მომავალი კვირის ბოლოს, აჭარის უმაღლესი საბჭო, ტელევიზიის საკითხის შესასწავლად სპეციალური კომისიის შექმნას აპირებს. კომისიამ უნდა გადაწყვიტოს ტელეკომპანია „აჭარის“ სტატუსისა და მომავალში ფუნქციონირების იურიდიული ფორმა. გადაწყვეტილების მისაღებად კომისიას ცოტა დრო აქვს. მიმდინარე წლის ბოლომდე სტატუსი უნდა განისაზღვროს, სხვა შემთხვევაში, ტელევიზიის დაფინანსება ვერ მოხერხდება, რადგანაც ამ დროისათვის, ის აჭარის მთავრობის საქვეუწყებო დაწესებულებად ითვლება, რაც კანონს ეწინააღმდეგება.
მასალკინის თქმით, აჭარის ტელევიზიის სტატუსის განსაზღვრაში, აჭარის უმაღლესი საბჭოს იურიდიულ, ეკონომიკურ-ფინანსური, განათლებისა და კულტურის კომისიის წევრები მიიღებენ მონაწილეობას. გარდა ამისა, ამ საქმიანობაში ჩაერთვებიან სხვადასხვა სამინისტროებისა და თავად ტელევიზიების წარმომადგენლებიც. თუმცა, მათი ზუსტი ვინაობა, ჯერჯერობით, ცნობილი არ არის.
ამ ეტაპზე დაზუსტებულია არ არის თუ რა სტატუსი მიენიჭება აჭარის ტელევიზიას. მასალკინი აცხადებს, რომ არსებობს რამდენიმე ვარიანტი, რომელზეც იქნება საუბარი. შეიძლება ეს იყოს საზოგადოებრივი მაუწყებელი, საქართველოს საზოგადოებრივი მაუწყებლის ფილიალი ან მესამე – ტელევიზიის გაყიდვა. ყველა ამ ვარიანტს ახლავს გარკვეული თანამდევი პრობლემა, რომელიც ყურადღების მიღმა არ უნდა დარჩეს. დეპუტატი აცხადებს, რომ მთავარია, ტელევიზია რეგიონში არ შენარჩუნდეს დღევანდელი არსით და მომავალში ხელისუფლებას მისი მართვის ბერკეტები არ მიეცეს. ამისათვის ის უნდა იყოს მაქსიმალურად თავისუფალი და მთავრობისაგან გამიჯნული. აუცილებელია მეტი ხარისხი, მეტი პროდუქცია და ნაკლები ხარჯი, – ამბობს გიორგი მასალკინი.
ყველაზე რთულ საკითხად მასალკინი ტელევიზიის თანამშრომელთა საკითხს მიიჩნევს და ფიქრობს, რომ რეორგანიზაციის შემდეგ, ამ ხალხის შრომითი და იურიდიული უფლებები დაცული უნდა იყოს.
_ ძირითადი ბირთვი უნდა შენარჩუნდეს. ტელევიზიიდან კი უნდა წავიდნენ ის ადამიანები, რომლებიც წლების განმავლობაში იდეოლოგიურ საკითხებს ხელმძღვანელობდნენ, – აცხადებს იგი.
საქართველოს 2004 წელს მიღებული “მაუწყებლის კანონის” თანახმად, ქვეყანაში სახელმწიფო ტელევიზიები გაუქმებულია. იმ დროისთვის, სახელმწიფო ბიუჯეტიდან ქვეყანაში მხოლოდ ორი ტელევიზია _ საზოგადოებრივი მაუწყებელი (პირველი არხი) და აჭარის ტელევიზია ფინანსდებოდა, რომლის სტატუსი დღემდე არაა განსაზღვრული. მაშინ, კანონის გარდამავალ დებულებაში ჩაიწერა, რომ მომდევნო 1 წლის განმავლობაში, მთავრობა “აჭარის ავტონომიური რესპუბლიკის სახელმწიფო ტელევიზიის რეორგანიზაციის შესახებ” წინადადებებს მოამზადებდა. თუმცა, კანონის ეს ნორმა არ შესრულდა. მას შემდეგ, თითქმის ყოველ წელს “მაუწყებლობის შესახებ” კანონში შედის ცვილილება და გარდამავალი დებულებით, ტელეკომპანიის რეორგანიზაციის სტრატეგიის შემუშავების ბოლო ვადა ერთი წლით ხანგრძლივდება. თუმცა, 2011 წლის 1 ნოემბერს ამოწურული ვადა პარლამენტს აღარ გადაუწევია და ყურადღების მიღმა დატოვა.
დღეისთვის, სტატუსის გარეშე დარჩენილი აჭარის ტელევიზია უკანონოდ მოქმედებს. იურიდიულად იგი აჭარის ავტონომიური რესპუბლიკის მთავრობის საქვეუწყებო დაწესებულებას _ ტელევიზიისა და რადიომაუწყებლობის დეპარტამენტს წარმოადგენს.
აჭარის ტელევიზიის ბიუჯეტი, რომელიც დაახლოებით შვიდ მილიონ ლარს შეადგენს, რეგიონის ბიუჯეტიდან ფინანსდება. დაფინანსების მხრივ, აჭარის საჯარო დაწესებულებებს შორის, იგი ბევრად აჭარბებს რეგიონის ჯანდაცვის სამინისტროს (დაახლოებით ოთხი მილიონი ლარი) და სოფლის მეურნეობის (დაახლოებით სამ მილიონნახევარი ლარი) სამინისტროებს.
