(გურია ნიუსი, ოზურგეთი) _ თვითმმართველი ერთეულის კომპეტენციის ფარგლებში, რწმუნებული საქართველოს კანონმდებლობითა და დებულებით დადგენილი წესით, ორგანიზებას უწევს ადმინისტრაციული ერთეულის მოსახლეობის გამოკითხვას და სახალხო განხილვების ჩატარებას; ამასთანავე, ბიუჯეტის პროექტთან დაკავშირებით, მოსახლეობის შენიშვნებისა და წინადადებების სისტემატიზაციას ახორციელებს, ასევე უნდა უზრუნველყოს გამგებლისთვის მათი მიწოდება.
თვითმმართველი ერთეული ვალდებულია, შეისწავლოს მოსახლეობის აზრი და მათი აზრის გათვალისწინებით შეიმუშაოს სოფელში, თემში, დაბაში, ქალაქში გასახორციელებელი სოფლის პროექტები. აღვნიშნავთ, რომ მსგავს გამოკითხვებს მუნიციპალიტეტის რწმუნებულები ბოლო პერიოდში აწარმოებენ, მაგრამ მოსახლეობის მხრიდან გამოითქვა გარკვეული პრეტენზიები, _ ამბობენ არასამთავრობო ორგანიზაციაში.
“საქართველოს დემოკრატიული განვითარების კავშირის” მიერ მოსახლეობის გამოკითხვა-ანკეტირება ოზურგეთის მუნიციპალიტეტის სოფელ მაკვანეთში ჩატარდა. ამის მიზანი მუნიციპალიტეტის მხრიდან გახორციელებული საქმიანობების შეფასება იყო. გამოკითხვაში მონაწილეობა 131-მა რესპონდენტმა მიიღო ანუ ამ სოფელში მცხოვრები მოსახლეობის 6%-მა.
კვლევისას გამოყენებული იქნა “პირისპირ ინტერვიუს” მეთოდი. შერჩევის ტიპის არჩევა განპირობებული იყო კვლევის ამოცანის თავისებურებით. იმის გამო, რომ კვლევის საკითხების ნაწილი მნიშვნელოვნადაა დამოკიდებული რესპონდენტის საცხოვრებელ ადგილზე. კვლევისას გამოყენებული იქნა მრავალსაფეხუროვანი ტერიტორიული შერჩევის ტიპი. შერჩევის საფუძვლად გამოყენებული იქნა სოფლის/თემის რუკები.
მოსახლეობის გამოკითხვის შედეგად, კითხვაზე _ “გასულ წელს იდგა მწვავედ შემდეგი პრობლემები,” მოსახლეობის უმრავლესობამ დაასახელა: ბუნებრივი აირის ქსელის უქონლობა, საზოგადოებრივი ტრანსპორტის მომსახურება, სოფლის შიდა გზები, გარე განათება, წყალმომარაგების მოძველებული სისტემა, ნაგვის გატანა. ასევე, მნიშვნელოვანია სკოლაში არსებული გარემოსა და ბაგა-ბაღის მდგომარეობის გაუმჯობესება.
2010 წელს, მუნიციპალიტეტის მიერ, ტერიტორიულ ერთეულებში გახორციელებული საქმიანობების მიმართ, მთლიანად თემის, მოსახლეობის აზრი არაერთგვაროვანია. ზოგიერთის აზრით, სოფლებში მდგომარეობა დადებითისკენ შეიცვალა, ზოგი კი მიიჩნევს, რომ უფრო ნეგატიურია ადგილობრივი ხელისუფლების საქმიანობა, ვიდრე _ პოზიტიური. აღნიშნულს ამყარებს გამოკითხვის შედეგები, რომელიც ოზურგეთის მუნიციპალიტეტის მაკვანეთის თემის მოსახლეობაში ჩატარდა.
კითხვაზე -“შეიმჩნევა თუ არა მიმდინარე წელს ცვლილებები”, შედეგები შემდეგია: მოსახლეობის აზრი რადიკალურად ურთიერთსაწინააღმდეგოა. თუ ერთი ნაწილი დადებითად აფასებს ცვლილებებს, მეორე ნაწილი ნეგატიურ შეფასებას აძლევს. განსაკუთრებულად აღსანიშნავია გაუარესებული მომსახურება წყალმომარაგების, გაზიფიცირების და სოფლის შიდა გზების მდგომარეობის მხრივ.
მოსახლეობა, ასევე მწვავედ აღიქვამს ბაგა-ბაღისა და გართობის კერების მდგომარეობის გაუარესებას.
მოსახლეობის ინფორმირება სოფლის რწმუნებულისა და ადგილობრივი ხელისუფლების პირდაპირ მოვალეობას წარმოადგენს. მოსახლეობამ ზუსტად არ იცის, სოფელში, სად და ვისგან უნდა მიიღოს ბიუჯეტის შესახებ ინფორმაცია, რაც ისევ და ისევ მუნიციპალიტეტის ხელისუფლების დაბალი აქტიურობის შედეგია.
მუნიციპალიტეტის აღმასრულებელი ხელისუფლების მხრიდან მოსახლეობასთან კონტაქტების ნაკლებობის შედეგად, დადგა ის გარემოება, რომ მოსახლეობის მხოლოდ 14% მიიჩნევს, რომ ადგილობრივმა ბიუჯეტმა საგრძნობლად გამოასწორა მდგომარეობა თემში. აღნიშნულის საპირისპიროდ, მოსახლეობის 86 პროცენტი მიიჩნევს _ ადგილობრივ ბიუჯეტს თემის მდგომარეობაზე გავლენა არ მოუხდენია, უფრო კონკრეტულად, კითხვაზე “ადგილობრივმა ბიუჯეტმა გამოასწორა მდგომარეობა? ” პასუხი შემდეგნაირად გადანაწილდა: 41% თვლის, რომ კითხვაზე პასუხის გაცემა უჭირს, 14% _ არავითარი გავლენა არ მოუხდენია, ხოლო 31%-ს არ შეუმჩნევია ბიუჯეტის გავლენა ადგილობრივ ინფრასტრუქტურის გაუმჯობესებაზე.
შეკითხვაზე _ “თქვენ რომ სოფლის ხელმძღვანელი იყოთ, სოფლისთვის რომელ მნიშვნელოვან პრობლემას მოაგვარებდით პირველ რიგში?”, უმრავლესობამ სოფლის გაზიფიკაცია მიიჩნია, შემდეგი პრიორიტეტია შიდა გზები, შემდეგ პოზიციებს იკავებენ საზოგადოებრივი ტრანსპორტის მომსახურების სიხშირე, სოციალური დახმარებები და ა.შ.
პრობლემათა პირველი ხუთეული შემდეგნაირად იქნა განსაზღვრული: სოფლის გაზიფიკაცია; სოფლის შიდა გზების მოწესრიგება; საზოგადოებრივი ტრანსპორტის მომსახურების გაუმჯობესება; სანაგვე მეურნეობის მოწესრიგება; წყალმომარაგების გაუმჯობესება.
აღნიშნული პრობლემებისა და ანკეტირების შედეგების გაცნობის მიზნით, აღნიშნული სოფლის ადმინისტრაციულ შენობაში სოფლის კრება მოეწყო, რომელსაც მოსახლეობასთან ერთად, ამავე სოფლის მაჟორიტარი დეპუტატი ზურაბ ჭანუყვაძე და სოფლის რწმუნებული მერაბ ვასაძე ესწრებოდნენ.
როგორც სოფლის კრებაზე გამოიკვეთა, პრობლემათა პირველი ხუთეულის გადაჭრა გამოასწორებს მაკვანეთის თემის მოსახლეობის საცხოვრებელი გარემოს მდგომარეობას. ასევე, რადიკალურად შეცვლის მოსახლეობის განწყობას ადგილობრივი ხელისუფლების მიმართ.
სტატია მომზადებულია ევრაზიის თანამშრომლობის ფონდის მიერ დაფინანსებული პროექტის “სახალხო ინიციატივები დემოკრატიისთვის” ფარგლებში
