გავრცელებული ინფორმაციით, მოსახლეობასთან შეხვედრამდე, პრეზიდენტმა პირველ ლედისთან სანდრა რულოვსთან ერთად მენაღარიშვილების ოჯახს სამედიცინო პოლისები გადასცა. შუხუთში პრეზიდენტს დღის 5 საათისთვის ელოდნენ. ამ დროისთვის იქ უკვე საკმაოდ ბევრ ადამიანს მოეყარა თავი. რა თქმა უნდა, ბევრი იყო არაშუხუთელი და საჯარო სამსახურებში დასაქმებულები, თუმცა ადგილობრივებიც მრავლად იყვნენ და უნდა ითქვას, რომ პრეზიდენტს შუხუთში თბილი შეხვედრა მოუწყვეს.
ჯერ ტრიბუნასთან სანდრა რულოვსი მივიდა. საღამოს 6 საათისთვის შუხუთის სკოლის ეზოში ჯერ დაცვის ვერტმფრენი დაჯდა, შემდეგ კი პრეზიდენტიც ჩამოფრინდა. მიხეილ სააკაშვილის გამოჩენამ პირველი ლედის სიტყვა შეაწყვეტინა _ წინა შუხუთური ვიზიტისგან (წელს ლელობურთს დაესწრო პრეზიდენტი შუხუთში) განსხვავებით, პრეზიდენტს “მიშა-მიშას” შეძახილებით შეეგებნენ. “ვიღებთ წერილებს, შეიქმნა კლუბები ლანჩხუთში, ოზურგეთში, რომელსაც “გამარჯვებული ქალები” ქვია. ვეხმარები ასეთ დაავადებულ ქალებს,” _ ამის თქმა მოასწრო სანდრა რულოვსმა.
ამის შემდეგ შეკრებილებს ქვეყნის პირველმა პირმა მიმართა. მისი განცხადებით, მთავრობის შემდეგი გაჩერება რეგიონების აღორძინების კუთხით, გურიაა: “ჩვენ ბევრი გავაკეთეთ თბილისში და გვსაყვედურობდნენ, რომ მხოლოდ თბილისი არ არის საქართველო, როცა თბილისში დავიწყეთ რაღაცეების კეთება, ამბობდნენ, რომ ყველაფერი კეთდება თბილისში და სხვაგან არაფერი არ კეთდება. მერე დავიწყეთ ბათუმში კეთება და ბათუმი ახლა მსოფლიო სასწაულია. მერე ქუთაისელები მეუბნებოდნენ, რას დაფრინავ აქეთ-იქით და ხელსაც არ გვიქნევ, დადიხარ ბათუმი-თბილისი, ბათუმი-თბილისი, სულ ფეხებზე გკიდია ქუთაისი. მერე ქუთაისში დავიწყეთ ძალიან მაგარი რაღაცეების კეთება. ამასობაში, კახელები გაბრაზდნენ, კახეთი მიტოვებულიაო და ახლა თელავი ყველაზე კარგად კეთდება. მე თქვენ გპირდებით, რომ ჩემი შემდეგი გაჩერება გურიაა და განსაკუთრებით _ ლანჩხუთი. მე კარგად ვიცი, რომ ძალიან გიჭირთ. ლანჩხუთი ჩვენგან მეტ ყურადღებას იმსახურებს და ამას გავაკეთებთ კიდევ. მე აქედან ვერ მომიშორებთ, ისე ხშირად ჩამოვალ და განსაკუთრებით ვავალებ აქაურობის მიხედვას რამაზ ნიკოლაიშვილს. მე არ დაგპირდებით იმას, რასაც ვერ გავაკეთებ. ზოგი მსაყვედურობს, აი, იმდენ ოჯახში დადიხარ და ჩემთან არ მოსულხარო. ყველასთან ვერასდროს ვერ მოვახერხებ მისვლას, მაგრამ გარწმუნებთ, ყველას პრობლემა ჩემი სატკივარია”, _ განაცხადა მან.
პრეზიდენტი შეეხო ლანჩხუთში მიმდინარე პროექტებს და მოსახლეობას დაპირება მისცა, რომ სოფლებში კიდევ უფრო მეტი გზა იქნება კეთილმოწყობილი: “ლანჩხუთის მუნიციპალიტეტში ბევრი ინფრასტრუქტურული პროექტი მიმდინარეობს, რაც იმას ნიშნავს, რომ საქართველოს სხვა ქალაქების მსგავსად, ლანჩხუთი ვითარდება და ლამაზდება. მოგვარებულია გზების, ბუნებრივი აირის და ელექტროენერგიის პრობლემა. ლანჩხუთს ევროპული დონის ულამაზესი სტადიონი დაამშვენებს, რაც ძალიან მნიშვნელოვანი იქნება ადგილობრივი ფეხბურთელებისათვის,” _ განაცხადა პრეზიდენტმა.
“მინდა მადლობა ვუთხრა თქვენს გუბერნატორს, რამაზს, ჩემს სანდრას, რომელიც ჩემს პარალელურად დადის და ახლა ყველანი მივდივართ ბახმაროში, რომ ვნახოთ ბახმარო როგორ გაკეთდება ბოლო ხანებში. პირველ რიგში, მინდა მოგესალმოთ. ძალიან მაგარი ხალხი ცხოვრობს ლანჩხუთში და რა თქმა უნდა გურიაში, ბებია მყავს ლანჩხუთელი და ჩემშიც არის გურული მოუთმენლობა”, _ განაცხადა მიხეილ სააკაშვილმა.
მისივე თქმით, ყველაზე ნაკლები ყურადღება რეგიონებში სამცხე-ჯავახეთს და გურიას ექცეოდა: “ძალიან მეშინია 1 სექტემბრის და მეშინია იმიტომ, რომ არც ერთ ქვეყანაში ერთბაშად დაზღვეულთა რაოდენობა არ გაზრდილა ისე, როგორც ეს არის საქართველოში. 25 000 ადამიანი იყო საქართველოში დაზღვეული, ძირითადად მთავრობის წევრები, ახლა 1 სექტემბრის შემდეგ 2 500 000 იქნება, ასჯერ გაიზარდა დაზღვეულთა რაოდენობა და კიდევ გაიზრდება, ყველა ადამიანი იქნება დაზღვეული,” _ აღნიშნა ლანჩხუთში სტუმრობისას მიხეილ სააკაშვილმა.
დაახლოებით ერთ საათში პრეზიდენტი უკვე ჩიბათის მოსახლეობას შეხვდა. მან ჩიბათშიც ხაზი გაუსვა გაკეთებულ თუ მიმდინარე სამუშაოებს, გურულების გამჭრიახობასა და პოლიტიკურ ალღოს: “მე კარგად ვიცი, გურულებს ისევ გიჭირთ ეკონომიკურად, თუმცა, გამჭრიახი ხალხი ხართ. თქვენს გვერდით მიგულეთ. თქვენ ის ხალხი ხართ, ვინც კარგად ერკვევით ყველაფერში და გაკეთებულსაც აფასებთ და შესაძლებლობებსაც. ტელევიზორში ვისმენ საშინელებებს, გამოდიან ადამიანები და ხატავენ ისეთ სურათს, რომ გული გეტკინება, გვაბრალებენ, თითქოს ომი ჩვენ დავიწყეთ და ა. შ. ათას სისულელეებს. თუმცა, აქ რომ მოვედი, კიდევ ერთხელ დავრწმუნდი, რომ ისინი არ არიან საქართველოს სახე, ქვეყნის სახე ხართ თქვენ!”
ბევრი ელოდა, რომ გუშინ პრეზიდენტი სახელისუფლო კანდიდატს დაასახელებდა, მაგრამ ასე არ მოხდა, თუმცა, რამაზ ნიკოლაიშვილზე გაკეთებული განცხადებებით, მიანიშნა, რომ გურიას გავლენიან მინისტრს ანდობს, რაც იმას ნიშნავს, რომ მმართველი გუნდი აქცენტს მოქმედ გამგებელ გიორგი გოგუაძეზე გააკეთებს.
“ამ არჩევნებზე გვაქვს რამდენიმე ამოცანა: პირველი, ის, რომ კურსი გაგრძელდეს და ამ კურსის გამტარებლებმა აიღოს საკმარისი ხმა ამისათვის და მეორე: ჩვენმა მტერმა ადგილობრივი, მის ფეხს აყოლილების მეშვეობით, ვერაფერი ვერ აგვირიოს საქართველოში. მე მინახავს ბევრი ადამიანი, რომელსაც რაც არ უნდა გაუკეთო, მაინც არ დაინახავს და არ დააფასებს. მაგრამ მე მინახავს ადამიანი, რომელსაც შეიძლება ბევრი არ გაუკეთო, მაგრამ ის მაინც ხედავს ქვეყნის პროგრესს და პერსპექტივას,” _ თქვა პრეზიდენტმა.
