პირველად, ოლქში ბლოკ “ბიძინა ივანიშვილი _ ქართული ოცნების” წარმომადგენლის მარინე სუნგულიას განცხადება განიხილეს. საჩივარში აღნიშნულია, რომN60/60 გურიანთა 2-ის საარჩევნო უბნის შესასვლელში იჯდა სამი ადამიანი, მათ წინ ედოთ ოლქის ბეჭდით დამოწმებული ამომრჩეველთა სიები და მისულ ამომრჩეველს აღნიშნავდნენ. მომჩივანი ითხოვს, ოლქმა შეისწავლოს, თუ საიდან აღმოჩნდა ოლქის ბეჭდით დამოწმებული სიები პარტიის კოორდინატორის ხელში და გატარდეს ამ ფაქტში მონაწილე პირების მიმართ ქმედითი ღონისძიებები.
საოლქო საარჩევნო კომისიის თავმჯდომარემ, ზვიად თენიეშვილმა აღნიშნა, რომ თვითონაც მივიდა აღნიშნული ფაქტის ადგილზე. საუბნო კომისიის თავმჯდომარემ, ბადრი მუჯირმა მასთან საუბარში განაცხადა, რომ კედლიდან ჩამოხსნილი სიები მიბარებული ჰქონდა მის მოადგილეს, ტარიელ შეწირულს, მან ათხოვა ეს სიები ერთ-ერთ პიროვნებას გასაცნობად და შემდეგ, უბანზე ბევრი საქმის გამო, დაავიწყდა გამორთმევა.
კომისიის თავმჯდომარემ კენჭისყრაზე დააყენა წინადადება, რომ 60/60 გურიანთა 2-ის კომისიის თავმჯდომარეს _ ბადრი მუჯირსა და მის მოადგილეს _ ტარიელ შეწირულს, სამსახურეობრივი მოვალეობის არაჯეროვნად შესრულებისთვის, გაფრთხილება მისცემოდათ. მომხრე იყო 13, წინააღმდეგი _ 0.
“გურია ნიუსის” ინფორმაციით, მომჩივანი, საქმის გაგრძელებას ოზურგეთის რაიონულ სასამართლოში აპირებს.
მეორე საჩივრის ავტორი “საქართველოს ახალგაზრდა იურისტთა ასოციაციის” დამკვირვებელი, ლევან ხუხიაა. საჩივარში აღნიშნულია, რომ 60/09 კომისიის წევრებმა _ გურამ წიტაიშვილმა და აზა ყალიჩავამ უარი განაცხადეს წილისყრით მათზე დაკისრებული ფუნქციების შესრულებაზე, რითაც კომისიის წევრებმა დაარღვიეს საარჩევნო კოდექსის 28-ე მუხლის 1 პუნქტის “ა” ქვეპუნქტი და 61-ე მუხლის მეორე პუნქტის “ზ”, “დ” და “ე” ქვეპუნქტები. მომჩივანი ითხოვს, დაეკისროს გურამ წიტაიშვილს და აზა ყალიჩავას საარჩევნო კოდექსის 28-ე მუხლის მე-2 პუნქტით გათვალისწინებული პასუხისმგებლობა. კომისიის თავმჯდომარემ კენჭისყრაზე დააყენა აღნიშნული წინადადება. მომხრე იყო 3 და წინააღმდეგი _ 10, ამიტომ, საჩივარი არ დაკმაყოფილდა.
“გურია ნიუსთან” საუბარში სხდომის თავმჯდომარემ აღნიშნა, რომ კენჭისყრის დღეს უბნებიდან შემოვიდა 20 საჩივარი, აქედან 8 საჩივარი იყო ბიულეტენების ნაკლებობის შესახებ, კომისიამ ეს საჩივრები განუხილველი დატოვა.
დანარჩენი საჩივრები ეხებოდა პროცედურულ საკითხებს, რომლებიც ადგილზევე იქნა აღმოფხვრილი. ხოლო სხვა საჩივრები ხარვეზის გამო, განუხილველად იქნა დატოვებული.
კენჭისყრის დღეს “გურია ნიუსს” მიაწოდეს ინფორმაცია, რომ საარჩევნო უბნებზე მასობრივად ბიულეტენების ნაკლებობაა. “ქართული ოცნების” რამდენიმე წარმომადგენელი უბნებზე, ჩვენთან საუბრის დროს ამბობს, რომ თითქმის ყველა უბანზე ეს პრობლემა დაფიქსირდა.
მაგალითად, 60/07 საარჩევნო უბანზე 1522 ამომრჩეველია რეგისტრირებული და 1400 ბიულეტენი მოიტანეს.
საჩივარი დაიწერა ბოხვაურის 60/23 საარჩევნო უბანზე. როგორც კოალიცია “ქართული ოცნების” ერთ-ერთი ლიდერი, მარინე სუნგულია ამბობს, ამომრჩეველთა საარჩევნო სიები კანონდარღვევით არის გამოკრული: _ უნდა გაიარო რეგისტრატორების მაგიდა, საარჩევნო დარბაზი და შემდეგ არის გამოკრული სიები, ამასთან დაკავშირებით უკვე დავწერე საჩივარი, _ გვითხრა სუნგულიამ არჩევნების დღეს.
საზოგადოებრივი ჯანდაცვის ცენტრის ეპიდემიოლოგი, მაია ქუტიძე, “გურია ნიუსის” ინფორმაციით, “ერთიანი ნაციონალური მოძრაობის” მიკროკოორდინატორია. არჩევნების დღეს ის ქალაქის 60/06 უბანზე მანქანით იმყოფებოდა და ხელში ამომრჩევლების სია ეჭირა. “გურია ნიუსის” კითხვებს მან საკმაოდ გულახდილად უპასუხა: “არანაირი სიები, ვინ მოდის და ვინ მიდის, იმას ვამოწმებ…”
_ ანუ მეგობრების სიებია, ახლობლების თუ თანამშრომლების?
_ არა, ჩემი თანამშრომლები არ არიან, ისინი აქ ხომ არ იქნებიან? სოფლებში არიან. ქალაქშიც არიან, მაგრამ ერთ უბანში ხომ არ ვცხოვრობთ? ჩემი მეზობლები, ვინ მოვიდა და ვინ არ მოვიდა, იმას ვწერ და ვაკეთებ.
_ რამდენი ადამიანი მოვიდა?
_ ზუსტი სია არ მაქვს, ახლა ვაკეთებდი.
“გურია ნიუსის” ვიდეოკამერამ მაია ქუტიძის სიაში რამდენიმე ადამიანის სახელი და გვარი დააფიქსირა, მათ შორის ოზურგეთის სპორტსკოლის დირექტორი _ გოჩა კვირჩილაძე, ვინმე გიორგი ჩილაჩავა და გულნაზ ყაჭეიშვილი. “გურია ნიუსი” გიორგი ჩალიჩავას ტელეფონით დაუკავშირდა, რომელმაც გაგვიცხადა, რომ თბილისში იყო და ამ სიებთან დაკავშირებით არაფერი იცოდა. სპორტსკოლის დირექტორი ჩვენს სატელეფონო ზარებს არ პასუხობდა.
რაც შეეხება გულნაზ ყაჭეიშვილს, მის ტელეფონზე შვილმა, პაატა ქარჩავამ გვიპასუხა. პაატა ქარჩავას ძმა, ვასილ ქარჩავა მუნიციპალიტეტის გამგეობის თანამშრომელია.
თვითონ პაატა ქარჩავას სულაც არ გაკვირვებია, ქუტიძის სიაში რომ დავაფიქსირეთ დედამისის სახელი და გვარი.
_ ეგ “ერთიანი ნაციონალურ მოძრაობის” მიკროკოორდინატორია და იმიტომ ჰყავდა სიაში შეყვანილი, _ გაგვიცხადა ქარჩავამ.
“გურია ნიუსმა” ოზურგეთის 60/57 ანასეულის საარჩევნო უბანზე ოზურგეთის მუნიციპალიტეტის ზედამხედველობის სამსახურის უფროსის შუქრი გაბრიჩიძის მანქანაში, უბანზე სამუშაო გეგმა აღმოაჩინა. ჩამოწერილ სიას სწორედ ასე ჰქვია _ “უბანზე სამუშაო გეგმა”.
“გურია ნიუსის” მიერ დაფიქსირებულ სიაში, ანასეულის უბანზე პასუხისმგებელ თანამდებობის პირებში ჩამოთვლილები არიან: ზედამხედველობის სამსახურის უფროსი შუქრი გაბრიჩიძე, პროკურორი მალხაზ სირაძე, სპორტისა და ახალგაზრდულ საქმეთა სამინისტროს წარმომადგენელი გურიის გუბერნიაში ოთარ რევიშვილი, ოთარ რევიშვილის მამა, ჩაის სუბტროპიკული კულტურებისა სამეცნიერო კვლევითი ინსტიტუტის დირექტორი.
ჩამონათვალში მითითებულია კომისიის თავმჯდომარისა და სხვა წევრების კოორდინატები. აღნიშნული უბნის კომისიის თავმჯდომარე კი თავად შუქრი გაბრიჩიძის მეუღლე, მაია გოცირიძე იყო.
სტატია მომზადებულია გაეროს დემოკრატიის ფონდის მხარდაჭერით. სტატიის შინაარსზე პასუხისმგებელია სამოქალაქო განვითარების ინსტიტუტი და
მასში გამოთქმული მოსაზრებები, შესაძლოა, არ ასახავდეს გაერთიანებული ერების ორგანიზაციისა და გაერთიანებული ერების დემოკრატიის ფონდის შეხედულებებს.
