ოზურგეთის მუნიციპალიტეტის სკოლამდელი სააღმზრდელო ცენტრის პრესსამსახურის წარმომადგენელი ხათუნა შარაძე ადასტურებს, რომ სოფელ ძიმითიდან მოსულები იყვნენ მოქალაქეები _ ნანა და მარინა პატიეშვილები: _ ნანა პატიეშვილი ითხოვდა მენეჯერის თანამდებობას, სოფელ ძიმითის ბაღის მენეჯერის, ნაზიბროლა ხინთიბიძის გადადგომას და ამ ადგილზე თავის კანდიდატურას ასახელებდა. ხოლო მარინა პატიეშვილი უბრალოდ ბაღში დასაქმებას _ მას რაიმე კონკრეტული ადგილი არ მოუთხოვია. ხმამაღალი სიტყვებით ამბობდნენ, რომ ძალიან დიდი ხანია, გარკვეული წლებია, უსამსახუროდ არიან და დასაქმება სჭირდებოდათ. თავდაპირველად, აგრესიით გამოირჩეოდნენ, არ მინდა ამ ფაქტს მიეცეს სხვანაირი ინტერპრეტაცია, თორემ აბსოლუტურად გულწრფელად გეტყვით, რომ შეგვამკეს უწმაწური სიტყვებითაც. ჯერ იყვნენ აგრესიულები, მერე ამბობდნენ, გაღიზიანებულები ვართ და ბოდიშიო.
მე ვერ შევაფასებ ამ სიტუაციას, ან რატომ უნდა შევაფასო? ეს არის იმ ადამიანების საქმე, რომლებიც კომპეტენტურები არიან, მე, უბრალოდ, შემიძლია ფაქტი დაგიდასტუროთ. ჩვენ ავუხსენით ამ ადამიანებს შეძლებისდაგვარად, რომ მათ შეუძლიათ დაწერონ განცხადება. ქალბატონ ნანას ჰქონდა პრეტენზია, რომ სკოლაშიც მუშაობდა და პოლიტიკური ნიშნით გაათავისუფლეს, _ ამბობს შარაძე.
ცენტრის თანამშრომელი ნათია გოკიელი: _ ამ ქალბატონებმა უსინდისოები გვიძახეს, მე ვუთხარი, თქვენი ასეთი საქციელის და უწმაწური სიტყვების ძახილის შემდეგ პრეტენზია გაქვთ, ბაღში დასაქმებაზე, თქვენ ბავშვები უნდა აღზარდოთ, რა დაგიშავეთ, უსინდისოს რომ მეძახით,-მეთქი? მერე ბოდიში მოგვიხადეს.
“გურია ნიუსი” ინფორმაციის გადასამოწმებლად მარინა პატიეშვილს დაუკავშირდა.
_ ქალბატონო მარინა, სკოლამდელ სააღმზრდელო ცენტრში აცხადებენ, რომ თქვენ შეურაცხყოფა მიაყენეთ თანამშრომლებს, აგრესიულობით გამოირჩეოდით და დასაქმებას ამ ფორმით ითხოვდით…
_ მე, უბრალოდ, ვითხოვდი სამართალს. უკვე სამი წელია, განცხადება მაქვს დაწერილი, ვითხოვ სამსახურს. ეს იცოდა მაკა ჭყონიამ და ყველა კომპეტენტურმა პირმა, მაგრამ საარჩევნოდ დანიშნეს სხვა, გუბერნატორის ნათესავი. მითხრეს, რომ თქვენ განცხადებაში არ გქონდათ მითითებული ძიძის ადგილიო. რა მნიშვნელობა აქვს მაგას, სხვა ადგილი ხომ იყო? მე მინდა უბრალოდ დასაქმება. ჩუმად, ამ საარჩევნოდ მოაწყვეს და დანიშნეს სხვა. აგრესიული ვიყავი იმიტომ, რომ სამართალს ვითხოვდი. არ გავჩერდები, საჩივარი მაქვს გამზადებული და შემაქვს სასამართლოში. ბაღების ცენტრის უფროსის ზემდგომი არის საკრებულოს თავმჯდომარე და გუბერნატორი. არ ვიცი, კონკრეტულად ვის სახელზე შევიტან საჩივარს.
სამი წელია პატარა ბავშვივით აქეთ-იქეთ დავდივარ და მატყუებდნენ ამდენი ხანი. ყველა წელიწადს ახალ-ახალი თანამშრომლები მიიღეს, სულ ხელისუფლების ახლობლები, მე ვარ დევნილი და აქ ნათესავი არ მყავს. ამის გამო უნდა დავიჩაგრო? _ გვითხრა მარინე პატეიშვილმა.
