ამის შემდეგ იწყება სატელეფონო გადართვა-გადმორთვების დაუსრულებელი და უშედეგო პროცედურა. ჩვენც ვიცით, რას გვიპასუხებენ და იმათაც იციან, რას ვკითხავთ…
მიუხედავად ამისა, პერიოდულად, აუდიტის სამსახურს ვსტუმრობთ კიდეც. თავის წარდგენის შემდეგ, “სიხარულისგან გადარეულები” გვხვდებიან _ ყოველ შემთხვევაში, ალაყაფის კარებთან მიმაგრებული მიკროფონის გამორთვამდე ჩვენი მისამართით ნათქვამ “აუ, მოვიდნენ”-ს ჩვენ ასე აღვიქვამთ.
6 თვის შემდეგ, აუდიტის სამსახურის უპასუხისმგებლო და უკანონო ქმედებებიდან გამომდინარე, მაღალი ეჭვის საფუძველზე, თავს უფლებას ვაძლევთ, ვივარაუდოთ, რომ: პოლიტიკური პარტიების ფინანსური მონიტორინგის სამსახურის თანამშრომლები არიან გაურკვეველი წარმოშობის სპეცდანიშნულების ბრიგადიდან. არ არის გამორიცხული, ისინი იყვნენ “კუდ”-ის, “სოდ”-ის “უშიშროების” ან პროკურატურის” თანამშრომლები და აბსოლუტურად უკანონოდ ეწეოდნენ საქმიანობას აუდიტის სამსახურში.
და, თუ ეს ყველაფერი არ შეესაბამება სიმართლეს, მაშინ სახელმწიფო აუდიტის სამსახურმა და ნათია მოგელაძის უწყებამ დაასახელოს იმ 19 ადამიანის ვინაობა, რომლებმაც მოახერხეს და სულ რაღაც 2 დღეში, 300 ადამიანი დაკითხეს (საუბარია კონტროლის პალატის მიერ მოწყობილ მასობრივ დაკითხვებზე, რომელსაც სწორედ ფინანსური მონიტორინგის სამსახური ატარებდა) გურიისა და იმერეთის რეგიონებში.
ზუსტად ნახევარი წელია, “გურია ნიუსი” კონტროლის პალატისგან ნათია მოგელაძის უწყების თანამშრომელთა სახელობით სიას და მათ სახელფასო სარგოების შესახებ ინფორმაციას ითხოვს. პასუხი საგანგაშოდ ალოგიკურია _ “კონტროლის პალატა მოკლებულია შესაძლებლობას, გადმოგცეთ ინფორმაცია ზემოთ აღნიშნულ საშტატო ერთეულებზე მომუშავე საჯარო მოსამსახურეთა ვინაობის შესახებ, მათი თანამდებობრივი სარგოების მითითებით, ვინაიდან ხსენებული ინფორმაცია შეიცავს პერსონალურ მონაცემებს!”
ამ შინაარსის პასუხი 2012 წლის 3 აპრილს მივიღეთ. უწყებას, რომელიც არ წარმოადგენს საიდუმლო სამსახურს, რომლის ხელმძღვანელისა და მისი მოადგილის ვინაობა ცნობილია, ქვეშევრდომების კი _ საიდუმლო, მსოფლიოში ანალოგი არ მოეპოვება.
კიდევ უფრო უპრეცედენტოა ფაქტი, რომელიც აუდიტის სამსახურმა მას შემდეგ ჩაიდინა, რაც ლევან ბეჟაშვილის სახელზე საჩივარი შევიტანეთ _ აღნიშნული საჩივრით ვითხოვდით, ეცნობებინათ ჩვენთვის მოგელაძის თანამშრომლების ვინაობა და მათი სახელფასო სარგოები.
2012 წლის 25 მაისს, ამ საჩივრის განხილვა შედგა კონტროლის პალატაში, სხდომა გამართა იურიდიული სამსახურის წარმომადგენელმა, ივანე პეტრიაშვილმა. მაგრამ, მათ მიერვე განხილული საჩივრის პასუხი დღემდე არ ჩაგვბარებინა. მთელი ამ ხნის განმავლობაში, იურიდიული დეპარტამენტის წარმომადგენლები იტყუებოდნენ, რომ დოკუმენტი მზად იყო და გადმოგზავნილი ფოსტით. მაგრამ. რომელი ფოსტით გამოგზავნეს, არავინ იცის, რადგან მეოთხე თვეა, მსგავს დოკუმენტს ჩვენამდე არ მოუღწევია.
2012 წლის 24 აგვისტოს “გურია ნიუსმა” აუდიტის სამსახურის წინააღმდეგ სარჩელი შეიტანა.
ჩვენს ინტერესებს სასამართლოში “ქართული მედიის სამართლებრივი დაცვის ცენტრის” ხელმძღვანელი, ნათია კაპანაძე დაიცავს. მისი თქმით, ასეთი უპრეცედენტო სარჩელი, მსგავსი სასარჩელო მოთხოვნით _ დაევალოს საქართველოს აუდიტის სამსახურს 2012 წლის 25 მაისს განხილული საჩივრის შედეგის გადმოცემა, მათ აქამდე სასამართლოში არ შეუტანიათ:
„სახელმწიფო აუდიტის სამსახურში წარდგენილ საჩივართან დაკავშირებით, დარღვეულია საქართველოს ზოგადი ადმინისტრაციული კოდექსით დადგენილი ვადები, რომელიც მითითებულია საჯარო ინფორმაციის გაცემისა და ადმინისტრაციული საჩივრის განხილვისათვის. ადმინისტრაციული ორგანოს მიერ კონკრეტული მოქმედებების განხორციელებისაგან თავის შეკავება პირდაპირ და უშუალო ზიანს აყენებს დაინტერესებული პირის ინტერესებსა და უფლებას.“
ნათია კაპანაძე, რომელიც ჩვენი წარმომადგენელი გახლდათ კონტროლის პალატაშიც, ამბობს, რომ დღეში რამდენჯერმე რეკავდა იურიდიულ სამსახურში ძალიან ელემენტარული პასუხის მისაღებად, _ გადმოეცათ ჩვენთვის მათ მიერვე განხილული საჩივრის პასუხი: “ამ დროის განმავლობაში, მუდმივად ვუკავშირდებოდი იურიდიულ სამსახურს და პასუხად ვიღებდი, რომ დოკუმენტები მზადდება, გადმოგზავნილია უკვე ან მოგვიანებით დაადგენდნენ საქმის მზადების ეტაპს“.
ჩვენი ყველა ზარი და მცდელობა, დავკავშირებოდით აუდიტის სამსახურის იურიდიულ დეპატარტამენტს, უშედეგოდ სრულდებოდა. პასუხი მრავალფეროვანი იყო: ჯერ არ მოსულან, შვებულებაში არიან და ვინც დარჩა, ისინი სასამართლო პროცესებს ესწრებიან, შესვენებაზე არიან გასულები და მოგვიანებით გადმორეკეთ…
ჩვენ უფრო სხვა ეჭვი გვაქვს, არაა გამორიცხული, რომ ნათია მოგელაძის თანამშრომლები, წინასაარჩევნოდ, სხვადასხვა უწყებებში, ან სულაც პარტიებში იყვნენ გადანაწილებულები.
ცესკო-ს სასწავლო ცენტრის ტრენერებად აუდიტის სამსახურის შვებულებაში მყოფი თანამშრომლები რომ არიან, ამის თქმა დაზუსტებულად შეგვიძლია.
