“გურია ნიუსმა” კალაძეს რამდენიმე შეკითხვით მიმართა.
_ შეხვედრის ადგილად აკეთი რატომ აირჩიეთ?
_ თემურ ჩხაიძე არის ლანჩხუთის მაჟორიტარობის კანდიდატი, ძალიან ღირსეული და პატიოსანი ადამიანი. სწორედ მის მხარდასაჭერად მოვედით. აკეთი კი იმიტომ ავირჩიეთ, რომ ვიცოდით აქაურების გულისტკივილის შესახებ _ როგორ წაართვა და დაუნგრია ხელისუფლებამ ხალხს უზარმაზარი ჩაის ფაბრიკა, რომლის ნანგრევებზეც ჩვენ ახლა ვიმყოფებით.
ჩვენთვის მთავარი პრიორიტეტია, ყველა იმ დანგრეული და გაპარტახებული ფაბრიკა-ქარხნების აღდგენა, რომლებიც წარსულში მნიშვნელოვან როლს ასრულებდნენ ქართული სოფლების ცხოვრებაში.
_ ხომ არ გეგმავთ ლანჩხუთის სხვა სოფლების მოსახლეობასთან შეხვედრებს?
_ დღეს ამას ალბათ ვერ მოვახერხებ ჩემი გადატვირთული გრაფიკის გამო. თქვენ იცით, რომ მე სამტრედიის მაჟორიტარობის კანდიდატი ვარ და მოსახლეობასთან ყოველდღიური კონტაქტი მაქვს.
_ ახლახან გავიგეთ, რომ ჭანჭათიდან გადმოსასვლელი გზა გადაკეტილია. რას იტყვით ამის შესახებ?
_ მეც გავიგე , რომ გზების შეკეთების მომიზეზებით რაიონის ხელმძღვანელობას ხრეში დაუყრია, მაგრამ თქვენ ხედავთ, რამდენი ხალხია მოსული და დარწმუნებული ვარ, რომ მსურველები კიდევ მოგვემატებიან. რაც არ უნდა ხელის შემშლელი პირობები იყოს, ჩვენ მაინც მოვახერხებთ ჩვენი სათქმელის მიტანას ამომრჩევლამდე.
_ ვრცელდება ინფორმაცია, რომ 19 სექტემბერს ბიძინა ივანიშვილი ლანჩხუთში ჩამოსვლას გეგმავს. აპირებთ ამ აქციაზე დასწრებას?
_ წინასწარ ვერაფერს გეტყვით. თუ საჭირო იქნება, აუცილებლად ჩამოვალ და დავდგები ყველა გურულის გვერდით! დღეს ყველა ჩვენთაგანის ერთად ყოფნა აუცილებელია.
“გურია ნისუთან” ინტერვიუში ლანჩხუთის მაჟორიტარობის კანდიდატმა თემურ ჩხაიძემ განაცხადა, რომ მისი კანდიდატურა ბიძინა ივანიშვილს სწორედ კახი კალაძემ შესთავაზა.
