_ როგორც კი "ქართული ოცნების მაისური ჩავიცვი, მეორე დღესვე ჯარში გამიწვიეს. მიუხედავად იმისა, რომ ჯანმრთელობის პრობლემები და ბრმანაწლავის ოპერაცია ახალი გაკეთებული მქონდა, კომისიამ ჩათვალა, რომ ჯარში უნდა წავსულიყავი. არაფერი გაითვალისწინეს, _ გვითხრა რაულ ცენტერაძემ.
მისივე თქმით, გორის საჯარისო ნაწილში ოფიცრები და სერჟანტები ფიზიკურ და სიტყვიერ შეურაცხყოფას აყენებდნენ:
_ რამდენიმე დღის განმავლობაში სიცხე მქონდა. ვთხოვდი, რომ საავადმყოფოში გადავეყვანე, მაგრამ არ გადავყავდი, ბოლოს კი მომცეს ერთი ტაბლეტი და მითხრეს, რომ ეს საკმარისი უნდა ყოფილიყო, _ ამბობს რაული, რომელიც 1 ოქტომბერს, კანონით კარანტინში მყოფი, სახლში, ხმის მისაცემად, როგორც თავად ამბობს, ხუთიანის შემოსახაზად გამოუშვეს.
_ მითხრეს, რომ სახლში უნდა დავბრუნებულიყავი და არჩევნებზე ხუთიანი შემომეხაზა. მეორე დღეს კი ისევ ნაწილში უნდა მივსულიყავი, _ დასძენს ცენტერაძე, რომელიც არჩევნების შემდეგ ნაწილში აღარ დაბრუნდა.
ამის გამო კი, 4 ოქტომბერს, საჯარისო ნაწილიდან სერჟანტმა, ფირუზ გიგუაშვილმა ჩამოაკითხა. გიგუაშვილმა მაშინ ცენტერაძის ნახვა ვერ მოახერხა. როგორც "გურია ნიუსისთვის" გახდა ცნობილი, ცენტერაძეს გორის საჯარისო ნაწილიდან კიდევ ორჯერ ჩამოაკითხეს. გუშინ კი უწყება გამოუგზავნეს, სადაც აღნიშნულია, რომ ჯარში არ დაბრუნების გამო მასზე სისხლის სამართლის საქმეა აღძრული.
როგორც რაული ამბობს, მის მსგავსად "ქართული ოცნების" მხარდამჭერი კიდევ 7 ჯარისკაცის წინააღმდეგ აღძრეს საქმე.
ცენტერაძეს, ახალგაზრდა იურისტთა ასოციაციის ოზურგეთის ოფისი იცავს.
