არც ქვაბღის საარჩევნო უბანზე არ იყო გამოკრული გადასატანი ყუთის სია, ხოლო საარჩევნო უბნის ეზოში ნაციონალური მოძრაობის კანდიდატის პლაკატი იყო გამოკრული.
ნაბეღლავის საუბნო საარჩევნო კომისიაში "ნაციონალური მოძრაობის" მაისურიანი ახალგაზრდა იმყოფებოდა, თუმცა, კამერის გამოჩენისთანავე დაიმალა. გადასატანი ყუთის სია აქაც არ იყო გამოკრული; კომისიის თავმჯდომარეს ლია დოლიძეს, რომელიც საბავშვო ბაღის დირექტორია, სიები, დოკუმენტები, კენჭისყრის კაბინა და საარჩევნო ყუთები სკოლის დირექტორის კაბინეტში ჰქონდა ჩაკეტილი. სპეციალურ ჟურნალში არ იყო მითითებული ტელეფონის ნომრები და დარეკვის დრო, შესაბამისად, უცნობია ნამდვილად მიმართა თუ არა ამომრჩეველმა გადასატანი ყუთის მოთხოვნით. თავმჯდომარის თქმით, ვერაფერს იტყვის, რადგან "ჟურნალს ხან თითონ ავსებდა, ხან – კომისიის მდივანი".
როგორც აღმოჩნდა, სხვადასხვა ხელითაა შევსებული ჟურნალის ზემოხეთის უბანზეც. ამ უბანზე არც ამომრჩეველთა ერთიანი სიაა გამოკრული და არც გადასატანი ყუთის ამომრჩევლებისა. ამომრჩეველთა ერთიანი სია ფარდების უკან გადამალული ვიპოვეთ.
ამ მაღალმთიანი სოფლის უბნის წინ, "გურია ნიუსის" ობიექტივმა გურიის სამხარეო პოლიციის მთავარი სამმართველოს უფროსი გურამ ჩანტლაძე დააფიქსირა.
