კორიფაძის განმარტებით, პარტიაში “ისე შემოიარა”, თუმცა, აღნიშნა, შვებულებაშია და, შესაბამისად, კანონს არ არღვევს.
სწორედ ამ ფაქტის გადასამოწმებლად გადავწყვიტეთ საჯარო ინფორმაციის წესით, მოგვეპოვებინა გამგებლის ის ბრძანებები, რომლის თანახმად, მუნიციპალიტეტის გამგეობის თანამშრომლები ამ ეტაპზე შვებულებაში იმყოფებიან.
განცხადებაში დაკონკრეტებული გვქონდა, რომ ბრძანებები დაუყონებლივ, ადგილზე უნდა გაგვეცნო. თუმცა, ბრძანებების ნახვისთვის მოქალაქეთა მისაღებში 1 საათზე მეტი გვალოდინეს.
საჯარო ინფორმაციის გაცემაზე პასუხისმგებელმა პირმა, იურიდიული სამსახურის სპეციალისტმა, იურისტმა ნინო ვაჩეიშვილმა ამდენი ხნის ლოდინის გამართლება სცადა და აღნიშნა, რომ ბრძანებებს კრებდა. ვაჩეიშვილმა რამდენიმე ბრძანება გაგვაცნო, მათ შორის, დიმიტრი კორიფაძის შვებულების შესახებაც.
ის, რომ ბრძანების დედნები ცალ-ცალკე წარმოგვიდგინეს, თანაც ერთ საათზე მეტი გვალოდინეს, აჩენდა ლოგიკურ ეჭვს, რომ კორიფაძის შვებულების ბრძანება სწორედ დროის ამ მონაკვეთში დაიწერა.
ბრძანება 27 აგვისტოთი იყო დათარიღებული. აღსანიშნავია ისიც, რომ ამავე დღეს გამგებელს კიდევ ერთი თანამშრომელი, სოფიო ჩხიკვაძე გაუშვია შვებულებაში. თუმცა, კორიფაძის შვებულებაში გაშვების შესახებ დაწერილი ბრძანება, ბოლო იყო.
ცალკე ჩამოტანილმა ბრძანებებმა, რომლის გაცნობას ძალიან დიდი დრო დააგვიანდა, ბევრი ეჭვი გააჩინა, ამიტომაც ბრძანების წიგნის გაცნობა მოვითხოვეთ, იმის დასადგენად, იყო თუ არა ეს ბრძანებები რეგისტრაციაში გატარებული. თუმცა, ამ კანონიერი მოთხოვნის შესრულება შეუძლებელი აღმოჩნდა.
ადმინისტრაციული სამსახურის უფროსი, დავით ჯინჭარაძე საერთოდ არ დაგველაპარაკა და ვაჩეიშვილთან ერთად კაბინეტში შეიკეტა.
კარებს მიღმა კიდევ ერთი საათი ჩვენთვის უცნობ თემაზე ითათბირეს. ბოლოს კი საქაღალდეში ჩაწყობილი ბრძანებები გამოიტანეს (საქაღალდეს 1980 წელი ეწერა), რომელიც დალუქული არ იყო.
ვაჩეიშვილის განმარტებით, ამდენი ხნის ლოდინი იმან განაპირობა, რომ ბრძანებები, რომლებიც მოქალაქეთა მისაღებში ჩამოგვიტანეს, საბუთებში იყო ჩასაკრავი და არა ბრძანების წიგნში, რომელიც, როგორ გაირკვა, გამგეობას საერთოდ არ გააჩნია! იურისტი განმარტავს, რომ ამის აუცილებლობა არ არსებობს _ ყველა ბრძანება, წლის ბოლოს იყრის ერთად თავს და ილუქება!
ექსპერტის, ირაკლი მელაშვილის თქმით, “ადგილობრივი თვითმმართველობის კანონის 43-ე მუხლის მე-4 პუნქტის თანახმად, ადგილობრივ თვითმმართველობების ორგანოებს, აუცილებლად უნდა ჰქონდეთ დებულება, რომელიც არეგულირებს სამართლებრივი აქტების მიღებისა და მათი შენახვის წესს, რომლის მიხედვითაც უნდა მოხდეს ბრძანებულების გამოცემა, აღრიცხვა და მისი დაარქივება (შენახვა). თუ მათ ასეთი დებულება არ გააჩნიათ, ეს არის კანონდარღვევა”.
ჩოხატაურის მუნიციპალიტეტის გამგეობის ადმინისტრაციული სამსახურის დებულებაში კი დაზუსტებული არ არის, რა წესით უნდა შეინახონ ბრძანებები _ აღნიშნული დებულების მეოთხე მუხლის თანახმად, “1. სამსახური დადგენილი წესით უზრუნველყოფს: წარმოების დადგენილი წესებისა და პროცედურების დაცვას, საჯარო ინფორმაციის ხელმისაწვდომობას, საჯარო ადმინისტრაციული წარმოების შესახებ ცნობების გამოქვეყნებას; საქმის წარმოებაში დაშვებული დოკუმენტების სათანადოდ გაფორმებას, დოკუმენტბრუნვას, დოკუმენტებზე მუშაობის ფორმირებას და მეთოდების სრულყოფას; გამგეობის საქმეთა ნაერთი ნომენკლატურის შედგენა-შემუშავებას, არქივირებას; მუნიციპალიტეტის გამგებლის ინდივიდუალურ-სამართლებრივი აქტების _ ბრძანებების რეგისტრაციას.”
ეს ყველაფერი კი იმას ნიშნავს, რომ ჩოხატაურის მუნიციპალიტეტის გამგეობაში, ნებისმიერ დროს შეუძლიათ ბრძანების შინაარსის შეცვლა, დაწერა, გადაკეთება, გაყალბება, რა თქმა უნდა, მათი ინტერესების შესაბამისად!
