სახელმწიფო აუდიტის სამსახურის გენერალური აუდიტორის ბრძანება № 137/37 მთელი რიგი ვალდებულებები უდგინდებათ საარჩევნო სუბიექტებს, მაუწყებლებსა და გაზეთებს. კერძოდ:
1. წინასაარჩევნო რეკლამისათვის საეთერო დროის ან/და გაზეთის ფართობის შესყიდვა უნდა განხორციელდეს წინასწარი ანგარიშსწორების წესით. წინასაარჩევნო კამპანიის მიმდინარეობისას, საარჩევნო სუბიექტი ვალდებულია წინასწარ გადაიხადოს ერთი კვირის განმავლობაში ფასიანი რეკლამის განთავსებისათვის საეთერო დროის ან/და გაზეთის ფართობის ღირებულება განსაზღვრული ტარიფების შესაბამისად;
2. საარჩევნო სუბიექტებმა, მაუწყებლებმა და გაზეთებმა ამ ბრძანების პირველი პუნქტით გათვალისწინებული ანგარიშსწორების შესახებ ინფორმაცია მიაწოდონ საქართველოს სახელმწიფო აუდიტის სამსახურს ანგარიშსწორების განხორციელებიდან არა უგვიანეს 24 საათისა.
რაც ყველაზე მნიშვნელოვანია, სახელმწიფო აუდიტის სამსახურს არ წარმოუდგენია კონკრეტული დასაბუთება, თუ რატომ გახდა აუცილებელი აღნიშნული წესების შემოღება, რა კონკრეტულ მიზანს აღწევს აუდიტის სამსახური ახალი რეგულირებით.
„რეგიონული მედიის ასოციაციისა“ და „გურია ნიუსის“ არაერთგზის მცდელობის მიუხედავად, დეტალები დაგვზუსტებინა, სახელმწიფო აუდიტის პრესსამსახურის, ფატი მამიაშვილის პასუხი, ძალიან „მრავლისმეტყველი“ აღმოჩნდა.
_ თქვენ გაეცანით ბრძანებას? ნახეთ, რა წერია და მერე რა ვერ გაარკვიეთ, ვერ ვხვდები? ამასთან დაკავშირებით ჩვენ გვექნება დღეს განცხადება, რითაც საიას განცხადებასაც ვუპასუხებთ, _ გაგვიცხადა მამიაშვილმა, რომელსაც არც საიას განცხადებისთვის უპასუხნია და არც ჩვენთვის გაუცია კითხვებზე კონკრეტული პასუხი.
ახალგაზრდა იურისტთა ასოციაციაში ფიქრობენ, რომ ეს არის სანქცია მედიისთვის, ორგანიზაციაში, აშკარად ხედავენ ამის საფრთხეს.
მედიის სამართლებრივი დაცვის ცენტრის ხელმძღვანელი, ნათია კაპანაძე:
„სახელმწიფო აუდიტის სამსახურის გენერალური აუდიტორის 2012 წლის 6 აგვისტოს N137/37 ბრძანებით განსაზღვრული წესების დარღვევისათვის მაუწყებელს პასუხისმგებლობა (კომისიის 2012 წლის 15 აგვისტოს დადგენილების მიხედვით) ეკისრება „მაუწყებლობის შესახებ“ საქართველოს კანონის შესაბამისად. მითითებული კანონით კი სანქციად გათვალისწინებულია გაფრთხილება, ჯარიმა, ლიცენზიის მოქმედების შეჩერება ან ლიცენზიის მოქმედების გაუქმება.
სახელმწიფო აუდიტის სამსახურისათვის პოლიტიკურ სუბიექტის სარეკლამო მომსახურების თაობაზე ანგარიშსწორების შესახებ ინფორმაციის მიწოდების ვალდებულება ეკისრება ყველა გაზეთსა და მედიასაშუალებას
მნიშვნელოვანია, რომ ზემოაღნიშნული ბრძანების მიღების საფუძვლად მითითებულია „მოქალაქეთა პოლიტიკური გაერთიანების შესახებ“ საქართველოს ორგანული კანონის 322 მუხლის, 341 მუხლის პირველი პუნქტისა და მე-2 პუნქტის „ე“ ქვეპუნქტის, „სახელმწიფო აუდიტის სამსახურის შესახებ“ საქართველოს კანონის მე-10 მუხლის „მ“ ქვეპუნქტით აუდიტის სამსახურისათვის მინიჭებული უფლებამოსილება – უზრუნველყოს პარტიის დაფინანსების გამჭვირვალობა;
აღნიშნული საფუძველი გვაფიქრებინებს, რომ გაზეთების მიერ ანგარიშსწორების შემდეგ 24 საათში ვალდებულებების შეუსრულებლობისას სანქცირება მოხდება „მოქალაქეთა პოლიტიკური გაერთიანების შესახებ“ საქართველოს კანონის მუხლი 342 მე-5 პუნქტის თანახმად: „სახელმწიფო აუდიტის სამსახურისთვის მოთხოვნილი ინფორმაციის მიწოდების კანონით დადგენილი ვალდებულების შეუსრულებლობა − გამოიწვევს დაჯარიმებას 5 000 ლარით,“ _ განაცხადა ნათია კაპანაძემ „გურია ნიუსთან“.
