ჩვენი წყაროს ინფორმაციით, საქართველოს ფეხბურთის ფედერაცია ოზურგეთის ცენტრალური სტადიონის რეკონსტრუქციას და მის თანამედროვე დონეზე გაკეთებას აპირებს. განახლებული არენა 5-ათასიანი იქნება, დაიდგმება პლასტმასის პერსონალური სკამები, გასახდელები ლოჟის გვერდით გაკეთდება, მოხდება დასავლეთ ტრიბუნის სრული განახლება.
ფეხბურთის ფედერაციის პრეზიდენტად გახდომისთანავე, ზვიად სიჭინავაც აცხადებდა, რომ პრიორიტეტი მისთვის ლანჩხუთის “გურია” იყო. ამასწინათ, რეგიონში ვიზიტისას, მან გრიგოლეთის ბაზის რეკონსტრუქციაზე ილაპარაკა და ლანჩხუთის მთავარი არენისთვის 4 ათასი ინდივიდუალური სკამის ჩუქების დაპირებაც გასცა.
ამის შემდეგ, ფეხბურთის ფედერაციის მიერ ოზურგეთის არენის გარემონტების გადაწყვეტილებამ გურიის პოლიტიკურ-საფეხბურთო კულუარებში ბევრი კითხვა და ინტრიგის საფუძვლები წარმოშვა.
რატომ შეცვალა პრიორიტეტი სიჭინავამ? რას უნდა ველოდეთ ლანჩხუთისა და ოზურგეთის საფეხბურთო და უფრო მეტად პოლიტიკურ ურთიერთობებში? იყო თუ არა ეს გურიის ფეხბურთის ფედერაციის თავკაცზე “დარტყმა”? თუ ვიწრო პროვინციული პრინციპებით ვიხელმძღვანელებთ, ალბათ, იყო _ კახა ებრალიძე ლანჩხუთელია. თუმცა ამ ვერსიას არსებობას სერიოზულად აყენებს ეჭვქვეშ ის ფაქტი, რომ ებრალიძე სიჭინავას კარზე მიღებული პერსონაა. ამასთან, ზვიად სიჭინავას ფორმაციის ფედერაციის პირობებში მოხდა პირველად, რომ გურიის საფეხბურთო ოჯახი ერთიანია _ სწორედ ებრალიძის დამსახურებაა წლების მანძილზე არსებული რაიონული დაპირისპირების მოგვარება, რასაც ორივე მხარე ღიად აღნიშნავს.
კიდევ ერთი შესაძლო ვარიანტი შეიძლება ლანჩხუთის გამგებელზე “დარტყმა” იყოს _ ცნობილი ფაქტია, რომ გია გოგუაძე არა მხოლოდ გურიაში, ქვეყნის მასშტაბითაც ფეხბურთის მოყვარულ გამგებლად მიიჩნევა. თუ ეს ვერსია სიმართლეა, მაშინ არ არის გამორიცხული, ეს იყოს გუბერნატორის “შურისძიება” “საქართველოში ყველაზე მაგარ გამგებელზე”, რომლის “საგუბერნატორო სუნთქვას”, მრავალი უარყოფის მიუხედავად, სამხარეო ადმინისტრაციის დერეფნებში დღესაც გრძნობენ.
ჩვენ კომენტარისთვის გურიის ფეხბურთის ფედერაციის თავკაც კახა ებრალიძეს დავუკავშირდით:
_ ოზურგეთში ახალი სტადიონი კეთდება. რაოდენ არაკორექტულადაც არ უნდა ჟღერდეს, ამ კითხვას ლანჩხუთის საფეხბურთო სამყარო მაინც დაგისვამს _ რატომ ოზურგეთში და არა პრიორიტეტად მიჩნეულ ლანჩხუთში?
_ ოზურგეთის რაიონის ხელმძღვანელებმა ზვიად სიჭინავას თხოვნით მიმართეს, ფედერაცია დახმარებოდა სტადიონის გაკეთებაში. ფედერაციის თავკაცმა დამავალა დეტალებში გარკვევა. კონკრეტულად აინტერესებდა, სტადიონის გაკეთების შემთხვევაში, რა დაფინანსება იქნებოდა მისი შენახვისთვის საჭირო. შევხვდი ოზურგეთის გამგებელ გია ტაკიძეს. მან მითხრა, რომ ამ ეტაპზე სტადიონის შენახვისთვის 46 ათასი ლარია ბიუჯეტში გათვალისწინებული და გამოთქვა მზადყოფნა, სტადიონის გაკეთების შემთხვევაში, თანხას მნიშვნელოვნად გაზრდიან. ამასთან, გაფორმდება ხელშეკრულება ფედერაციასა და მუნიციპალიტეტს შორის, რომელიც გარანტი იქნება იმის, რომ გარემონტებული არენა უპატრონოდ არ დარჩება.
ოზურგეთში სტადიონის გაკეთება გურული ფეხბურთისთვის მნიშვნელოვანი ფაქტია და ფეხბურთის ქომაგებს მივულოცავ ამას. ჩვენ წინ კიდევ ბევრი კარგი პროექტი გვაქვს _ ბატონ ზვიად სიჭინავა ლანჩხუთის არენისთვის 4 ათასი ინდივიდუალური სკამის გადმოცემას დაგვპირდა. ფედერაცია აპირებს გრიგოლეთის ბაზის რეკონსტრუქციასაც, რაც “გურიასთან” ერთად მთლიანად ქართულ ფეხბურთს წაადგება. ყველაფერს გავაკეთებთ იმისთვის, რომ უყურადღებოდ არც ჩოხატაური დაგვრჩეს.
ჩვენ კომენტარისთვის კვიპროსში მყოფ საქართველოს ფეხბურთის ფედერაციის პრეზიდენტ ზვიად სიჭინავასაც დავუკავშირდით:
_ ბატონო ზვიად, გურიაში ნამდვილად კარგ პროექტებს ახორციელებთ _ რეგიონული ოფისი ლანჩხუთში, ახლა სტადიონი ოზურგეთში…
_ დიახ, ჩვენ გურიას განსაკუთრებულ ყურადღებას იმიტომ ვაქცევთ, რომ ეს რეგიონი აქამდე მივიწყებული იყო.
_ კონკრეტულად ოზურგეთის სტადიონზე გვითხარით _ რა ტევადობის არენა კეთდება და დაფინანსება რამხელა იქნება?
_ ეს იქნება კოხტა სტადიონი, 3 ათასი ინდივიდუალური სკამით. ვმუშაობთ, რომ სტადიონი გადავიდეს ჩვენი რეგიონული ფედერაციის დაქვემდებარებაში. რაც შეეხება ფინანსებს, ხარჯთაღრიცხვა ჯერ არ გაკეთებულა.
_ თქვენი წინამორბედი გურიის რეგიონს საერთოდ არ ცნობდა, ფედერაციის მანამდელი თავკაცი კი მხოლოდ “გურიას” ეხმარებოდა. თქვენც ლანჩხუთურ კლუბს თვლიდით გურიაში პრიორიტეტად. ახლა სიტუაცია იცვლება?
_ არა, რატომ იცვლება? “გურია” რჩება პრიორიტეტად! თუმცა ეს არ ნიშნავს, რომ მხოლოდ პრიორიტეტებით შემოვიფარგლოთ _ სტადიონები და ზოგადად ინფრასტრუქტურა უნდა განვითარდეს ოზურგეთშიც, ჭიათურაშიც და ყველგან.
_ ბატონო ზვიად, გრიგოლეთის საწვრთნელ ბაზასთან დაკავშირებით რაიმე სიახლე ხომ არ არის?
_ ჩვენ ამ საკითხზე მოლაპარაკებას გურიის გუბერნატორთან გავმართავთ და სავარაუდოდ, ობიექტს ავიღებთ.
