„ბოლო პერიოდში, „ფეისბუქის“ პირად გვერდზე ქალბატონმა სალომე ზურაბიშვილმა რამდენჯერმე გააკეთა კომენტარი, რომელიც ხელნაწერთა ეროვნულ ცენტრსა და მის ხელმძღვანელს ეხებოდა. გთავაზობთ ამონარიდებს (სტილი დაცულია):
„ისე ბუბა კუდავამ იმას რომ მოუაროს რაც აბარია ანუ ხელნაწერთა ინსტიტუტი და იქიდან ხელნაწერები არ გადიოდეს დაუცველი და აღრიცხვის გარეშე, შეიძლება სჯობდეს!“ (6 ივნისი, 2012)
სალომე ზურაბიშვილის მიმართვიდან კულტურის მინისტრს:
„სანამ დავიწყებდეთ ნგრევას და გადატან – გადმოტანას იმ სიმახინჯეების, რითაც “მორთულია” ჩვენი ქვეყანა, გთხოვთ ჯერ მივხედოთ იმას, რაც სასწრაფოდ გადასარჩენია ჩვენი კულტურულ საგანძურიდან; ხელნაწერები (რაც გადაურჩა ბუბა კუდავას), ეროვნული მუზეუმი (რაც გადაურჩა ლორთქიფანიძეს), მცხეთა,მესტია და მესტიის მუზეუმის სიწმიდეები, ატენის სიონი, გელათი და ჩვენი კავშირები იუნესკოსთან, ერეკლეს სასახლე და ალბად კიდევ მავიწყდება ბევრი…. კონცერტების და ტაშ ფანდურის დრო აღარ გვაქვს, თუ გვინდა იმის გადარჩენა, რისთვისაც ღირს აქ ცხოვრება და ამ ქვეყნის დათვალიერება სხვებისათვის!“ (8 ოქტომბერი, 2012)
ქალბატონ სალომეს იქვე, მის გვერდზევე, რამდენჯერმე ვთხოვე დაეზუსტებინა, თუ რას ეყრდნობოდა მისი ასეთი განცხადებები. ვთხოვე დაეკონკრეტებინა, რომელი ხელნაწერები გავიდა „დაუცველი და აღრიცხვის გარეშე“, კონკრეტულად სად და როდის? კონკრეტულად რომელ ხელნაწერს შეექმნა საფრთხე, სად და რის გამო?
სამწუხაროდ, კითხვები დღემდე პასუხგაუცემელი რჩება, ბრალდებები კი ვრცელდება ინტერნეტ-სივრცეში.
ვინაიდან ჩემთვის ძალზე მნიშვნელოვანია უნიკალურ ხელნაწერ მემკვიდრეობაზე ზრუნვის საქმე და არც ხელნაწერთა ეროვნული ცენტრისა და პირადად ჩემი საქმიანი რეპუტაციაა უმნიშვნელო, ვთხოვ ქალბატონ სალომეს, თავი შეიკავოს არასწორ წყაროზე დამყარებული ზოგადი განცხადებების გავრცელებისაგან ან პირადად დაინტერესდეს ხელნაწერთა ეროვნული ცენტრის საქმიანობით და მის წინაშე მდგარი ამოცანებით.
2006 წლიდან, ჩემი დირექტორობის პერიოდში, იგი არასოდეს ყოფილა ჩვენს ცენტრში, შესაბამისად, სრულიად შესაძლებელია, რომ მას არასწორი წარმოდგენა ჰქონდეს იმ დამოკიდებულებაზე, რაც საქართველოსთვის უმნიშვნელოვანეს ამ დაწესებულებაში მომუშავე თითოეულ თანამშრომელს აქვს ჩვენი საგანძურის მიმართ.
სიამოვნებით ვუმასპინძლებდი ქალბატონ სალომესაც და უნიკალური ქართული ხელნაწერი მემკვიდრეობის ნებისმიერ გულშემატკივარს ხელნაწერთა ეროვნულ ცენტრში და პირადად გავაცნობდი რეალურ ვითარებას, ხელნაწერების დაცვისა და მათზე ზრუნვის მექანიზმებს, ჩვენს პრიორიტეტებსა და ხედვებს“ _ ნათქვამია ბუბა კუდავას განცხადებაში.
