წინასაარჩევნო ცვლილების მიუხედავად, საზოგადოებას კარგად ახსოვს, რომ პარკს, რომელიც ხელისუფლებამ მიითვისა, წლების განმავლობაში, ივანიშვილის საქველმოქმედო ორგანიზაცია “ატუ” აფინანსებდა.
დოკუმენტების თანახმად, ბიძინა ივანიშვილმა ოზურგეთის მუნიციპალიტეტში 2006-2012 წლებში, საქველმოქმედო საქმიანობაში, 68 960 482.68 ლარი დახარჯა. ყველაზე დიდი თანხა კი სწორედ “ციცინათელაზე” იხარჯებოდა.
“გურია პარკის” ამჟამინდელმა დირექტორმა, გურიის გუბერნატორის ყოფილმა მოადგილემ, ლაშა შაფაქიძემ ისიც კი არ იცის, როდის და რატომ შეუცვალეს სახელი “ციცინათელას”.
“გურია ნიუსის” კითხვაზე, როდის შეეცვალა სახელი აკვაპარკს და რატომ, ლაშა შაფაქიძემ განაცხადა, რომ არ ახსოვს.
ჩვენს შემდეგ კითხვაზე, _ კი მაგრამ, თქვენ ხომ “გურია პარკის” დირექტორი ბრძანდებით? მისი პასუხი კიდევ უფრო “კონკრეტული” გახდა: _ უკვე გიპასუხეთ, უკაცრავად, კარგად ბრძანდებოდეთ…
სახელშეცვლილი “გურია პარკის” ახალი ფოტოები რამაზ ნიკოლაიშვილის ოფიციალურ ფეისბუქზე დაიდო _ “გურია პარკი” რამაზ ნიკოლაიშვილმა თავის გუნდთან ერთად მოინახულა.
“რამაზ ნიკოლაიშვილმა პარკსა და მის მიმდებარე ტერიტორიაზე დამონტაჟებული ახალი კონსტრუქციები დაათვალიერა და პარკში გასართობად მისულ ადგილობრივ ახალგაზრდებს და ტურისტებს რეგიონში გასართობი ცენტრების განვითარებასთან დაკავშირებით საკუთარი ხედვა გააცნო.
“ერთიანი ნაციონალური მოძრაობის” ოზურგეთის მაჟორიტარობის კანდიდატის თქმით, ასეთი ტიპის პარკების არსებობა იზიდავს ტურისტებს და ზრდის რეგიონში შემოსავლებს, რაც ადგილობრივი მოსახლეობის დასაქმების გარანტიაა. ამჟამად “გურია პარკში” სეზონზე 150-მდე ადამიანია დასაქმებული.
აღნიშნული პარკი ივნისიდან ოქტომბრამდე ფუნქციონირებს. ადგილობრივმა ახალგაზრდებმა კანდიდატს სთხოვეს, რომ “გურია პარკის” მუშაობის სეზონი გაიზარდოს, რათა პარკში მისვლა და გართობა წლის სხვა დროსაც იყოს შესაძლებელი”, _ ნათქვამია რამაზ ნიკოლაიშვილის ოფიციალურ “ფეისბუქზე” გავრცელებულ განცხადებაში.
განსაკუთრებით საინტერესოა რამაზ ნიკოლაიშვილის განცხადების ის ნაწილი, რომელიც აკვაპარკის შემოსავლების ნაწილს ეხება, რადგან წლების განმავლობაში “ციცინათელა” მომგებიანი ობიექტი არასდროს ყოფილა.
ივანიშვილის დაფინანსებული ფონდიდან, ყველაზე დიდი თანხა _ 60 259 621 ლარი სწორედ “ციცინათელასთვის” იქნა გამოყოფილი. ამავე დოკუმენტების თანახმად, ოზურგეთის მუნიციპალიტეტის ყოფილმა გამგებელმა, გიორგი ტაკიძემ, “ციცინათელას” ატრაქციონების ნაწილების შესაკეთებლად, 2009 წელს, ივანიშვილის ფონდს, 22 000 ლარი თხოვა და მიიღო კიდეც.
ყოფილ და ამჟამინდელ ჩინოვნიკებს, მათ შორის გურიის გუბერნატორს ვალერი ჩიტაიშვილს, რომელიც “ნაციონალური მოძრაობის” ოზურგეთის მაჟორიტარობის კანდიდატის, რამაზ ნიკოლაიშვილის შტაბის უფროსია, საკუთარი თხოვნისა და სამადლობელი წერილები აღარ ახსოვთ.
2006 წლიდან 2011 წლის ჩათვლით, “ციცინათელა” არა თუ მოგებაზე იყო, როგორც ამბობენ, “თავსაც ვერ ირჩენდა” და მუდმივ დოტაციაზე იყო, ისევე, როგორც ბათუმის დელფინარიუმი, რომელსაც ყოველთვიურად, დოტაციის სახით, 300 000 ლარამდე ერიცხებოდა. ხარჯებს კი ბიძინა ივანიშვილის მიერ დაფინანსებული ფონდი იღებდა.
საქველმოქმედო ფონდ “ატუს” ხელმძღვანელი, კარლო ლეკვეიშვილი, “გურია ნიუსთან” საუბრისას ამბობს, რომ მხოლოდ დოტაციის სახით აკვაპარკს, ყოველწლიურად, 600 000-იდან 800 000 ლარამდე თანხას ურიცხავდნენ.
პარკის სახელის ცვლილებაში კი ის გრამატიკულ შეცდომებს ხედავს: “ჯერ ერთი, “გურია პარკი” გრამატიკულად არასწორია, გურიის პარკი “ციცინათელა” რომ დაერქმიათ, ამით რა დაშავდებოდა?”
შპს “მენეჯმენტ სერვისის” დირექტორი, ბესო დემეტრაშვილი, რომლის კომპანიასაც აკვაპარკი “ციცინათელა” მართვის უფლებით ჰქონდა გადაცემული, “გურია ნიუსთან” საუბრისას აცხადებს:
“პარკი მთლიანად ბატონმა ბიძინამ გააკეთა, მერე სახელმწიფოს გადასცა. შემდეგ იყო თხოვნა, რომ უჭირდათ პარკის შემოსავლებიდან მისი შენახვა და ჩვენ გამოვთქვით სურვილი, აგვეღო მმართველობაში და გამოგვეყო ინვესტიცია ერთი მილიონის ფარგლებში. საერთოდ, არ მესმის, სახელის შეცვლა რს ნიშნავდა. “გურია პარკი” ერქმევა თუ “ციცინათელა”, ყველამ იცის, რომ ბატონი ბიძინას გაკეთებულია იქ ყველაფერი.”
რაც შეეხება რამაზ ნიკოლაიშვილის განცხადებაში მოხსენიებულ “პარკში გასართობად მისულ ადგილობრივ ახალგაზრდებსა და ტურისტებს”, მათი უმრავლესობა ოზურგეთის “ნაციონალური მოძრაობის” აქტივისტები და მხარდამჭერები იყვნენ, რომლებმაც, სამახსოვრო ფოტოც კი გადაიღეს “გურია პარკში” მოწყობილი კულტღონისძიების აღსანიშნავად.
