სამრევლო სკოლის დამფუძნებელი ნინო გოგეშვილი “გურია ნიუსთან” აცხადებს, რომ ის და სკოლის ვერცერთი თანამშრომელი მამა მათეს გარეშე ვერ გაჩერდებიან.
_ ჩვენთვის, მთელი სკოლის პედაგოგებისთვის, ეს იყო მოულოდნელი ამბავი. ჩვენთან ოფიციალური ინფორმაცია ამის შესახებ ჯერ არ შემოსულა. მამა მათე ძალიან მშვიდად შეხვდა ამ გადაწყვეტილებას. ჩვენ, რაც ეს სკოლა დაარსდა, 16 წელია, ერთად მოვდივართ, მას ძალიან ბევრი რამ გაუკეთებია ამ სკოლისთვის და არ დავუშვებთ მის დათხოვნას! _ აცხადებს ნინო გოგეშვილი.
_ როგორც ვიცით, ის უშუალოდ მეუფის მოთხოვნით გაათავისუფლეს.
_ სკოლა არის საპატრიარქოსი, მას ამის უფლება იურიდიულად აქვს.
თავად მამა მათე “გურია ნიუსთან” ამბობს, რომ შემოქმედელ მიტროპოლიტს, მეუფე იოსებს მისი გათავისუფლების შესახებ ბრძანება ჯერ არ დაუწერია.
_ იყო სიტყვიერი გაფრთხილება, როგორც მეუფემ განმიცხადა, ამის მოტივი იყო ის, რომ არ ვიყავი უმაღლესდამთავრებული. მერე გაირკვა, რომ ეს არ უნდა ყოფილიყო მიზეზი ჩემი წასვლისა. მე ვუთხარი მეუფეს, როცა ჩემი გათავისუფლების შესახებ განცხადებას დაწერ, შიგნით იყოს საფუძველი და მიზეზი ჩემი დათხოვის,-მეთქი. თუმცა, ჯერ მე ბრძანება არ მინახავს.
_ მამაო, თქვენ როგორ ფიქრობთ, პოლიტიკური საფუძველი ხომ არ აქვს თქვენს გათავისუფლებას?
_ საარჩევნოდ იყო, რა თქმა უნდა, რაღაცეები. ჩვენ ჩვენი შეხედულებები გვქონდა, მას _ თავისი. მე ყოველთვის გამოვხატავდი ჩემს აზრს, მაგრამ დასკვნას ასე ადვილად ვერ გამოვიტან, ფაქტი არ მაქვს. ვნახოთ, მეუფე რა საფუძველს დაწერს განცხადებაში.
ხათუნა ცერცვაძე, რომელსაც საპატრიარქოში საზოგადოებასთან ურთიერთობის სამსახური აბარია, “გურია ნიუსთან” ამბობს:
_ ეგ საქმე ჩვენი გასარკვევი არაა. კომენტარს ამათან დაკავშირებით მე არ გავაკეთებ!
_ მაშინ გვითხარით, ვინ გააკეთებს?
_ ვინ უნდა გააკეთოს კომენტარი? არავინ არ გაგიკეთებს კომენტარს. ან რატომ უნდა გაგიკეთოს მეუფემ კომენტარი?
_იმიტომ, რომ გვაინტერესებს, რა მიზეზით გაათავისუფლა მეუფე იოსებმა მამა მათე.
_ ეგ თქვენი გასარკვევი არაა, ეგ არის სამრევლო სკოლა, სადაც მეუფე წყვეტს, რა ქნას და როგორ რა მოხდეს. ეგ არ არის საჯარო სკოლა, გასაგებია?
შეგახსენებთ, რომ მეუფე იოსები რამაზ ნიკოლაიშვილთან დაახლოებული პირი გახლდათ და ის ხშირად ჩნდებოდა მასთან ერთად სხვადასხვა ღონისძიებებზე.
