“გურია ნიუსი” მიმართვის ტექსტს უცვლელად გთავაზობთ.
“აჭარის ავტონომიური რესპუბლიკის ფინანსთა და ეკონომიკის სამინისტრომ 2011 წლის 30 აგვისტოს, მისთვის მინიჭებული უფლებამოსილების საფუძველზე, მიჰყიდა შპს “ნიუ ლაიფს“ (დირექტორი ზაზა კაპანაძე) შპს ბათუმის სამშობიარო სახლი, იურიდიული მისამართი: საქართველო, ბათუმი რუსთაველის 39; 100%-იანი წილი. გაყიდვა მოხდა წინასწარი აუქციონის ჩატარების გარეშე, აქ დასაქმებულ მოქალაქეებთან და მედპერსონალთან შეუთანხმებლად. შენობა-ნაგებობა, რომელშიც ფუნქციონირებს სამშობიარო სახლი, როგორც ჩვენთვის არის ცნობილი, გაყიდული არ არის. სავარაუდოდ, იგეგმებოდა შენობა-ნაგებობის გასხვისება, რის გამოც მოხდა ქონების გაყიდვა, შენობის გამოთავისუფლების მიზნით. ადვილად მისახვედრია, რომ ახალი მყიდველისთვისაც არც თუ სასიამოვნო და სასურველია აქ დასაქმებული 277 მოქალაქის დაკმაყოფილება სამუშაო პირობებით. ახალი მყიდველი ამჟამად ეტაპობრივად ატარებს სარემონტო კოსმეტიკურ სამუშაოებს შპს “ბათუმის დედათა და ბავშვთა ჯანმრთელობის დაცვის რესპუბლიკური ცენტრის “ ტერიტორიაზე შპს ბათუმის სამშობიარო სახლის მიერ მოგებული თანხებით. გასათვალისწინებელია ისიც, რომ მყიდველი სავარაუდოდ ვერ შეასრულებს ხელშეკრულებით ნაკისრ ვალდებულებას იმის თაობაზე, რომ 2012 წლის ბოლომდე აამოქმედოს სამშობიარო სტაციონარი 100 საწოლზე შპს “ბათუმის დედათა და ბავშვთა ჯანმრთელობის დაცვის რესპუბლიკური ცენტრის’’ ტერიტორიაზე თანამედროვე სტანდარტების შესაბამისად 277 მოქალაქის სამუშაო პირობების დაკმაყოფილების გათვალისწინებით.
1951 წლიდან, ბათუმის სამშობიარო სახლში 300 000-ზე მეტი ახალი სიცოცხლეა მოვლინებული, რაც აქ მომუშავე მედპერსონალის ღვაწლით, შრომით, თავდადებით, ზოგჯერ საკუთარი სიცოცხლის ფასადაც არის განპირობებული. ეს თავდაუზოგავი შრომა მიზანმიმართული იყო და არის დედის, ახალშობილის გადარჩენის, მომავალი დედის და საერთოდ, ქალის ჯანმრთელობაზე ზრუნვისთვის. სწორედ ამ ადამიანების მარჯვენით და გამართული მენეჯმენტით არის დაწესებულება წარმატებული, რენტაბელური, პასუხობს თანამედროვე მოთხოვნებს, მუშაობს სრული დატვირთვით, ემსახურება აჭარის მოსახლეობის 70%-ს, დასავლეთ საქართველოს სხვა რეგიონებს, დასაქმებული ჰყავს 277 მოქალაქე ღირსეული სამუშაო პირობებით, არ აქვს დავალიანება. აღსანიშნავია ისიც, რომ ამ კოლექტივის მიერ ნებაყოფლობით საკუთარი სახელფასო ანაზღაურების ხარჯზე და მეცენატების დახმარებით წლების წინ შენობას ჩაუტარდა სარეკონსტრუქციო სამუშაოები, აღიჭურვა თანამედროვე სამედიცინო მომსახურების საგნებითა და აპარატურით. შესაბამისად, სამშობიარო სახლის შენობა ყოველთვის იყო თავისი გარეგნული იერითაც მშვენიერი. სწორედ მისი ადგილმდებარეობისა და გარეგნული იერის გამო უნდა გახდეს სიცოცხლის ტაძარი მსხვერპლი იმისა, რომ ამ ტერიტორიაზე განთავსდეს სასტუმრო, საცხოვრებელი სახლი თუ კიდევ სხვა რამ….
საინტერესოა, რა დანიშნულების დაწესებულებამ უნდა ჩაანაცვლოს შენობა, რომელშიც ყოველდღიურად ერისთვის და ქვეყნისთვის სასიკეთო საქმე კეთდება?
საქართველოში უამრავი კულტურული თუ ისტორიული ძეგლი და შენობა აღდგენილა, ბევრი საავადმყოფო აშენებულა, უხვად კეთილი საქმეც გაკეთებულა თქვენი ინიციატივით. ეს ისტორიული შენობაც ყოველთვის იყო ყურადღების ცენტრში თავისი ადგილმდებარეობის გამო და ხშირად მზადდებოდა გასაყიდად თუ გასასხვისებლად ინვესტორებზე, მაგრამ საბოლოოდ რაღაც უშლიდათ ხელს. შემთხვევითი არც ის არის, რომ სამშობიაროს მიმდებარე ტერიტორიაზე წმ. ბარბარეს სახელობის ეკლესიაა, რომელიც ბავშვებს მფარველობს. ალბათ უფალს არ ენება სიცოცხლის სახლის დანგრევა. გაგვიჩნდა იმედი თქვენი დახმარების სამართლიანობის აღდგენაში. ჩვენი გულისტკივილის შესახებ წერილობით მივმართეთ საქართველოს პრეზიდენტს ბატონ მ. სააკაშვილს, პარლამენტის თავმჯდომარეს ბატონ დ. ბაქრაძეს, იმდროინდელ პრემიერ-მინისტრს ბატონ ნიკა გილაურს, აჭარის ავტონომიური რესპუბლიკის მთავრობის თავმჯდომარეს ბატონ ლ. ვარშალომიძეს, აჭარის უმაღლესი საბჭოს თავმჯდომარეს მ. მახარაძეს, ბათუმის მაჟორიტარ დეპუტატს ბატონ თ. ჩარკვიანს. ჩვენ თხოვნაზე რეაგირება მხოლოდ აჭარის ავტონომიური რესპუბლიკის მთავრობის თავმჯდომარემ ბატონმა ლ. ვარშალომიძემ და ბატონმა თ. ჩარკვიანმა მოახდინეს, თუმცა ჩვენი თხოვნა სამშობიარო სახლის შენობის იმავე სტატუსით, ადგილმდებარეობის შენარჩუნებით ფუნქციონირება, ვერ დააკმაყოფილეს.
უმორჩილესად გთხოვთ შეგვინარჩუნოთ ისტორიული შენობა. გადმოცემით ცნობილია, რომ ის 1934 წელს მეცენატის მიერ გადაცემული იყო სამედიცინო დაწესებულებისთვის საჩუქრად. ამ სახლის იმავე სტატუსით შენარჩუნება, რითაც დღეს ის ფუნქციონირებს, არამარტო ჩვენი კოლექტივის არამედ თითოეული ბათუმელის სურვილიცაა.
აქვე გვინდა დავძინოთ, რომ ქალაქში არაერთი, ისტორიული მემკვიდრეობის მქონე შენობის გასხვისება მოხდა ინვესტორებზე, რომლებიც მათი დაპირების მიუხედავად უცვლიან იერ-სახეს არსებულ ისტორიას და მიზანდასახულად სპობენ ქართველი ერის ისტორიისა და წარსულის დიდების კვალს, გთხოვთ შემოუნახოთ მთლიან ერს მისი წარსული და მომავალი,” _ ნათქვამია მიმართვაში.
