სააგენტოს რამდენიმე დამფუძნებელი ჰყავს: ოზურგეთის მუნიციპალიტეტის იმდროინდელი გამგებელი ავთანდილ მექვაბიშვილი, ლანჩხუთის მუნიციპალიტეტის მოქმედი გამგებლი გიორგი გოგუაძე, ჩოხატაურის მუნიციპალიტეტის იმდროინდელი გამგებელი მამუკა დოლიძე, შპს “კოლხიდას” ხელმძღვანელი ხათუნა ლაგაზიძე და ოზურგეთის ახალგაზრდა მეცნიერთა კლუბის იმჟამინდელი ხელმძღვანელი და პარლამენტის ახლანდელი დეპუტატი გოჩა შანიძე. სააგენტოს გამგეობის თავმჯდომარე ლიკა ღლონტი გახლდათ _ ვალერი ჩიტაიშვილის ადმინისტრაციის ერთ-ერთი თანამშრომელი.
წესდების თანახმად, სააგენტოს საქმიანობის მიზანს გურიის დეცენტრალიზაციის ხელშეწყობა, მისი სოციალურ-ეკონომიური განვითარების სტიმულირება, გურიის რეგიონის ცნობადობის მიღწევა და ა.შ. წარმოადგენს.
ამ სააგენტოს დამფუძნებელთა პირველი ოქმი 2010 წლის 10 იანვრით თარიღდება, ხოლო საჯარო რეესტრში ამავე წლის 1 მარტს არის დარეგისტრირებული ავთანდილ მექვაბიშვილის განცხადების საფუძველზე.
ამავე პერიოდში, სამივე მუნიციპალიტეტის ხელმძღვანელებმა, გამგეობების შენობებში ფართები გამოუყვეს სააგენტოს და, როგორც დოკუმენტები ცხადყოფენ, პროექტებზე მუშაობა დაიწყეს. სააგენტო განსაკუთრებულად საარჩევნოდ გააქტიურდა და როგორც მისი წევრები პირად საუბრებში ამბობენ, “მაგარი პროექტი გაარტყეს”. ამ პროექტის ერთ-ერთი პირობა კი, საარჩევნო დებატების მოწყობა გახლდათ, რომელიც არავინ იცის, სად და როგორ ჩატარდა.
გოჩა შანიძე ჩვენთან საუბრისას ამბობს, რომ ამ სააგენტომ ბევრ ახალგაზრდას გზა გაუკვალა და დაასაქმა კიდეც. მისივე თქმით, სწორედ სააგენტოს მიერ გახორციელებული პროექტის დამსახურებაა, რომ სამივე მუნიციპალიტეტში, საინფორმაციო სამსახურები, ე.წ. მოქალაქეთა მისაღებები შეიქმნა. ეს სამსახური ოზურგეთსა და ლანჩხუთში მუშაობს, ჩოხატაურში კი მხოლოდ შემინული ოთახი გააკეთეს, რომელიც დღემდე ცარიელია.
პარლამენტის დეპუტატი ამბობს, რომ სააგენტო არჩევნების შემდეგ არ აქტიურობდა:
_ სიმართლე გითხრათ, სააგენტოს ბოლოდროინდელი საქმიანობის შესახებ ბევრი არაფერი ვიცი. თავიდან ძალიან კარგად დავიწყეთ _ ძალიან ბევრ ახალგაზრდას პირადად მე ჩავუტარე რამდენიმე სემინარი, გავუშვით საზღვარგარეთ. შემდეგ იყო პერიოდი, როცა სააგენტო არ აქტიურობდა, თუმცა, როგორც გავიგე, ახლა მუშაობა განაახლა, _ გვითხრა დეპუტატმა.
_ ბატონო გოჩა, როგორც ვიცი, სააგენტომ წინასაარჩევნოდ პროექტი განახორციელა…
_ დაზუსტებით არ ვიცი, რა პროექტი იყო, მაგრამ ვიცი, რომ დებატებს ითვალისწინებდა.
_ სად ჩატარდა ეს დებატები?
_ არ ვიცი, _ აღნიშნა შანიძემ, რომელიც იმ პერიოდში პარლამენტის დეპუტატობის კანდიდატი იყო და ყველაზე უკეთ მას უნდა სცოდნოდა, სად და რა ფორმატში იმართებოდა საარჩევნო ღონისძიებები, რომ არაფერი ვთქვათ იმაზე, რომ სააგენტოს ერთ-ერთი დამფუძნებელიც გახლდათ.
_ მგავსი სააგენტოები საქართველოს სხვადასხვა კუთხეში წარმატებით მუშაობს. პირველად თელავში ვნახე და ძალიან მომეწონა. ამ სააგენტოს ბევრი წარმატების მოტანა შეუძლია ჩვენი მხარისთვის, _ დააზუსტა შანიძემ.
დოკუმენტები ცხადყოფენ, რომ ამ სააგენტოს დაფინანსება სამივე მუნიციპალიტეტის ბიუჯეტიდან ჰქონდა, თუმცა ისე, რომ ამის აფიშირება არ გაკეთებულა.
ექსპერტები ფიქრობენ, რომ “ისე” არაფერი კეთდება, მით უმეტეს, იმ ფონზე, რომ ახლა სააგენტოს ხელმძღვანელი, ჩოხატაურის მუნიციპალიტეტის ყოფილი გამგებელი, მამუკა დოლიძე გახდა. როგორც ჩვენთვის არის ცნობილი, მას სხვადასხვა თანამდებობაზე დანიშვნას კარგა ხნის მანძილზე პირდებოდნენ. როგორც ჩვენი წყარო ამბობს, ბოლოს არჩევანი უკვე შექმნილი სააგენტოს გააქტიურებაზე შეაჩერეს და უფრო მეტიც, წყაროსვე თქმით, ძალიან მალე, სააგენტოს სამივე მუნიციპალიტეტი სოლიდურ თანხას გადაურიცხავს. ამის შესახებ ოზურგეთის საკრებულოს სხდომაზე ოზურგეთის მუნიციპალიტეტის გამგებელმა უკვე განაცხადა.
აღსანიშნავია ისიც, რომ “გურიის რეგიონალური განვითარების სააგენტო” ხელისუფლების მიერ დაფუძნებული ერთადერთი არასამთავრობო ორგანიზაცია არ არის. ჩვენ მიერ მოპოვებული დოკუმენტაციით ირკვევა, რომ ოზურგეთის ყოფილმა გამგებელმა ავთანდილ მექვაბიშვილმა მსგავსი ორგანიზაცია 2010 წელსაც დააფუძნა.
რა მიზანს ისახავს მსგავსი ორგანიზაციების დაფუძნება, რა ინტერესი აქვთ დამფუძნებლებს და რა გააკეთა გურიისთვის “რეგიონალური განვითარების სააგენტომ”, ამის შესახებ ჩვენს ჟურნალისტურ მოკვლევას უახლოეს ნომერში შემოგთავაზებთ.
