(გურია ნიუსი, ოზურგეთი) _ “ადგილობრივი თვითმმართველობის შესახებ ორგანული კანონის” თანახმად, ადგილობრივი თვითმმართველობა არის საქართველოს მოქალაქეთა უფლება და შესაძლებლობა, ადგილობრივი თვითმმართველობის ორგანოების მეშვეობით, საქართველოს კანონმდებლობის შესაბამისად მოაწესრიგონ და მართონ ადგილობრივი მნიშვნელობის საკითხები საკუთარი პასუხისმგებლობით და ადგილობრივი მოსახლეობის ინტერესების შესაბამისად.
თვითმმართველი ერთეულის კომპეტენციის ფარგლებში, სოფლის რწმუნებული საქართველოს კანონმდებლობითა და დებულებით დადგენილი წესით ორგანიზებას უწევს ადმინისტრაციული ერთეულის მოსახლეობის გამოკითხვის და სახალხო განხილვების ჩატარებას; ამასთან, ახორციელებს ბიუჯეტის პროექტთან დაკავშირებით მოსახლეობის შენიშვნებისა და წინადადებების სისტემატიზაციას და მუნიციპალიტეტის გამგებლისთვის მათ მიწოდებას.
თვითმმართველი ერთეული ვალდებულია შეისწავლოს მოსახლეობის აზრი და მათი აზრის გათვალისწინებით შეიმუშაოს სოფელში, თემში, დაბაში, ქალაქში გასახორციელებელი სოფლის პროექტები. “საქართველოს დემოკრატიული განვითარების კავშირის” მიერ ოზურგეთის მუნიციპალიტეტის სოფელ ჭანიეთში მოსახლეობის გამოკითხვა-ანკეტირება იმის შესაფასებლად ჩატარდა, თუ რა შედეგები მივიღეთ მუნიციპალიტეტის მხრიდან გახორციელებული საქმიანობების შედეგად და მომავალში რა პრობლემების წინაშე დგანან სოფლის მცხოვრებლები. გამოკითხვაში მონაწილეობა 99-მა რესპონდენტმა, ანუ ჭანიეთის მოსახლეობის 11% მიიღო.
კვლევა შემდეგი საკითხების გარკვევას მოიცავდა: მუნიციპალური მომსახურების შეფასება; ადგილობრივი თვითმმართველობის წარმომადგენლებთან საზოგადოების ურთიერთობის არსებობა და სოფლად მცხოვრები მოსახლეობის საყოფაცხოვრებო პრობლემების გამოვლენა.
კვლევისას გამოყენებული იქნა “პირისპირ ინტერივიუს” მეთოდი. შერჩევის ტიპის არჩევა განპირობებული იყო კვლევის ამოცანის თავისებურებით. იმის გამო, რომ კვლევის საკითხების ნაწილი მნიშვნელოვნადაა დამოკიდებული რესპონდენტის საცხოვრებელ ადგილზე. კვლევისას გამოყენებული იქნა მრავალსაფეხუროვანი ტერიტორიული შერჩევის ტიპი. შერჩევის საფუძვლად გამოყენებული იქნა სოფლის/თემის რუკები. მოსახლეობის გამოკითხვის შედეგად, გასულ წელს მწვავედ იდგა შემდეგი პრობლემები: გაზიფიცირება, გარე განათება, სოფლის შიდა გზები, ნაგვის გატანა, გართობის კერების მოუწესრიგებლობა, წყალმომარაგების მოძველებული სისტემა. ასევე, მნიშვნელოვანია სოფლის მოსახლეობის ინდივიდუალური გამრიცხველიანება, კანალიზაციის ქსელის, სკოლაში არსებული გარემოსა და სოფლის სკვერის მოწესრიგება. მოსახლეობის ნაწილი მიიჩნევს, რომ სოფლებში მდგომარეობა დადებითისკენ შეიცვალა, ზოგი ფიქრობს, რომ ადგილობრივი ხელისუფლების საქმიანობა უფრო ნეგატიურია, ვიდრე პოზიტიური.
აღსანიშნავია ის გარემოება, რომ მოსახლეობასა და ადგილობრივ ხელისუფლებას შორის ინფორმაციის გაცვლა მნიშვნელოვნად შეზღუდულია. კითხვაზე, არიან თუ არა ინფორმირებულნი ადგილობრივი ბიუჯეტის შესახებ, 84%-ს უარყოფითად პასუხობს. 10% მიიჩნევს, რომ სრულ ინფორმაციას ფლობს. მოყვანილი ციფრები მიანიშნებს, რომ მოსახლეობა არაინფორმირებულია ადგილობრივი ბიუჯეტის შესახებ, მათი ინფორმირება კი სოფლის რწმუნებულისა და ადგილობრივი ხელისუფლების პირდაპირ მოვალეობას წარმოადგენს.
მუნიციპალიტეტის აღმასრულებელი ხელისუფლების მხრიდან მოსახლეობასთან კონტაქტების ნაკლებობის შედეგად დადგა ის გარემოება, რომ მოსახლეობის მხოლოდ 17% მიიჩნევს, რომ ადგილობრივმა ბიუჯეტმა საგრძნობლად გამოასწორა მდგომარეობა თემში. აღნიშნულის საპირისპიროდ მოსახლეობის 83 პროცენტი მიიჩნევს, რომ ადგილობრივ ბიუჯეტს თემის მდგომარეობაზე გავლენა არ მოუხდენია, უფრო კონკრეტულად კითხვაზე “ადგილობრივმა ბიუჯეტმა გამოასწორა მდგომარეობა? პასუხი შემდეგნაირად გადანაწილდა: 19% თვლის, რომ კითხვაზე პასუხის გაცემა უჭირს, 37% – არავითარი გავლენა არ მოუხდენია, ხოლო 27%-ს არ შეუმჩნევია ბიუჯეტის გავლენა ადგილობრივ ინფრასტრუქტურის გაუმჯობესებაზე.
პირველი რიგის მოსაგვარებელ პრობლემას სოფლის შიდა გზები და სოფლის გაზიფიკაცია წარმოადგენს. პრობლემაა წყალმომარაგების გაუმჯობესებაც, ისევე, როგორც სასაფლაოს კეთილმოწყობა და სკოლის შენობის შეკეთება.
გამოკითხვის შედეგების პრეზენტაცია, 8 თებერვალს გამართულ სოფლის კრებაზე შედგა. რომელსაც 30 ადამიანი ესწრებოდა. აქედან პირველ რიგში გადასაჭრელ პრობლემად გაზიფიცირებას, შიდა გზებს, ინდივიდუალურ გამრიცხველიანებას, სოფლის ცენტრის კეთილმოწყობას, გარე განათებას, სკოლის ინფრასტრუქტურის მოწესრიგებასა და წყლის პრობლემას მიიჩნევენ. კრებაზე გამოკვეთილი და რანჟირებული პრობლემები ოზურგეთის მუნიციპალიტეტის ხელისუფლებას “სოფლის მხარდაჭერის პროგრამაში” მოსახლეობის ინტერესების გათვალისწინებისთვის, წარედგინება.
სტატია მომზადებულია ევრაზიის თანამშრომლობის ფონდის მიერ დაფინანსებული პროექტის “სახალხო ინიციატივები დემოკრატიისთვის” ფარგლებში
