ქართველი მოჭიდავე ლონდონის ოლიმპიადის შედეგებს აპროტესტებს. ინგლისში მცხოვრები მეგობრების დახმარებით ის ლონდონში დაბრუნდა, შეჯიბრის ვიდეოკადრები ჩაიტანა და სამართლებრივი ბრძოლა დაიწყო.
„ვინც ჩემი შეჯიბრის კადრები ნახა, ყველამ მითხრა რომ მოგებული მქონდა, იმ შეხვედრის დროს ორჯერ მოვუგე მოწინააღმდეგეს, მაგრამ ბრძოლა მაინც სხვის სასარგებლოდ გადაწყდა,“-აცხადებს შუკვანი.
სპორტსმენი დარწმუნებულია, რომ სიმართლეს დაამტკიცებს. გარდა ამისა, მას სურს მოიპოვოს ის ვიდეო კადრები, სადაც გია უდესიანის სასტუმროში და სპორტსმენის ოთახში შეჭრაა ასახული.
„ოლიმპიურ სოფელში, ყველა ნაბიჯზე იყო კამერები და სავარაუდოდ, უნდა არსებობდეს იმის ამსახველი კადრები, როგორ შემოიჭრა უდესიანი ჯერ სასტუმროში, შემდეგ ჩემს ნომერში და მეძებდა გამწარებული. ამ კადრების მოთხოვნით ჩემმა მეგობრებმა უკვე მიმართეს ოლიმპიურ სოფელს,“ _ აცხადებს სპორტსმენი „გურია ნიუსთან“ საუბარში.
შეუკვანის თქმით, ქართული ოცნების ოფისში გაკეთებული განცხადების შემდეგ, მის ოჯახში უცნობი ადამიანები რეკავდნენ და მის მშობლებს შვილის ფეხებით ჩამოკიდებით ემუქრებოდნენ.
„ლონდონიდან ჩამოსვლის მერე აღარ დაურეკავთ, რაც არ უნდა მოიმოქმედონ და როგორც არ უნდა დამემუქრონ, ჩემს სიმართლეს მაინც დავამტკიცებ, მით უმეტეს ჩემი კოლეგებიც მხარში მიდგანან, რა თქმა უნდა, ზაზა კედელაშვილის გარდა, რომელიც აღარც კი მესალმება.“
„გავდივარ იურიდიულ კონსულტაციებს და ვაპირებ საერთაშორისო სასამართლოს მივმართო. მე ბოლომდე ვიბრძოლებ სიმართლისთვის, გამოვააშკარავებ იმ მძიმე რეალობას, რაც დღეს ქართულ სპორტში არსებობს და ქართულ საზოგადოებას
დროულად შევატყობინებ პროცესის მსველობის შესახებ,”-ეს განცხადება შეუკვანმა ლონდონში ჩასვლისთანავე გააკეთა.
გუშინ გავლენიანი ბრიტანული გამოცემა ”ტელეგრაფი” ბეთქილ შუკვანის თემას შეეხო.
”სპორტსმენი აცხადებს, რომ ის იძულებული გახდა გადამხტარიყო მეორე სართულის აივნიდან რადგან თავი დაეღწია თავისი ქვეყნის ოფიაციალური დელეგაციის „სახიფათო“ ჯგუფისაგან, რომელიც მის მის საძებნელად მივიდა მისი დამარცხების შემდეგ. შუკვანმა კონსულტაცია გაიარა იურიდიულ ფირმა Mishcon de Reya და ცდილობს ოლიმპიური კომიტეტი დაარწმუნოს რომ გამოიძიოს მომხდარი,”-წერს ტელეგრაფი. გამოცემა აღნიშნავს რომ ეს იურიდიული ფირმა თავის დროზე მომსახურებას უწევდა დიანას უელსის პრინცესას,რომელსაც განქორწინების პროცესი ჰქონდა უელსის პრინცთან.
