სტატიაში საუბარი იყო ჩოხატაურის ცენტრში გამოკრულ “ნაციონალური მოძრაობის” საარჩევნო ბილბორდზე, სადაც მაჟორიტარი დეპუტატობის კანდიდატთან ერთად, ჩოხატაურის #1 საუბნო საარჩევნო კომისიის თავმჯდომარის მოადგილე, ოლია გიორგაძე შვილთან ერთად არის გამოსახული.
აღნიშნულ სტატიას დაუყონებლივ რეაგირება უშუალოდ ოლია გიორგაძის მხრიდან მოყვა – მან საუბნო საარჩევნო კომისიიდან გასვლის თაობაზე განცხადება დაწერა.
“გიორგაძემ თავისი ნებით დაწერა წასვლის შესახებ განცხადება. მე არც ვიცოდი დარღვევა თუ იყო, რადგან ბანერი არ მქონდა ნანახი. როცა განცხადება შემოიტანა, მაშინ დავინტერესდი და ვნახე. როდის გაიკრა ნამდვილად ვერ გეტყვით. დღეს ადგილმონაცვლეს ავირჩევთ სხდომაზე. კონკურსი გვაქვს გამოცხადებული”, _ აღნიშნა ჩვენთან საუბრისას ჩოხატაურის #62 საოლქო საარჩევნო კომისიის თავმჯდომარემ, თემურ კუტუბიძემ.
_ ბატონო თემურ, “ნაციონლურმა მოძრაობამ” ბანერი არ უნდა ჩამოხსნას?
_ ეგ ჩემი საქმე არ არის. ისე, სადაო საკითხი იყო, მაგრამ იმ ქალბატონს არ უდავია და მე რა მენაღვლება – დაწერა განცხადება და წავიდა.
_ რატომ იყო სადავო საკითხი?
_ იმიტომ, რომ როცა ეგ სურათი გადაიღეს, მაშინ ოლია არ იყო საუბნო საარჩევნო კომისიის წევრი.
_ თუმცა, ბანერი გაიკრა მაშინ, როცა წევრი იყო.
_ კი, მაგრამ ვინც გამოაკრა, ის უფრო დამნაშავეა…
_ ანუ “ნაციონალური მოძრაობა”?
_ არ ვიცი, ვინ იყო, მაგრამ მთავარია ერთი _ როცა გიორგაძემ გაიგო დანაშაულის შესახებ, დაწერა განცხადება და გავიდა. ახლა ბანერს რა მნიშვნელობა აქვს. თავად არ არის წევრი, პრეტენზიამ დაკარგა ფუნქცია, დაისაჯა და ზომა გატარდა, – ამბობს კუტუბიძე, რომელმაც ერთი წუთის წინ თქვა, რომ განცხადება თავად გიორგაძემ დაწერა.
ის, რაც საოლქო კომისიის თავმჯდომარეს “არ ანაღვლებს”, არც მმართველი პარტიის მაჟორიტარ კანდიდატს, მანანა ჯინჭარაძეს აწუხებს მაინცდამაინც, რომლის თქმით, არც ბანერის გაკვრა და არც გიორგაძის კომისიიდან გასვლა არ ეხება.
_ ქალბატონო მანანა, რატომ არ გაითვალისწინეთ, რომ ამ ბანერის გამოკვრით კანონს არღვევდით?
_ ეს მე არ მეხება, – ამბობს კანდიდატი, რომელმაც თუ აირჩიეს, კანონები უნდა დაწეროს და მერე, კანონიერების დაცვაზე იზრუნოს.
_ თქვენი ბანერია გამოკრული და თქვენ გამო, ადამიანს მოუხდა თანამდებობის დატოვება.
_ არ მეხება.
_ ვის ეხება?
_ ვერ გეტყვით. თქვენ ჩემზე უკეთ იცით (?!).
_ კანდიდატი ხართ და არ უნდა იცოდეთ ეს ვის ეხება?
_ თქვენ კარგად იცით და თუ მეტი კითხვა არ გაქვთ, მაშინ კარგად იყავით რა, არ მცალია.
ვერ გეტყვით, ვის გულისხმობდა ჯინჭარაძე _ “ნაციონალური მოძრაობის” ჩოხატაურის ორგანიზაციის ხელმძღვანელს, გამგებელს ლელა იმედაშვილს თუ ოზურგეთის მაჟორიტარი დეპუტატობის კანდიდატს, რამაზ ნიკოლაიშვილს, რომელსაც, როგორც ამბობენ, ოზურგეთთან ერთად, ჩოხატაურის და ლანჩხუთის მოგებაც ევალება, მაგრამ ფაქტია, რომ ჩოხატაურში “ნაციონალური მოძრაობის” კანდიდატს საკუთარი სარეკლამო ბანერის გაკვრაც კი არ ეხება!
