_ ეს იყო გურიაში პირველი ვაჟთა სკოლა, სადაც ინახებოდა ისტორიული ექსპონატები.
ოზურგეთის მუნიციპალიტეტის #1 საჯარო სკოლის ერთ-ერთი პედაგოგი, “გურია ნიუსთან” ამბობს, რომ “2008 წლის საპარლამენტო არჩევნების წინ მოქმედი გუბერნატორის რამაზ ნიკოლაიშვილის დროს დაიწყო ამ შენობის ნგრევა. ეს იყო ეგნატე ნინოშვილის სახელობის #1 საშუალო სკოლა და ძირითადი ისტორიული კორპუსი, რომელიც არა მარტო ოზურგეთელებისთვის, არამედ მთელი საქართველოსთვის წარმოადგენდა ისტორიულ ძეგლს.
მაშინ დაიგეგმა ახალი თანამედროვე ღია დარბაზის მშენებლობა და დანარჩენი მიმდებარე კორპუსების რეაბილიტაცია, ჩვენ ვიცოდით მთლიანმა პედკოლექტივმა, რომ რამდენიმე თვეში დასრულდებოდა ეს სამუშაოები, მაგრამ ასე აღარ მოხდა. მას შემდეგ ოთხი წელი გავიდა და დღემდე აღნიშნული დაპირება და საქმე არავის გახსენებია.
დღეს კი, როგორც ხედავთ, აღნიშნული ობიექტიდან ნარჩენის დაშლა და ნაგვის გატანა დაიწყეს, ჩვენთვის პედკოლექტივისთვის ჯერჯერობით უცნობია, ვისი ბრძანებით ხორციელდება მიმდინარე სამუშაოები. ჩემი აზრით, ეს პროცესი კვლავ წინა საარჩევნო კომპანიის ნაწილია”, _ აღნიშნავს “გურია ნიუსთან” საუბარში #1 საჯარო სკოლის ერთერთი პედაგოგი.
ოზურგეთის მუნიციპალიტეტის 1 საჯარო სკოლის დირექტორი მაია თავართქილაძე “გურია ნიუსთან” საუბარში აცხადებს, რომ ამ შენობას არანაირი კულტურული ფასეულობები არ გააჩნია და მისი ნგრევის პროცესი სრულიად კანონიერად მიმდინარეობს:
_ ინგრევა იმიტომ, რომ ეს არის ძველი, ამორტიზირებული შენობა, ეს არის აბსოლუტური საფრთხე ბავშვებისთვის, ცვივა ქვები, ამოსულია ბალახები, მიწა და ნანგრევები არის ანტისანიტარიის, ქვეწარმავლების ბუდე და ყველანაირი საფრთხეა მოსალოდნელი აქედან. ამასთან დავამატებ, რომ არავითარ კულტურულ მემკვიდრეობას ეს შენობა არ წარმოადგენს. ჩვენ განათლებისა და კულტურის სამინისტროს ამ საკითხზე მივმართეთ კითხვით, რომ ამ შენობას რაიმე კულტურული ფასეულობა ხომ არ გააჩნიაო, საიდანაც მივიღეთ პასუხი, რომ არანაირი.
ჩვენ გვაქვს ასევე დასკვნები, მივმართეთ ოზურგეთის მუნიციპალიტეტის გამგეობის შესაბამის სამსახურს _ მაქვს მათი დასკვნაც, რომ ეს არის ამორტიზირებული შენობა. სხვათა შორის ეს ოთხი წლის წინ იყო. ასე რომ, ყველანაირი მიდგომით შენობა ექვემდებარება დანგრევას.
_ ქალბატონო მაია, ამ შენობის ნგრევა 4 წლის წინ დაიწყეთ. რატომ შეჩერდა პროცესი და ახლა რატომ განაახლეთ? აქამდე არ იყო საშიში ბავშვებისთვის?
_ კი, 4 წლის წინ დავიწყეთ, მაგრამ, აქამდე, უბრალოდ, ფინანსები არ გვქონდა. ეს ძალიან დიდ თანხებთან არის დაკავშირებული _ ნგრევა, მერე ნაგვის გატანა და ა.შ. ახლა განათლების სამინისტროს მეშვეობით განვახორციელეთ ამ ამორტიზირებული შენობის დემონტაჟი. თქვენ იცით, რომ მეორე კორპუსში მიმდინარეობს ასევე რეაბილიტაცია. ჩვენ, პედსაბჭოს გადაწყვეტილებით, მივმართეთ განათლების სამინისტროს, რომ დანგრევა არის აუცილებელი _ არაესთეტიკური შენობაა და, მით უმეტეს, არავითარი ღირებული ფასეულეობების მატარებელი არ არის, გარდა იმისა, რომ კურსდამთავრებულები ამბობენ, ეს შენობა რაღაც ყორის ქვებითაა ნაშენიო. მინდა გითხრათ რომ ეს არაფერს არ ნიშნავს, იმიტომ, რომ ამ შენობის წინა ნაწილს ვაკეთებთ ჩვენ მუზეუმად და სააქტო დარბაზად. კი ბატონო ამ სკოლას უძველესი ტრადიციები გააჩნია და ამის შესანიშნავი მასალა გვაქვს, რომელიც ინახება ჩვენთან, _ აცხადებს #1 საჯარო სკოლის დირექტორი.
