სავარაუდოდ, ეს იმან გამოიწვია, რომ სუფსაში და ზოგადად, გურიაში მთავრობის რეიტინგი კატასტროფულად დაბალი იყო. რეიტინგის აწევას და მოსახლეობის ნდობის მოპოვებას საპრეზიდენტო და სამთავრობო საჩუქრებით ცდილობენ. ამ აქციის ფარგლებში, წინა კვირაში სუფსაში საპრეზიდენტო “სტომატოლოგიური ავტობუსები” ჩავიდნენ. სოფელს არც მინისტრების და სხვადასხვა სამთავრობო სტრუქტურების ხელმძღვანელების სტუმრობა აკლდა.
ჩვენი იქ სტუმრობისას, სუფსის რწმუნებული, ელგუჯა ჩხარტიშვილი ნერვული მოუსვენრობით ცდილობდა მოზღვავებულ სტუმრებსა და საქმეებს გამკლავებოდა. მისი მოუცლელობის გამო, მისმა თანაშემწემ აღგვითქვა დახმარება, მაგრამ მან რატომღაც ტელეფონით ლანჩხუთის გამგებლის მოადგილე, კახა ასკურავა დაგვაკავშირა(?!). ასკურავამ აგვიხსნა, რომ სუფსაში, სოფლის პროგრამის ფარგლებში გაკეთებული პროექტების ხარჯთაღრიცხვა გამგეობაში ინახება და შეგვიძლია, გამოვითხოვოთ. სუფსის ადმინისტრაციის თანამშრომელს, როგორც იქნა, გავაგებინეთ, რომ სოფლის პროგრამებზე თავად შეუძლია ამომწურავად გვესაუბროს და ამისთვის ასკურავას “დახმარება ” საჭირო არ არის.
ასკურავა უკვე იმდენჯერ დაინტერესდა, თუ რას წერს “გურია ნიუსი” სუფსის შესახებ, რომ აშკარაა, თავის თავზე აქვს აღებული სოფლის კურატორობა და მიიჩნევს, რომ მასთან შეუთანხმებლად სოფელში არც ერთი მედიასაშუალება არ უნდა შევიდეს.
როგორც იქნა, რწმუნებულმაც მოიცალა ჩვენთვის და სუფსაში გახორციელებულ პროექტებზე დეტალურად გვესაუბრა: “2011 წელს, სუფსის ტერიტორიულ ერთეულზე, რომელშიც შედის სოფლები _ სუფსა, ხიდმაღალა, გრიგოლეთი, ტაბანათი, ჩქუნი და ახალსოფელი, 79 ათას 615 ლარი გამოიყო. ამ თანხით ახალსოფელში შეიღობა 2 საყანე ფართობი; მოხდა სასმელი წყლის სისტემის რეაბილიტაცია; გამოიცვალა წყლის საქაჩი ტუმბო და მილები. დახარჯულმა თანხამ ჯამში 13 ათას 628 ლარი შეადგინა.
სოფელ ხიდმაღალაში კაპიტალურად გარემონტდა საბავშვო ბაღის შენობა. შენობას გამოეცვალა კარ-ფანჯრები, შეილესა, შეიღება, როგორც ფასადი, ასევე ინტერიერი და დაიხარჯა 12 ათას 232 ლარი. ხიდმაღალაში სასაფლაოს შემოღობვას 5 ათას 568 ლარი მოხმარდა. სუფსაში შემავალ ამ სოფელში 2011 წელს გამოიცვალა წყალგაყვანილობის სისტემა და დაიხარჯა 4 ათას 893 ლარი. გამოიცვალა წყლის მილები, ელექტროტუმბო, დამონტაჟდა ელექტრო მრიცხველი. სულ ხიდმაღალას ინფრასტრუქტურის განვითარებისთვის დაიხარჯა 22 ათას 693 ლარი.
სოფელს გრიგოლეთში, რომელიც გურიის საკურორტო ზონას მიეკუთვნება, გაკეთდა ფეხბურთის სტადიონი. მისი მოწყობისთვის სუფსის ადმინისტრაციამ 10 ათას 573 ლარი დახარჯა (თუმცა, დათვალიერებისას, აღმოვაჩინეთ, რომ სტადიონი არც თუ ისე სახარბიელო მდგომარეობაშია. ავტ.).
სოფელ ჩქუნში 5 ათას 206 ლარად შემოიღობა საყანე ფართობი და გაკეთდა საწრეტი არხი”.
სუფსის ტერიტორიულ ერთეულში შემავალ სოფელ ტაბანათის მოსახლეობას, ხშირი წვიმებისას, გამუდმებით აწუხებს დატბორვის საფრთხე. ჩვენ არაერთხელ გვინახავს, როგორ იტბორება სოფლის ქუჩები და ეზოები სანიაღვრე არხების გაუმართაობის გამო.
სუფსის რწმუნებული ჩვენთან საუბრისას აღნიშნავდა, რომ ტაბანათში ამ პრობლემის მოსაგვარებლად გაკეთდა საწრეტი არხი, რომლის ღირებულებაა 12 ათას 163 ლარი. რწმუნებულის თქმით, არხი 2011 წელს გაკეთდა. წელს, ივნისში, სუფსაში წყალდიდობამ განსაკუთრებით ტაბანათი დააზიანა. ადგილობრივები “გურია ნიუსთან” ჰყვებოდნენ, რომ წყალდიდობა არხისა და კოლექტორის გაუმართაობამ და არასწორმა მშენებლობამ გამოიწვია.
ტაბანათში წყალგაყვანილობისთვის 9 ათას 485 ლარი დაიხარჯა.
სოფელ სუფსის ცენტრში და ორჯუმალის ქუჩაზე გაკეთდა მუდმივი წყალი, ამ პროექტისა და საყანე ფართობის შეღობვის საერთო ღირებულებაა 5 ათას 608 ლარი.
2012 წელს, სუფსას, სახელმწიფო ბიუჯეტიდან, სოფლის პროგრამების განვითარებისთვის 97 ათას 4 ლარი გამოუყვეს. შედგა 19 პროექტი და თანხები პროექტების მიხედვით გადანაწილდა.
ტაბანათში, ე.წ. უნაგირას უბანში, მიმდინარეობს მინი სტადიონის მშენებლობა. პროექტი დაუსრულებელია. სტადიონის მშენებლობისთვის 23 ათას 478 ლარია გამოყოფილი. ამავე დასახლებაში, მარინე გოგუაძის სახლთან გაკეთდა მილხიდი. პროექტის ღირებულებაა 1 163 ლარი.
წვიმების გამო, ძალიან ზარალდება უნაგირას დასახლებაც. მოსახლეობა აქაც სანიაღვრე სისტემის გაუმართაობას უჩიოდა. ამ უბნის წარმომადგენელი, კლარა კუტუბიძე ყვებოდა, როგორ ამაოდ დადიოდა უწყებიდან უწყებაში ამ პრობლემის მოსაგვარებლად. “გურია ნიუსში” გამოქვეყნებული წერილის _ “სუფსაში გაწვიმების ეშინიათ!” _ გამო ლანჩხუთის გამგებლის მოადგილის საყვედურიც დავიმსახურეთ, ჯერ ჩვენთან შეგეთანხმებინათ მასალა და გაიგებდით, რომ არხი კეთდებოდაო. როგორც ელგუჯა ჩხარტიშვილი ამბობს, ეს პრობლემა უნაგირას მოსახლეობას საბოლოოდ მოუგვარდა. არხის გაწმენდა 2 ათას 437 ლარი დაჯდა.
სოფელ ჩქუნში 2012 წლის გასული თვეების განმავლობაში, მოეწყო საყანე ფართობებზე 3 ათას 664 ლარის ღირებულების გადასასვლელი. შემოიღობა საყანე ფართობი, სამუშაოებმა შეადგინა 2 ათას 221 ლარი.
ხიდმაღალაში, წლევანდელი თანხებით, არტეზიულ ჭაზე გამოიცვალა ტუმბო, რომლის ღირებულებაა 1531 ლარი. ამავე სოფლის ე.წ. საკატიას საყანე ფართობების შემოღობვა 7 ათას 420 ლარი დაჯდა. წელსვე, 9 ათას 36 ლარით დასრულდა საბავშვო ბაღის სარემონტო სამუშაოები. გაიწმინდა სანიაღვრე არხი, რომლის ღირებულებამ 2 ათას 767 ლარი შეადგინა.
სოფელ სუფსის ცენტრის აღდგენისთვის დაგეგმილ პროექტებში შევიდა გარეგანათების მოწყობა. მასზე დაიხარჯა 4 029 ლარი. ჩატარდა სამუსიკო სკოლის ფასადის რემონტი, რაზეც 5 443 ლარი დაიხარჯა. აღსანიშნავია, რომ შენობა მხოლოდ ფასადურად გარემონტდა. ამ შენიშვნამ სოფლის რწმუნებულის გაოცება გამოიწვია: _ შენობა “ერმიტაჟს” რომ ჰგავს, ამას თუ ამჩნევთო. სუფსის ცენტრში არსებული პარკის რეაბილიტაციაზე 5 775 ლარი დაიხარჯა. გაიწმინდა პარკთან მდებარე სანიაღვრე არხი, შემოიღობა, მოეწყო გარეგანათება და დაიდგა 2 სკამი. რწმუნებული მიიჩნევს, რომ სკამების რაოდენობა სრულიად საკმარისია. ამავე სოფელში გაიწმინდა ე.წ. “ზდანიების არხი”, რომლის ღირებულებაა 1 996 ლარი. სუფსის ცენტრში მოედნის ორმოვანი დამუშავებისთვის გამოყოფილია 1751 ლარი. რეალურად, არც სუფსის ადმინისტრაციული შენობის გვერდზე მდებარე პარკი გამოიყურება სახარბიელოდ და არც მოედანია მოასფალტებული. სუფსის ცენტრში იგეგმება, აგრეთვე საზოგადოებრივი ტუალეტის მშენებლობა, რომლისთვისაც 7 884 ლარია გამოყოფილი. ტუალეტის მშენებლობა ჯერ არ დაწყებულა. მუშები, იმ ადგილიდან, სადაც მისი მშენებლობა უნდა დაიწყოს, ძველი ნანგრევების ნარჩენებს ეზიდებოდნენ.
ახალსოფელში, პირველ ბრიგადაში, წლევანდელი პროგრამის ფარგლებში გაკეთდა წყლის მაგისტრალი. სამუშაოები, რომლის ღირებულებაა 5035 ლარი, დასრულებულია. ახალსოფლის ცენტრში მიმდინარეობს სკვერის მოწყობის სამუშაოები. ამისთვის 9 381 ლარია გამოყოფილი. ახალსოფელშივე გაკეთდა საძოვრებზე გადასასვლელი 2 ჭიშკარი, რაც 2320 ლარი დაჯდა.
სოფლის დახმარების პროგრამის ფარგლებში, სუფსაში გახორციელებული პროექტების ნაწილი დასრულებულია, ნაწილის გაკეთება ამ ეტაპზეც მიმდინარეობს. რწმუნებულის, ელგუჯა ჩხარტიშვილის მტკიცებით, ყველა მათგანი მოცემულ ვადებში აუცილებლად ჩაბარდება. ხოლო, რამდენად შეესაბამება სკვერების, სტადიონების და “ერმიტაჟის” მსგავსად ფასადების გარემონტება სუფსის მცხოვრებთა პრიორიტეტებს, გამოხმაურებას, პირველ რიგში, მოქალაქეებისგან ველით.
