“გუშინ, 2012 წლის 22 სექტემბერს სახალხო დამცველის წარმომადგენლებმა კიდევ ერთხელ მოინახულეს რუსთავის N6 დაწესებულებაში განთავსებული მსჯავრდებული გოდერძი კიკნაძე. გ.კიკნაძემ ამჯერად უკვე გამოთქვა მათთან საუბრის სურვილი და გადასცა თავისი ხელით დაწერილი ახსნა-განმარტება, სადაც იგი საუბრობს ზეწოლის იმ ფაქტებზე, რომელიც მის მიმართ სასჯელაღსრულების N6 დაწესებულებაში გახორციელდა.
მსჯავრდებულის განცხადებით, მის მიმართ განხორციელებული მოპყრობის მიზანი იყო, 2001 წელს ყოფილ N5 სასჯელაღსრულების დაწესებულებაში მომხდარ თ.დ.-ს მკვლელობის გარემოებებზე მის ხელთ არსებული ინფორმაციის განსაჯაროებისაგან თავის შეკავება.
გოდერძი კიკნაძის განცხადებით, მან შიმშილობა მის მიმართ არასათანადო მოპყრობის შეწყვეტის მოთხოვნით 19 სექტემბერს დაიწყო. დღეისათვის მსჯავრდებული მოითხოვს მთავარი პროკურატურის წარმომადგენელთან შეხვედრას, რომელსაც ჩვენებას მისცემს ზემოაღნიშნულ საქმეზე.
საქართველოს სახალხო დამცველის აპარატი კიკნაძის ახსნა-განმარტებას ორშაბათს, 24 სექტემბერს, გადასცემს საქართველოს მთავარ პროკურატურას შესაბამისი რეაგირებისთვის.
მონახულების მომენტისთვის მსჯავრდებულს აღენიშნებოდა შემდეგი დაზიანებები: მოყვითალო-მოშავო ფერის სისხლნაჟღენთები და შეშუპებები ორივე თვალბუდის არეში, მარცხენა და მარჯვენა ყვრიმალის და საფეთქლის არეში, ასევე, შუბლზე _ მოყვითალო ფერის სისხლნაჟღენთი. ყელის არეში, მარცხენა მხარეს, მსჯავრდებულს აღენიშნება მცირე ზომის ჰიპერემიული უბანი, ორივე ქვედა კიდურზე – რამდენიმე ნაჭდევი, დაფარული ფუფხით. 21 სექტემბერს, მსჯავრდებულ გოდერძი კიკნაძის სამედიცინო ბარათში გაკეთებული ნევროპათოლოგის კონსულტაციის ჩანაწერის მიხედვით, მას აღენიშნება მსუბუქი ხარისხის თავის ტვინის შერყევა.
მსჯავრდებულის განმარტებით, უკანასკნელი დღეების განმავლობაში იგი დღეში ორჯერ ხვდებოდა დედას. იგი ასევე მოინახულეს მისმა ადვოკატებმა და მოძღვარმა.
გოდერძი კიკნაძის ჯანმრთელობის მდგომარეობიდან გამომდინარე, სახალხო დამცველის აპარატი მოუწოდებს სასჯელაღსრულების, პრობაციის და იურიდიული დახმარების საკითხთა სამინისტროს უზრუნველყოს სათანადო ზომების მიღება,” _ ნათქვამია განცხადებაში.
აღსანიშნავია, რომ პატიმრის დედა მერი კიკნაძე, უკვე რამდენიმე დღეა, რუსთავის #6 დაწესებულებასთან შიმშილობს და ციხის თანამშრომლების მიერ მისი შვილის ცემის ფაქტს აპროტესტებს.
ნაცემი პატიმარი მისმა ადვოკატმაც მოინახულა, თუმცა მან ჟურნალისტებთან ცემის ფაქტი უარყო და პატიმარზე გახორციელებულ ფსიქოლოგიურ ზეწოლაზე ისაუბრა.
