კენჭისყრის შედეგად, თავმჯომარედ არჩეული იქნა კოალიცია "ქართული ოცნების" კომისიის წევრი ნინო თავაძე, მდივნად _ "ქრისტიან-დემოკრატების" წევრი მარინე ჭიღლაძე და თავმჯდომარის მოადგილედ _ თემურ ნადირიძე.
როგორც შევიტყვეთ, კენჭისყრის დამთავრების შემდეგ, კოალიცია "ქართული ოცნების" კოორდინატორმა ტიტე ბაქანიძემ ერთ-ერთ წევრს უთხრა, შენს თავს ხმა რატომ არ მიეცი, შეგეძლო გასულიყავიო. ამის შემდეგ, კომისიის წევრებმა გადაწყვიტეს ჩაეთვალათ, რომ ბაქანიძის მხრიდან მოხდა ზეწოლა კომისიის წევრებზე. 27 აგვისტოს, საღამოს, ოზურგეთის #60 საოლქო საარჩევნო კომისიაში სხდომა გაიმართა, სადაც ბათილად ცნეს საუბნო საარჩევნო კომისიის შედეგები და 28 აგვისტოს, სოფელ ნატანებში ხელახლა გაიმართება საუბნო არჩევნები.
"გურია ნიუსთან" კოალიცია "ქართული ოცნების" კოორდინატორი ტიტე ბაქანიძე მისი მხრიდან რაიმე ზეწოლას და ჩაშლის ფაქტს არ ადასტურებს.
_ ზეწოლის რა მექანიზმი მქონდა, რომ გამეხორციელებინა კომიისის წევრებზე?! ეს არის აბსურდი. ან როგორ ჩავშალე სხდომა?! მე რომ მივედი, ყველაფერი დამთავრებული იყო. ეს არის უბრალოდ მიზეზი… ან თუ სხდომაზე მივუვარდი და ჩავშალე, პოლიცია რატომ არ გამოიძახეს მაშინ?! _ აცხადებს ბაქანიძე.
ნინო თავაძე "გურია ნიუსთან" აცხადებს, რომ კენჭისყრა კანონის სრული დაცვით ჩატარდა: "სხდომის დამთავრების შემდეგ, როცა ოქმი თეთრდებოდა, ყველაფერი დამთავრებული იყო, მოხდა გაუგებრობა, რომელშიც მე კარგად გარკვეული არ ვარ, რადგან არ ვესწრებოდი, თუმცა სხდომა არავის ჩაუშლია და არც ზეწოლის ფაქტებს არ ჰქონია ადგილი არჩევნების პროცესში."
#60 ოზურგეთის საოლქო საარჩევნო კომისიის თავმჯდომარე ზვიად თენიეშვილი "გურია ნიუსთან" საუბარში ასეთ კომენტარს აკეთებს: "დღეს, 60\42 უბანში, 2 საათისთვის დანიშნული იყო არჩევნები, სადაც არჩეული უნდა ყოფილიყო კომისიის თავმჯდომარე, მოადგილე და მდივანი. რის შემდეგადაც შეგვატყობინეს, რომ სხდომაზე არჩევნის პროცესში, მოხდა "ქართული ოცნების" წარმომადგენლის უკანონო შესვლა, რომელმაც სხდომაზე პასუხი მოსთხოვა კომისიის წევრებს, რომ რატომ არ გავიდა კომისიის თავმჯდომარის მოადგილედ მათი წარმომადგენელი. აღნიშნულიდან გამომდინარე, ვფიქრობთ, რომ კენჭისყრა მიმდინარეობდა კომისიის წევრებზე ზეწოლით; აღნიშნულს ვადასტურებთ საოლქო კომისიის წევრები და აქ არის განცხადებაც, რომელსაც ხელს კომისიის 8 წევრი აწერს. კომისიამ იმსჯელა ამ საკითხთან დაკავშირებით და ბათილად ცნო #60-42 საუბნო საარჩევნო კომისიის ოქმი."
