“ქართული პარტიის” ოფისი ოზურგეთში გასული კვირის ხუთშაბათს გაიხსნა. პარტიის საინიციატივო ჯგუფს გოჩა გორდელაძე უხელმძღვანელებს. გახსნაზე თბილისიდან ორგანიზაციის ერთ-ერთი ლიდერი სოზარ სუბარი ჩამოვიდა, რომელმაც თქვა, რომ მთელი საქართველოს შემოვლას აპირებენ.
_ ყველა სოფელში, ყველა ოჯახში უნდა მივიტანოთ ჩვენი სათქმელი, დავძლიოთ ის შიში, უიმედობა და გულგატეხილობა, რომელიც ავტორიტარიზმის მთავარი წყაროა საქართველოში. ორი თვის განმავლობაში, თითქმის ყველგან გავხსნით ოფისებს. დღეს მსოფლიო თანამეგობრობიდან არის სიგნალები, რომ ავტორიტარიზმის წინააღმდეგ ბრძოლის ყველა გზა არის დასაშვები და არა მარტო დასაშვები, არამედ გამართლებულიც, ეს შეფასებები მოხდა ეგვიპტეში, ტუნისში და განსხვავება ვერ იქნება ვერც საქართველოში. ხალხმა უნდა დაიბრუნოს ის, რაც მას ეკუთვნის კონსტიტუციით, ღვთისგან და ბუნებით. ძალაუფლების წყარო არის ხალხი და არა რომელიმე გამყალბებელი კომისიის თავმჯდომარე სადმე საარჩევნო კომისიაში, _ თქვა სუბარმა ჟურნალისტებთან საუბრისას.
მისი თქმით, დღეს ძალიან ბევრს საუბრობენ, რომ ოპოზიცია სუსტია და, განსაკუთრებით, მიხეილ სააკაშვილი იწონებს თავს ამით:
_ გააჩნია, სისუსტეს რას უწოდებ _ თუ ავიღებთ ინტელექტუალურ პოტენციალს, ამ მხრივ ოპოზიცია გაცილებით ძლიერია ხელისუფლებაზე. ხუთ კაცს ვერ დამისახელებთ მმართველი პარტიიდან, რომელსაც შეუძლია დებატებში ჩართვა და ლაპარაკი. რას ლაპარაკობენ და რამდენ სიმართლეს ამბობენ ხუთ სიტყვაში, ეს სხვა საკითხია. თუ ვისაუბრებთ ქვეყნის დანგრევის პროცესზე, ამაში ნამდვილად არიან ჩემპიონები და არც ვაპირებთ გაჯიბრებას. იყო ძლიერი პარტია, ამას სჭირდება თავისუფალი მოქმედების არეალი, რის საშუალებას ეს ხელისუფლება არ იძლევა. როდესაც ოპოზიციონერს ოჯახის წევრს დაუჭერენ, ბიზნესმენს, რომელიც გაბედავს ოპოზიციის მხარდაჭერას, მეორე დღეს ბიზნესს ულუქავენ, ცხადია, ასეთ პირობებში არ არის ადვილი მოქმედება, მაგრამ ჩვენ მხარესაა ძალიან დიდი უპირატესობა _ ეს არის თავდადება და სამშობლოს სიყვარული, _ თქვა სოზარ სუბარმა.
მისივე თქმით, გურიაში, “ქართული პარტიის” ოფისის გახსნისას, პოლიციის თანამშრომლები სამსახურებრივი დანიშნულების მანქანებიდან, სანომრე ნიშნებით LJL 494 და AFA 062, უთვალთვალებდნენ.
