პრემიებში მოცურავე ხელისუფლება

როგორც ოფიციალური დოკუმენტებიდან ირკვევა, ჩოხატაურის მუნიციპალიტეტის საკრებულოს თანამშრომლებს, 2010 წელს, პრემიის სახით ერთი თეთრიც არ მიუღიათ. წერილს, რომელშიც ეს ინფორმაციაა აღნიშნული, ხელს ამავე საკრებულოს თავმჯდომარე ანტონ ხუნდაძე აწერს.
სამაგიეროდ, პრემიები მიიღეს ოზურგეთის მუნიციპალიტეტის საკრებულოს თანამშრომლებმა _ 2010 წლის 17 ივნისიდან, ანუ ახალარჩეული საკრებულოს უფლებამოსილების ცნობის დღიდან, ამავე წლის 31 დეკემბრის ჩათვლით, ოზურგეთის მუნიციპალიტეტის საკრებულოში მომუშავე საჯარო მოხელეებზე, პრემიის სახით, ბიუჯეტიდან 22 740 ლარი გაიცა.(!!!)
რაც შეეხება ჩოხატაურის მუნიციპალიტეტის გამგეობის თანამშრომლების 2010 წლის ბიუჯეტიდან გაცემულ საპრემიო თანხებს, ისიც საკმაოდ სოლიდურია და 35 649 ლარს შეადგენს.
“2010 წლის 1 იანვრიდან 2010 წლის 31 დეკემბრის ჩათვლით, ჩოხატაურის მუნიციპალიტეტის გამგეობის თანამშრომლებზე, პრემიის სახით, გაცემულია 35 649 ლარი. თითოეულ თანამშრომელზე გაცემულია ერთი თვის თანამდებობრივი სარგო, დამტკიცებული განაკვეთიდან გამომდინარე, ნამუშევარი პერიოდის მიხედვით”, _ ოფიციალურ წერილს ხელს ჩოხატაურის მუნიციპალიტეტის გამგებელი გია გიორგაძე აწერს.
წერილს თან ბრძანება ახლავს, რომელიც ყოფილმა გამგებელმა მამუკა დოლიძემ 2010 წლის 4 იანვარს გამოსცა. ბრძანების თანახმად, პრემია სულ 75 საჯარო მოხელემ მიიღო; ყოფილმა გამგებელმა მამუკა დოლიძემ _ 2 480 ლარი; გამგებლის პირველმა მოადგილემ, ამჟამად გამგებელმა გია გიორგაძემ _ 1 100 ლარი; გამგებლის მოადგილემ დიმიტრი კორიფაძემ _ 900 ლარი; საქმის წარმოებისა და საორგანიზაციო საკითხთა სამსახურის უფროსმა ვარდო სიხარულიძემ  _ 700 ლარი; ამავე სამსახურის ექვსმა სპეციალისტმა _ ნინო ვაჩეიშვილმა, ლიუდმილა მეგრელიშვილმა, თამთა ჯანხოთელმა, ვასილ ბერუჩაშვილმა, მანანა კალანდაძემ და ლია ხუნდაძემ  420-420 ლარი მიიღეს; სპეციალისტმა თემურ ლორიამ კი 546 ლარი; რატომღაც სპეციალისტს ქეთევან ტრაპაიძეს 300 ლარი ერგო, გამგებლის თანაშემწეს დავით ჯინჭარაძეს კი _ 450 ლარი; ეკონომიკისა და ინფრასტრუქტურის განვითარების სამსახურის უფროსმა გელა ლომინეიშვილმა 700 ლარი მიიღო; აღნიშნული სამსახურის ოთხ სპეციალისტს _ გოგი ბოლქვაძეს, ნინო სიხარულიძეს, ალექსანდრე წიქარიძეს და თენგიზ ცენტერაძეს 420-420 ლარი ერგოთ; სპეციალისტ ჯონი კუტუბიძეს 300 ლარი გადასცეს; მუნიციპალური ქონების მართვის სამსახურის უფროსს მალხაზ დოლიძეს 700 ლარი ერგო; ამავე სამსახურის სპეციალისტებს გიორგი სიმონიას და ლელა მდინარაძეს _ 420-420 ლარი; საფინანსო სამსახურის უფროსმა ზურაბ ჩანტლაძემ 700 ლარი მიიღო; ბიუჯეტის დაგეგმვის და ანალიზის განყოფილების უფროსმა ჯემალ სიხარულიძემ და ბუღალტრული აღრიცხვა-ანგარიშგების განყოფილების უფროსმა ზურაბ შათირიშვილმა _ 500-500 ლარი; ამავე სამსახურის ხუთმა სპეციალისტმა: ზაზა ოსეფაიშვილმა, შორენა კაჭარავამ, მარინა ჟღენტმა, ნინო გიორგაძემ და ლუბა ჯამბერიძემ 420-420 ლარი მიიღეს; ნუგზარ მგელაძეს კოლეგებზე 20 ლარით ნაკლები ერგო; მუნიციპალური შესყიდვების სამსახურის უფროსმა ვლადიმერ გოგიბერიძემ 700 ლარი მიიღო, ამავე სამსახურის სპეციალისტმა _ 420 ლარი; ასევე 420-420 ლარი მიიღეს კულტურის, განათლების, სპორტის, ძეგლთა დაცვის და ახალგაზრდულ საქმეთა, ტურიზმისა და კურორტის განვითარების სამსახურის სპეციალისტებმა მაია ძნელაძემ და მარინა ცინცაძემ; აღნიშნული სამსახურის უფროსს ლამარა მამალაძეს კი 700 ლარი ერგო;
შრომის, ჯანმრთელობის და სოციალური დაცვის, ლტოლვილთა და იძულებით გადაადგილებულ პირთა სამსახურის უფროსს რომან მამალაძეს 700 ლარი, სპეციალისტებს ლომგულ ტრაპაიძესა და თემურ ბენდელიანს _ 420-420, ხოლო სპეციალისტს აბესალო ჩანტლაძეს 225 ლარი ერგოთ;
სამხედრო აღრიცხვის, გაწვევისა და მობილიზაციის სამსახურის უფროსმა ედიშერ სიხარულიძემ პრემიის სახით 700 ლარი  მიიღო, ხოლო აღრიცხვისა და გაწვევის განყოფილების უფროსმა კახი ყაჭეიშვილმა _ 500 ლარი; სპეციალისტებმა _ ლელა სიხარულიძემ, კობა ჯიბლაძემ და მარინა დეკანოზიშვილმა კი _ 420-420; რეზერვთა მობილიზაციის განყოფილების უფროსს ვახტანგ მეფარიშვილს 500 ლარი, სპეციალისტებს ნანა სიხარულიძესა და მაია ოსეფაიშვილს 420-420 ლარი ერგოთ, ხოლო ამათზე 20 ლარით ნაკლები _ შორენა მეგრელიშვილს.
ყველაზე დაბალი პრემია ერგო ზედამხედველობის სამსახურის უფროსს ვლადიმერ სიხარულიძეს _ 233 ლარი და 33 თეთრი; აღნიშნული სამსახურის სპეციალისტს, განსხვავებით სხვა სამსახურების სპეციალისტებისგან, 140 ლარი მიაკუთვნეს, ხოლო, ასევე, სპეციალისტს კახი მეფარიშვილს _ 35 ლარი. 23 ტერიტორიული ორგანოს რწმუნებულებს პრემიის სახით 400-400 ლარი გადასცეს.
ჩოხატაურის მუნიციპალიტეტის გამგეობის თანამშრომლებისგან განსხვავებით, პრემია ოზურგეთის მუნიციპალიტეტის გამგეობის მხოლოდ ოცდაექვსმა თანამშრომელმა მიიღო. რისთვისაც ოზურგეთის 2010 წლის ბიუჯეტიდან 17 472 ლარი გაიცა.
როგორც გამგეობიდან მიღებულ ოფიციალურ წერილში ვკითხულობთ, გამგებელმა გიორგი ტაკიძემ 1 800 ლარი მიიღო; მისმა მოადგილემ ლავრენტი ქვილორიამ _ 1 100 ლარი; გიორგი შილაკაძემ _ 700 ლარი; თინათინ ლომჯარიამ, გიორგი ჩაგანავამ და  ნათია ვაშალომიძემ _ 1400-1400 ლარი; ამირან გირკელიძემ _ 700 ლარი; ელიკო დოლიძემ _ 1000 ლარი; ალექსანდრე თალაკვაძემ _ 420 ლარი; გია სადრაძემ კი _ 300 ლარი; კახა სადრაძემ _ 400 ლარი; მედეა საბაშვილმა _ 200 ლარი, იზა დარჩიამ _ 537 ლარი; ელენე სურგულაძემ _187 ლარი და 50 თეთრი; ამდენივე ერგოთ თამაზ ცერცვაძეს, ვასილ ქარჩავას, ზურა მექვაბიშვილს და ვაჟა ჩანჩიბაძეს; დავით გორდელაძეს _ 537 ლარი და 50 თეთრი; მარინა შაინიძემ 200 ლარი მიიღო; ია დოლიძემ და ნინო მახარაძემ _  350-350 ლარი; მარინა დარჩიამ, ლაშა ფირცხალაიშვილმა და ნინო დარჩიამ _ 420-420 ლარი.
რა სამუშაოს შესრულებისთვის ან რა დამსახურებისთვის ერგოთ ზემოთ ჩამოთვლილ საჯარო მოხელეებს პრემია, გამგებელი გიორგი ტაკიძე, მიუხედავად ჩვენი წერილობითი მოთხოვნისა, არ აკონკრეტებს.
საკმაოდ სოლიდური პრემიების გაცემის ფონზე, სოციალური დახმარებები მცირდება; მეტიც, გაჭირვებულ ადამიანებს ერთჯერადად, 50 ლარის მისაღებად ლოდინი ერთი წელიც კი უხდებათ, თუმცა, ამ ერთწლიანი ამაო ლოდინის შემდეგაც ვერ იღებს ზოგიერთი მათგანი ამ მიზერულ დახმარებას, რაც ადგილობრივ ხელისუფლებას, როგორც ოფიციალური დოკუმენტებიდან ირკვევა, ნაკლებად აწუხებს.