ?
_ ვის მივაყენე შეურაცხყოფა? ვერ გაგიგიათ თქვენ.
_ როცა ადამიანებს, რომლებიც მედიაში მუშაობენ, ჟურნალისტებად არ აღიქვამთ და ასკვნით, რომ ისინი ერთ თვეში უფუნქციოები იქნებიან, შეურაცხყოფა არ არის?
_ დღეს ყველა წერს და ყველა ჟურნალისტობას იჩემებს. თუმცა, კიდევ ერთხელ ვამბობ, რომ აქ, კონკრეტული პერსონები ყველაზე უდანაშაულოები არიან.
ასე ფიქრობს ხელისუფლების წარმომადგენელი, რომელიც ჯერ “ნაციონალურ მოძრაობას” უჭერდა მხარს, შემდეგ ოპოზიციაში გადავიდა, თუმცა, მოგვიანებით მმართველ გუნდს საკმაოდ მაღალი თანამდებობით დაუბრუნდა _ იყო გუბერნატორის მოადგილე, შემდეგ ოზურგეთის საავადმყოფოს დირექტორი, ახლა კი ლანჩხუთის მუნიციპალიტეტის გამგებლის მოადგილეა. ამბობენ, რომ არჩევნებში “ნაციონალების” კანდიდატის გამარჯვების შემთხვევაში, კახა ასკურავა გამგებელი გახდება. თუმცა, მანამდე გასაკეთებელი ჯერ კიდევ ბევრია _ ასკურავამ ხელისუფლებამ ერთგულება კიდევ ბევრჯერ უნდა დაუმტკიცოს.
