ექვსიდან 2 მაჟორიტარს ქონება იპოთეკით აქვს დატვირთული, ერთს კი ქონება საერთოდ არ გააჩნია.
ანზორ ბოლქვაძემ ხულოში 8 208 ხმა (57,93%) მიიღო. “ნაციონალური მოძრაობის” კანდიდატის ქონებრივი მდგომარეობის შესახებ საჯარო რეესტრში მხოლოდ ერთი მონაცემი იძებნება _ ბოლქვაძემ ხულოში აღმაშენებლის #14-ში 319 კვ.მ. ნაკვეთი 2012 წელის 17 მაისს დაირეგისტრირა. რეესტრის მიხედვით მას სხვა ქონება არ გააჩნია.
შუახევის მაჟორიტარს “ნაციონალური მოძრაობიდან” საკუთარ სახელზე არანაირი ქონება არ გააჩნია. ომარ მეგრელიძე მაჟორიტარობამდე აჭარის მთავრობის თავმჯდომარის აპარატის უფროსად მუშაობდა. რეესტრის მონაცემების მიხედვით, მან ქონების შეძენა ვერ მოახერხა.
ქედის რაიონის მაჟორიტარი ბოლო მოწვევის პარლამენტის წევრიც იყო. 2003 წელს ბათუმში რუსთაველის 41, ბინა 32-ში დაირეგისტრირა 37.49 კვ.მ. 2007 წელს გონიოში კი 2003 კვ.მ. მიწა. 2007 წელსვე ბათუმში ინასარიძის 9-ში მე-9 სართულზე 67,24 კვ.მ. ბინა იყიდა.
რაც შეეხება შერვაშიძის საბანკო ვალებს, 2006 წელს რუსთაველზე მდებარე ბინა იპოთეკით სააქციო საზოგადოება “საქართველოს ბანკში” დატვირთა. 2011 წლის 12 დეკემბერს ისევ “საქართველოს ბანკით” იგივე ბინა კვლავ იპოთეკით დატვირთა. იპოთეკის გაუქმება მონაცემთა ბაზაში ჯერ არ არის დაფიქსირებული.
2011 წლის 28 აპრილს, პარლამენტარმა გააუქმა ინდმეწარმე “იაშა შერვაშიძე”. 2011 წლის 14 ივლისს საკუთარ სახელზე რეგისტრირებული კიდევ ერთი ინდმეწარმე გააუქმა. იაშა შერვაშიძე ინდმეწარმედ 1998 წლის მაისიდან ფიქსირდება. ამჟამად რეესტრის მიხედვით იგი სამეწარმეო საქმიანობას აღარ ეწევა.
“ოცნების” მაჟორიტარს ქობულეთის რაიონიდან ბათუმში ერას 44-ში, ბინა 58 ეკუთვნის. ბინა 2007 წელს შეიძინა და მისი ფართობი 27,61 კვ.მ.-ა. ფატი ხალვაში ბოლოს თავისი ძმის კუთვნილ შპს “დეკო”-ს კუთვნილებაში არსებული შპს “ბათუმის საშენ მასალათა კომბინატის” დირექტორად მუშაობდა. თუმცა, ხალვაშების ქონებისა და ხელისუფლებასთან კავშირის შესახებ “გურია ნიუსი” მასალას ცალკე შემოგთავაზებთ.
როსტომ ხალვაშმა ხელვაჩაურში ხმების 63% მიიღო. მის სახელზე რეესტრში მხოლოდ სასოფლო-სამეურნეო დანიშნულების მიწის ნაკვეთია რეგისტრირებული. მიწა ჩუქების ხელშეკრულებით ხელვაჩაურის რაიონის სოფელ წინსვლაში (1001 კვ.მ.) 2011 წელის 25 მაისს მიიღო.
ხელვაჩაურის რაიონშივე აქვს სახლი ბათუმის მაჟორიტარს “ოცნებიდან” მურმან დუმბაძეს. სოფელ ახალშენში 2 331 კვ.მ. მიწა და შენობა 328,30 დუმბაძის საკუთრებაა. მთელი ქონება იპოთეკით მურმან დუმბაძემ 2007 წლის ივლისში დატვირთა. 2010 წელს კვლავ “პროკრედიტ ბანკში” განაახლა იპოთეკა.
გასულ წელს კი მთელი ქონების იპოთეკის დატვირთვა ამჯერად “თიბისი ბანკში” გააკეთა. დუმბაძის ქონება ამჟამადაც “თიბისის” იპოთეკითაა დატვირთული.
