“გურია ნიუსის” 13 იანვრის ნომერში გამოქვეყნებულ სტატიაში _ “უდედოდ გაზრდილი მარიამისთვის ვებღაუჭები სიცოცხლეს”, ჟურნალისტის მიერ დასმულ შეკითხვას, არის თუ არა მარიამ ტოროტაძის ოჯახი სოციალურად დაუცველთა სიაში, ოზურგეთის მუნიციპალიტეტის გამგებელმა გიორგი ტაკიძემ უპასუხა: “სამწუხაროდ, სიაში მარიამი არ არის”. იგივე დაადასტურა მუნიციპალიტეტის გამგეობის შრომის, საზოგადოებრივი ჯანმრთელობის და სოციალური დაცვის საკითხებში ლტოლვილთა და იძულებით გადაადგილებულ პირთა საქმიანობის სამსახურის უფროსმა ნათია ვაშალომიძემაც _ იგი გვარწმუნებდა, რომ მარიამ ტოროტაძე არდადეგებზე თბილისში მამიდასთან იმყოფებოდა და ამდენად, სოციალური დახმარება არ ესაჭიროებოდა.
ზემოთ ხსენებულ წერილს გამოეხმაურა არასამთავრობო ორგანიზაცია “ახალგაზრდა პედაგოგთა კავშირის” ხელმძღვანელი, რომელმაც საწინააღმდეგო რამ გვითხრა:
_ ნამდვილად ვიცი, რომ მარიამის ოჯახი სოციალურად დაუცველ ოჯახების სიაშია. ეს პროექტი ჩვენმა ორგანიზაციამ შესთავაზა ადგილობრივ ხელისუფლებას. ამ ოჯახისთვის მუნიციპალიტეტის გამგეობას დასახმარებელი თანხა აქვს გამოყოფილი.
ამ გამოხმაურების შემდეგ, “გურია ნიუსი” ისევ ოზურგეთის მუნიციპალიტეტის გამგეობის სოციალური სამსახურის უფროსს ნათია ვაშალომიძეს დაუკავშირდა. გადამოწმების შემდეგ დაზუსტდა, რომ მარიამ ტოროტაძის ოჯახი სიაში მართლაც იყო, მაგრამ არა მარიამის, არამედ მამის _ მილორსი ტოროტაძის სახელით. ამ ოჯახზე, საცხოვრებელი პირობების გაუმჯობესების მიზნით, საყოფაცხოვრებო მასალაა გამოყოფილი:
_ მოძიების დროს მექანიკურად გამოგვრჩა მისი გვარი. ტოროტაძეების ოჯახი სოციალურად დაუცველ ოჯახთა სიაშია და კუთვნილ დახმარებას მიიღებს. ამის შესახებ ვაცნობებ მარიამის ბებიას, ქალბატონ გიულის, _ გვითხრა ნათია ვაშალომიძემ.
