ის-ის იყო ,,ოცნების“ აქტივისტები და შტაბის წევრები სოფელში მივიდნენ, რომ ,,ნაციონალების“ მხარდამჭერები გამოჩნდნენ.
თემურ ჩხაიძე: ,,ესენი ჩვენ კვალდაკვალ დაგვყვებიან და ცდილობენ ჩვენი მოთმინება გამოსცადონ. მოსახლეობას ვხვდებოდით, როცა წამოწვიმა და დიდი ცაცხვის ძირში გავაგრძელეთ საუბარი. ისე იქცეოდნენ, თითქოს ჩვენ არანაირი უფლება არ გვქონდეს ჩვენს სოფლებში შესვლის, თითქოს ცდილობდნენ ჩვენს გამოწვევას. მაგრამ საბედნიეროდ, ყველაფერი კარგად დამთავრდა. ჩვენ ყოველთვის გვეყოფა მოთმინება, რომ ამას გავუძლოთ. ძალიან ცოტაა დარჩენილი ჩვენს გამარჯვებამდე და თავს ვერ მივცემთ პროვოკაციაზე წამოგების უფლებას.“
ახალსოფელში, ამ შემთხვევის დროს, გამგებლის მოადგილე კახა ასკურავაც გამოჩნდა. ახალსოფელი სუფსის ტერიტორიულ ერთეულში შემავალი სოფელია და ეტყობა, ასკურავას გულმა არ დაანება კონტროლსმიღმა გაეშვა.
სიტუაცია მალევე განიმუხტა და დეპუტატობის კანდიდატმა მოსახლეობასთან შეხვედრა მშვიდობიანად დაასრულა. შეხვედრას სხვა მედიასაშუალებებთან ერთად ახლადგამოჩეკილი ფსევდო ინფო 9-ც ,,აკვირდებოდა’’, უფრო ზუსტად თუ ვიტყვით, დანარჩენ ჟურნალისტებს აკვირდებოდა და რაც შეხვედრაზე მოხდა, საეჭვოა მათ ობიექტივშიც ასახულიყო.
დღის მეორე ნახევარში, თემურ ჩხაიძემ და მისმა საარჩევნო შტაბმა აცანის მოსახლეობასთან გამართა შეხვედრა. აცანის სტადიონზე საკმაოდ დიდი რაოდენობით შეიკრიბა ამომრჩეველი. დეპუტატობის კანდიდატმა სიტყვით მიმართა ხალხს:
,,მინდა გითხრათ ერთი რამ, თუ რატომ მოვიდა ბიძინა ივანიშვილი პოლიტიკაში. მას ჰქონდა აწყობილი საქმე, უზარმაზარი კაპიტალი და ყველამ კარგად ვიცით, რომ ნებისმიერ ქვეყანაში შეეძლო მშვიდად ეცხოვრა. მაგრამ არაფერს არ აქვს ამქვეყნად ფასი, როცა სამშობლო გეცლება ხელიდან… სამ წელიწადში, როცა მთლიანად მორჩება ნორმალური სახელმწიფოს ჩამოყალიბებას, იგი პოლიტიკიდან წავა და ჩვენ აწყობილ ქვეყანას დაგვიტოვებს…’’
შეხვედრის შემდეგ აცანისა და ,,გურიის’’ ვეტერან ფეხბურთელებს შორის ფეხბურთის მატჩი გაიმართა. ადგილობრივები, ჩვენთან საუბარში ამბობდნენ, რომ საღამის 18 საათისთვის აქ სხვა მატჩის გამართვაც იყო დაგეგმილი. კერძოდ, გამგეობის სპორტისა და ახალგაზრდულ საქმეთა სამსახური ტურნირს ატარებს და ფინალური შეხვედრის ჩატარება დღეს იგეგმებაო. აცანის რწმუნებული მინდია ქინქლაძე შესამჩნევად ნერვიულობდა და გამუდმებით ტელეფონით საუბრობდა. ისიც გვითხრეს, რომ მას წამდაუწუმ ურეკავდნენ გამგეობიდან და შეხვედრის დამთავრებას თხოვდნენ.
აცანიდან უკან დაბრუნებულებს, გზად გამგებლის მოადგილე კახა ასკურავა შეგვხვდა. აცანაში მოდიოდა დავით ჩხაიძეც, რომელიც ფრაქცია ,,ნაციონალური მოძრაობის’’ თავჯდომარეა ლანჩხუთის საკრებულოში. იგი აცანელია დასწორედ მის სოფელს წარმოადგენს ადგილობრივ ხელისუფლებაში. ფეხბურთის მატჩი ვეტერანი ფეხბურთელების გამარჯვებით, შეხვედრა კი – ექსცესების გარეშე დასრულდა.
ფსევდოჟურნალისტები აცანაშიც გულმოდგინედ აკვირდებოდნენ ,,კოლეგებს’’.
