ის დაინტერესდა თუ რომელ მედიასაშუალებას წარმოვადგენდი და მითხრა, რომ პრეზიდენტის პრესსამსახურის გარეშე არ შემეძლო პრეზიდენტის ვიზიტის გადაღება. სადაც სხვა მედიის წარმომადგენლები არიან, იქ წადიო. მან ჩემი ხელით გადამაშლევინა ვიდეო და ფოტო კადრები, _ ეს ფაქტი საქართველოს პრეზიდენტის მიხეილ სააკაშვილის ვიზიტის დროს, გუშინ ლანჩხუთში მოხდა.
“გურია ნიუსის” ლანჩხუთის ბიუროს თანამშრომელს, ნოდარ მინაძეს ის კადრები წაუშალეს, სადაც დაფიქსირებული იყო, როგორ ჩამოჰყავდათ ხალხი ყვითელი ავტობუსებით სხვადასხვა სოფლებიდან.
“გურია ნიუსი” მომხდართან დაკავშირებით, ( შეგახსენებთ, რომ ეს პირველი შემთხვევა არ არის) საქართველის პრეზიდენტის ადმინისტრაციის პრესამსახურის უფროსს, ნათია ბანძელაძეს დაუკავშირდა. მან პირველ დარეკვაზე გვითხრა, რომ ცოტა ხანში გადაგვერეკა მისთვის. შემდეგ თავად დაგვიკავშირდა და რაც შუხუთში მოხდა, მოკლედ ავუხსენით.
_ არ მსმენია ამის შესახებ, იქ ვარ 2 საათიდან და რატომ არ დამირეკეთ, თუ პრობლემა გქონდათ?
_ გირეკავდით, მაგრამ, მითხარით, 2 წუთში დამირეკეთო, შემდეგ არ აიღეთ ყურმილი, ცოტა ხნის შემდეგ გვიპასუხეთ და გვითხარით, რომ 30 წუთში დამიკავშირდებოდით, რის შემდეგ დამიკავშირდით და იკითხეთ რა ხდებოდა.
_ იქ ვიდექი და ჩემთან მოსვლას რა უნდოდა? ერთი წუთით მომისმინეთ, ვიღაცამ სამოქალაქო ჩაცმულმა გაიყვანა, წაშალა, მე რა შუაში ვარ? რატომ მირეკავთ?
_ იმიტომ, რომ თქვენ გვერდით იდგა ის ადამიანი.
_ ჩემს გვერდით ძალიან ბევრი ადამიანი დგას, რა. ზოგი სურათის გადაღებასაც მთხოვს ჩემს გვერდით, რომ მოდის. ძალიან ბევრი ადამიანი მოდის. მე არავისთვის დამივალებია, ვინმეს საქმე გაუფუჭეო. დამირეკე, გითხარით საქმეს ვაკეთებ და დაგირეკავ-თქო.
_ იმასთან დაკავშირებით რას იტყვით, რომ პრეზიდენტის ვიზიტის დროს მუდმივად გვეშლება ხელი მუშაობაში. აკრძალული იყო თუ არა შუხუთის საჯარო სკოლის მიმდიბარე ტერიტორიაზე სურათების გადაღება?
_ არსებობდა პერიმეტრი ჟურნალისტებისთვის, საიდანაც ნებისმიერს შეეძლო გადაეღო. მე დავინახე რამდენიმე კამერა, რომელიც იღებდა და არავისთვის ხელი არ შეუშლიათ. თქვენ თუ ვინმე სამოქალაქო პირმა ხელი შეგიშალათ, ამ შემთხვევაში, პრესამსახური არაფერ შუაში არ არის და არასწორად მირეკავთ. კარგად იყავით. რამე თუ გაგიჭირდათ, დაგეხმარები, არასოდეს პრობლემა არ არის.
_ იმ ფაქტს როგორ აფასებთ, როდესაც ჟურნალისტს……
_ (მაწყვეტინებს სიტყვას. ავტ) რა ფაქტს, ვერ გავიგე, ვიღაცა მოვიდა და წაგიშალა, მე რა შუაში ვარ? დამისახელეთ მაშინ სახელი და გვარი. ვიღაცა მოვიდა და წააშლევინაო მეუბნებით, რა გიპასუხოთ? ლოგიკა გააქ?
_ თუ შეიძლება, შეურაცხყოფაზე ნუ გადადიხართ.
_ მე გადავდივარ კაცო, შეურაცხყოფაზე?
_ პრეზიდენტის პრესსამსახურს გიკავშირდებით და რაც პრეზიდენტის ვიზიტის დროს რაც მოხდა, გეუბნებით.
_ ჩემი მითითებით არავის, არავისთვის, არაფერი წაუშლია, ეს არის ჩემი კომენტარი. პრესამსახურის მითითებით, დღეს არავისთვის ხელი არ შეუშლიათ მუშაობაში, ეს არის პრესამსახურის ოფიციალური კომენტარი.
იმ შემთხვევაში, თუ თქვენ ვიღაც სამოქალაქო პირი რაღაცას გაშლევინებს, არასწორად მიმართავთ პრეზიდენტის ადმინისტრაციის პრესსამსახურს, ეს არის ჩემი პასუხი, შენს შეკითხვაზე.
_ მაშინ, ვის უნდა მივმართოთ?
_ მე უნდა მომმართოთ (?!) თუ ჩემს კომენტარს დაწერთ, დაწერთ ამას! თუ არა, მაშინ საერთოდ ვერ ვითანამშრომლებთ. მე არავისთან მაქვს პრობლემა. “გურია ნიუსზე” დაიწერა ჩემზე 1500 ინფორმაცია, ყოველთვის ვპასუხობ თქვენს გოგონას, რომელიც აქ არის. დღეს იდგა სამი კამერა და არავის შექმნია პრობლემა, იმიტომ, რომ პერიმეტრის იქეთ იყვნენ. დამირეკეთ, გიპასუხეთ, რა გავაკეთო მეტი? მუშაობის დროს, შეიძლება ვერ გიპასუხოთ. სამოქალაქო პირი გაშლევინებს ფოტოებს და გეუბნება, გვერდზე გამომყევიო, არალოგიკურია უბრალოდ, მე დამირეკო და მკითხო ეს ამბავი.
_ ზუსტად მსგავსი ფაქტი მოხდა ოზურგეთში, როდესაც პრეზიდენტის ვიზიტის დროს, ფოტოები გადაგვიშალეს.
_ დამისახელეთ მაშინ ის ადამიანი, ვინც იყო, სახელი და გვარი. თუ ჩემი დავალებით მოქმედებდა, მე ვაგებ პასუხს, რანაირად აგიხსნა გამაგებინე.
ამ საუბრის დასასრულების შემდეგ, ნათია ბანძელაძე, რამდენიმე წუთში დაგვიკავშირდა:
_ ახლა გადავამოწმე ეს ინფორმაცია, ოპერატიულთან და მსგავსი არაფერი მომხდარა, საერთოდ უმისამართოდ რეკავთ ჩემთან. ასე რომ, არ ვიცი, რაღაცა სხვასთან გაქვთ საქმე და გაარკვიეთ, რა.
