2011 წლის სახელმწიფო ბიუჯეტის პრიორიტეტები გაწერილია. მმართველ გუნდს მიაჩნია, რომ ქვეყნის განვითარების კონცეფციას ეტაპობრივად ახორციელებს. როდის იქნება გურიის რეგიონი ერთიანი გეგმის შემადგენელი ნაწილი?! აქ ხალხს ისევ მოლოდინის რეჟიმში უხდება ცხოვრება, ყოფითი პირობები თანდათან მძიმდება და ლარის ინფლაცია საგრძნობლად აისახება მათი ოჯახის ბიუჯეტზე.
ამ და სხვა საკითხებზე საქართველოს პარლამენტის საფინანსო-საბიუჯეტო კომიტეტის თავმჯდომარე ზურაბ მელიქიშვილი გვესაუბრება.
_ 2011 წელს საფინანსო რესურსი, რომლის დახარჯვაც არის შესაძლებელი არის 7 მილიარდ 100 მილიონი ლარი. ბიუჯეტის მთავარი პრიორიტეტია ჯანდაცვა და სოციალური სფერო, რისთვისაც მილიარდ 600 მილიონი ლარია გამოყოფილი. ყველა ის ვალდებულება, რომელიც 2010 წელს გვქონდა აღებული, გაწერილი და დაფინანსებულია. ასევე გამოვყოფ ინფრასტრუქტურულ პროექტებს, ტურისტულ ინფრასტრუქტურას, რომელიც ხელს შეუწყობს ქართული ეკონომიკის კვლავწარმოებას. სხვადასხვა ქალაქებსა თუ დასახლებულ პუნქტებში გზების და წყალსადენების რეაბილიტაციისთვის სერიოზული თანხებია გამოყოფილი. მნიშვნელოვანია სოფლის მეურნეობის მიმართულება _ აქ სხვადასხვა პროგრამები დაფინანსდება 40 მილიონი ლარით. აქედან დიდი ნაწილი მიდის მარცვლეული კულტურის სათესლე მასალის შემოტანასა და ფერმერებისთვის ხელშეწყობაზე. ჩვენთვის მნიშვნელოვანია განათლების მიმართულება, ბიუჯეტში ჩადებულია თანხები და ყველა პედაგოგს დააზღვევს სახელმწიფო.
_ საქართველოს რეგიონებში, მათ შორის გურიაში, მძიმე სოციალური ფონია. შეუმსუბუქდება თუ არა ყოფა მოსახლეობას?
_ სახელმწიფო ბიუჯეტისთვის ყველა ის მიმართულებაა პრიორიტეტული, რომელიც ხალხს აწუხებს, თუმცა, უნდა აღვნიშნო, ეს არის ის რესურსი, რაც დღეს გაგვაჩნია. ვიცით, რომ პენსია. თუ სხვა სოციალური დახმარებები არ არის საკმარისი თითოეული ბენეფიციარისთვის და პენსიონერისთვის. სახელმწიფო ბიუჯეტიდან 5 მილიარდ 300 მილიონი ლარია საგადასახადო შემოსავლები. ჩვენ შეგვეძლო სხვა დამატებითი ვალდებულებები აგვეღო, მაგრამ ეკონომიკის გაჯანსაღებისთვის გადავწყვიტეთ, რომ 770 მილიონი საბიუჯეტო დეფიციტის შემცირებას მოხმარებოდა. ჩვენი მიზანია ისეთი მაკროეკონომიკური პარამეტრების დამკვიდრება, როცა ბიუჯეტი მთლიან პროდუქტთან მიმართებაში არ აღემატება 30%-ს, ვალი არ აღემატება 60%-ს, საბიუჯეტო დეფიციტი არ იყოს 3%-ზე მეტი. ჩვენ აქეთკენ მივისწრაფვით.
_ პროცესები, რომელიც გურიაში განვითარდა, ოპოზიციის ნაწილმა შეაფასა, როგორც არჩევნების შემდეგ გამარჯვებულის ანგარიშსწორება დამარცხებულზე. მიმალვაშია ჩოხატაურის საკრებულოში თქვენი ფრაქციის თავმჯდომარე შოთა სირაძე. მმართველი გუნდი ცდება კადრების შერჩევაში?
_ თუ გურიაში იყო კონკრეტული გადაცდომა, კურორტებზე უკანონოდ მოხდა მიწების გასხვისება _ ეს სამართალდამცავების საქმეა. ვინც დანაშაულს ჩადის, მან პასუხი უნდა აგოს კანონის წინაშე _ ეს იქნება ჩვენი გუნდის წევრი თუ ოპოზიციის წარმომადგენელი. პოლიტიკური მიკუთვნებულობა არ წარმოადგენს არც ერთი ადამიანისთვის გარკვეულ იმუნიტეტს.
_ საკვებ პროდუქტებზე ფასების ზრდამ, შესაძლოა, სოციალური აფეთქება გამოიწვიოს. დაჩქარდება თუ არა სახელმწიფოს მხრიდან დროული დახმარება?
_ ფასების მატება არ არის მარტო ქართული პრობლემა, მთელ მსოფლიოში მიდის ეს პროცესები, რაც, სამწუხაროდ, საქართველოზეც აისახება. ჩვენთვის მთავარია სოფლის მეურნეობის ამუშავება.
_ აგრარულ ქვეყანაში სოფლის მეურნეობაზე საუბარი ბოლო დროს გააქტიურდა. გურია მთიანი რეგიონია, სადაც არის სამი კურორტი, რომლებსაც, პირველ რიგში, სამკურნალო მნიშვნელობა აქვთ; არსებობს ბახმაროს და ურეკის მიწათსარგებლობლობის გეგმები. რამდენად დაჩქარდება მათი გახორციელება? პოლიტიკოსებისგან განსხვავებით, მოსახლეობისთვის ეს არ არის პოპულისტური თემები.
_ ჩვენი მიზანია ყველა რეგიონს, მათ შორის გურიას, ჰქონდეს თავისი ფუნქცია. ერთიანი გეგმის ფარგლებში აღდგა სიღნაღი, ბათუმი, მესტია; იგეგმება ანაკლიის რეაბილიტაცია, ფოთის ინდუსტრიულ ზონად გამოცხადება. ეს გეგმა რომ შესრულებადია, საზოგადოება თვალნათლივ ხედავს. ამ გეგმაში მოიაზრება გურიაც. ყოველდღიურად გვაქვს შეხვედრები ბიზნესმენებთან და მეწარმეებთან; გვინდა მათთან გვქონდეს პარტნიორული ურთიერთობა. მეწარმესა და საგადასახადო ორგანოს შორის უნდა იყოს არა ჩასაფრების პოლიტიკა, არამედ თანამშრომლობის, რომ უმუშევრად დარჩენილები ისევ სახელმწიფოს არ დააწვეს. ინვესტორებმა მითხრეს, მართალია, საგადასახადო წნეხი დაბალია, მაგრამ იმისთვის, რომ მეწარმეს არ ჰქონდეს უსამართლობის განცდა, ჯერ კიდევ ბევრი რამ არის გასაკეთებელიო. რა თქმა უნდა, თქვენ და მეც გვინდა, რომ უფრო მეტი გაკეთდეს, მაგრამ ამას გარკვეული ფინანსური რესურსი სჭირდება. ერთბაშად ყველაფერი ვერ გაკეთდება, ბევრი რამის აწონ-დაწონა გვიწევს, რადგან პასუხისმგებლობა ჩვენზეა.
_ სისწრაფე გურულების მთავარი თვისებაა, დასაქმების მოლოდინში მყოფები კი, თანდათან უფრო გაღარიბდნენ. ამ ადამიანებს დროული დახმარება სჭირდებათ.
_ ჩვენ ეს კარგად ვიცით. ყველაზე დიდი დახმარება, რაც სახელმწიფოს შეუძლია მისცეს მოქალაქეს, ეს დასაქმებაა. ამიტომ გვინდა, სწრაფად მოვაწესრიგოთ ინფრასტრუქტურა. გურიაში ტურიზმის განვითარების კარგი პოტენციალია; ჩვენი მიზანია, ხელი შევუწყოთ მაღალმთიან რეგიონებს. გეგმების გახორციელებაში ლომის წილი უნდა მიუძღოდეს ადგილობრივ ხელისუფლებას, მეტი ინიციატივები გამოიჩინონ, არ იყვნენ მხოლოდ ცენტრზე დამოკიდებულები. ერთმანეთის დახმარებით უფრო სწრაფად გავახორციელებთ ჩვენს გეგმებს.
