მიმდინარე წელს, ოზურგეთის მუნიციპალიტეტის საკრებულომ, მუნიციპალური ტრანსპორტის ხარჯი 5 000 ლარით განსაზღვრა. ოზურგეთის მუნიციპალიტეტის ტერიტორიაზე ხსენებული ტრანსპორტი ხუთ სოფელში მოძრაობს.
დიდთოვლობამ და ძლიერმა ქარმა ელექტროგადამცემი ხაზები დააზიანა, რის გამო შეფერხდა მუნიციპალური ტრანსპორტის მოძრაობაც. როგორც მუნიციპალიტეტის საკრებულოს ეკონომიკის, ინფრასტრუქტურისა და ურბანიზაციის კომისიის თავმჯდომარემ თამაზ სალუქვაძემ გვითხრა, შუქი არ მიეწოდებოდა სოფელ დვაბზუს აირგასამართ სადგურს, ამიტომ ვერ მოხერხდა აირის ჩატვირთვა ავტობუსებში: _ ჩვენ სხვა სახის ტრანსპორტით ჩავანაცვლეთ მუნიციპალური ტრანსპორტი, რომ მოსახლეობას ხელი არ შეშლოდა გადაადგილებაში. ვცდილობთ, ეს პრობლემები მოვაგვაროთ, _ გვითხრა მან.
_ როგორც შევიტყვეთ, სხვა პრობლემებიც აქვს მუნიციპალურ ტრანსპორტს _ დროებით შეჩერებულია საქალაქო ტრანსპორტის მოძრაობა, აღარ მუშაობს შპს “ელტრანსერვისის” ორი ავტობუსიც.
_ თქვენ “ივეკოს” ფირმის ავტობუსებზე მეუბნებით. ეს არ არის მუნიციპალური ტრანსპორტი, მას არ აფინანსებს ადგილობრივი ხელისუფლება და აქვს გარკვეულწილად პრობლემები. რამდენადაც ვიცი, ეს ავტობუსები დაზიანებულია და უახლოეს პერიოდში უნდა ამუშავდეს. ამაზე თვით ამ ორგანიზაციის ხელმძღვანელი ზრუნავს. ეს ავტობუსები ეკონომიკის სამინისტროს საკუთრებას წარმოადგენს და მუშაობს ჩვენი დაკვეთით. თუ ჩვენს მოთხოვნებს ვერ შეასრულებს, მოვხსნით და ახალ ტენდერს გამოვაცხადებთ. რამდენადაც ვიცი, ამ ორი ავტობუსის ნაცვლად, ქალაქის ტერიტორიაზე დადის მიკროავტობუსები. ასე თუ ისე, ტრანსპორტის მოძრაობა არ არის შეზღუდული.
_ გამოდის, რომ არცთუ ისე კარგად მუშაობს თქვენი დაქირავებული ფირმა.
_ გვპირდება, რომ გამოსწორდება მდგომარეობა და მოაგვარებენ პრობლემებს. თუ დაპირებას ვერ შეასრულებს, როგორც წესია, ისე მოვიქცევით.
_ პრობლემებია მუნიციპალური ტრანსპორტის მუშაობაშიც…
_ რაც შეეხება მუნიციპალურ ტრანსპორტს, ხუთი ავტობუსი გამართულად მუშაობს. არ დაგიმალავთ _ არის გარკვეული პრობლემები. წელს მუნიციპალური ტრანსპორტის ხარჯისთვის 5 000 ლარი გამოიყო და ეს ფული მთლიანად დაიხარჯა საბურავების შეძენაში _ სხვა ხარჯი წლის განმავლობაში მუნიციპალურ ტრანსპორტს აღარ ექნება. დავალიანება აქვს 1 800 ლარი, რომელსაც ალბათ, მომავალ დაფინანსებაზე დაფარავს. ამდენად, მან საკუთარი შემოსავლებით უნდა იარსებოს, ანუ აუცილებელია ყოველდღიური გეგმიური თანხის შეტანა, რაც ძალიან ჭირს, გადახდისუუნარობის გამო. საკმარისი შემოსავალი ავტობუსებს ამ ეტაპზე არ აქვთ, რომ მძღოლების და სამსახურის უფროსის ხელფასი აანაზღაუროს. ხელფასს ვინღა დაეძებს _ მთავარია ტრანსპორტმა იმუშაოს და მოსახლეობას მოემსახუროს. რამდენადაც ვიცი, მხარის პირველ პირთან შეთანხმებით მოხდება ამ პრობლემის გადაწყვეტა, ტრანსპორტი აუცილებლად დარჩება და ადმინისტრაცია, ალბათ, უხელფასოდ იმუშავებს.
“გურია ნიუსი” შპს “ელტრანსერვისის” დირექტორს ალეკო ბურჭულაძეს შეხვდა. ეს ფირმა ოზურგეთის ქალაქის ტერიტორიას ემსახურება. ბურჭულაძის თქმით, უკვე მეექვსე წელია, რაც თურქული ფირმის “ივეკოს” ავტობუსები შეიძინა ეკონომიკის სამინისტრომ: _ იგი ეკონომიურია და პატარა ქალაქისთვის განკუთვნილი ტრანსპორტია. პრობლემას წარმოადგენს მისი შეკეთება, რადგან საქართველოში ამ მანქანის ნაწილები არ იყიდება. თუმცა, მუნიციპალურ ტრანსპორტზე ნაკლები პრობლემები, არც სახელმწიფო შპს-ს აქვს.
_ გავრცელდა ინფორმაცია, რომ იყიდება ის ორი ავტობუსი, ეკონომიკის სამინისტრომ ტროლეიბუსების გაყიდვის ხარჯზე რომ შეიძინა და მის ნაცვლად მიკროავტობუსები იმუშავებენ.
_ მე ამ კითხვაზე პასუხს ვერ გაგცემთ, რადგან ეს ჩემი კომპეტენცია არ არის. ამჟამად ამ ავტობუსების პატრონი ეკონომიკის სამინისტროა და მისი გადასაწყვეტია ავტობუსების გაყიდვა.
_ გაქვთ თუ არა დავალიანება?
_ მწირი შემოსავლების გამო, დავალიანება გვაქვს. რამდენადაც ვიცი, სხვა გადასახადებიც დაეკისრა ფირმას _ საუბარია, ქონების გადასახადზე. ვფიქრობ, რომ პრობლემა მოგვარდება და შეფერხება გამოსწორდება. მოსახლეობას ვპირდებით, უახლოეს პერიოდში აღდგება ავტობუსების მოძრაობა.
