რა არ ეკითხება გამგებელს

(გურია ნიუსი, ჩოხატაური) _ გასულ კვირას, ჩოხატაურის მუნიციპალიტეტის გამგებლის თანაშემწედ მამუკა სანიკიძე დაინიშნა. «გურია ნიუსი” ამის შესახებ გასული წლის ბოლოს წერდა. სანიკიძეს თანამდებობა ბოლო პერიოდში ჩატარებულ რამდენიმე არჩევნებში დამსახურებისთვის ერგო. ჩვენი წყაროს ინფორმაციით, მას რეკომენდაცია გურიაში აკაკი სტურუას ხელმძღვანელობით საარჩევნოდ ჩამოსულმა «დამრტყმელმა ძალამ” გაუწია (შეგახსენებთ, რომ ეს სტურუაა, რომელიც ადგილობრივი თვითმმართველობის არჩევნების დროს, მედიისადმი შეურაცხმყოფელი მიმართვებით გამოირჩეოდა, რისი გახმაურების შემდეგ “ცენტრმა” სასწრაფოდ მოაშორა გურიას).
გამგებელს მალე ახალი მოადგილეც ეყოლება სოფლის მეურნეობის დარგში, თუმცა მისი ვინაობა გია გიორგაძისთვის უცნობია:
_ ბატონო გია, ვინ იქნება თქვენი ახალი მოადგილე?
_ მე ვინ მეკითხება მის დანიშვნას?
_ ვის ეკითხება?
_ სოფლის მეურნეობის სამინისტროს. ტესტი უნდა ჩააბაროს და ბევრი კრიტერიუმი დააკმაყოფილოს. უცხო ენა უნდა იცოდეს, შემდეგ ამერიკაში ისწავლოს. არ არის გამორიცხული, რომ ლანჩხუთელი დანიშნონ ან ოზურგეთელი.
_ ჩოხატაურში არ გეგულებათ ისეთი კადრი, თქვენს მიერ ჩამოთვლილ მოთხოვნებს რომ აკმაყოფილებდეს?
_ არა, _ დააზუსტა გამგებელმა.