ქობულეთში, მედიკოსების საპროტესტო აქცია მას შემდეგ დასრულდა, რაც სამედიცინო ცენტრის ეზო “ჩემი ოჯახის კლინიკის” წარმომადგენელმა ნიკოლოზ ცინცაძემ და “უნიმედი აჭარა” ქობულეთის მენეჯერობისს კანდიდატმა, ეკატერინე გორაძემ დატოვეს.
აქციაზე ქობულეთის მაჟორიტარი-დეპუტატი, ფატი ხალვაშიც მივიდა,რომელმაც ჩვენთან საუბრისას განაცხადა, რომ მედპერსონალის მოთხოვნებს უერთდება:
_ აუცილებლად მივაქცევ ამ საკითხს ყურადღებას. ძალიან ცუდია, რომ ასეთ მდგომარეობაში უწევს მედიკოსებს მუშაობა და აუცილებლად ექნება ამ საქმეს რეაგირება, _ გვითხრა ფატი ხალვაშმა.
“გურია ნიუსის” ინფორმაციით, სამედიცინო ცენტრის მედპერსონალი აპირებს, რომ მორიგეობა დააწესონ, რათა “ჩემი ოჯახის კლინიკის” წარმომადგენლები, ღამის საათებში, საავადმყოფოში არ შევიდნენ.
_ ვიცით, რომ იგეგმება შემცირება თანამშრომლების, რასაც ვაპროტესტებთ. ასევე, არ გვაქვს ხელშეკრულებები გაფორმებული და ვიცით ისიც, რომ ხელფასების განახევრება იგეგმება.
“ალდაგი ბისიაის” ნახვამდის კი არ ვეუბნებით, მათ ვეუბნებით _ მშვიდობით! ერთხელ და სამუდამოდ უნდა დასრულდეს ერთპიროვნული მმართველობა, საავადმყოფო უნდა დაემსგავსოს საავადმყოფოს!” _ გვითხრეს ქობულეთელმა ექიმებმა.
“გურია ნიუსის” ინფორმაციით, “ჩემი ოჯახის კლინიკის” წარმომადგენლები აქციის მოწყობას საავადმყოფოს უკვე ყოფილ სამედიცინო მენეჯერს, ზაალ მიქელაძეს აბრალებენ, რასაც ის კატეგორიულად უარყოფს”
_ არავისთვის მითქვამს, რომ აქცია მოეწყო. მე ვიყავი თბილისში და ჩამოვედი დღეს. ვეთახმები ჩემს ექიმებსა და ჩემს მეგობრებს, რომლებთანაც დიდი ხნის მეგობრობა და თანამშრომლობა მაკავშირებს, _ გვითხრა ზაალ მიქელაძემ.
შეგახსენებთ, რომ ამედიცინო მენეჯერი ზაალ მიქელაძემ, რომლის შემოსვლას ექიმები ოვაციებით შეხვდნენ, ჟურნალისტებთან საგანგებო განცხადება გააკეთა და თქვა, რომ ის თანამდებობას ტოვებს:
_ იმ მედპერსონალთან ერთად, რომელიც აქ ცვლილებებს ითხოვენ, დიდი ხანია, მოვდივარ და არ მაქვს უფლება, რომ მათ გვერდით არ ვიდგე. მე ვიყავი თბილისში წასული და შევხვდი “ჩემი ოჯახის კლინიკის” წარმომადგენლებს, რომლებიც თქვენგან გაიგებენ ახლა ჩემს გადაწყვეტილებას. პირველ რიგში, მე ბოდიში მოვუხადე ჩემს შვილებს, რადგან ყველას მოგეხსენებათ, რა მდგომარეობაა, როდესაც შვილი გყავს სტუდენტი, მაგრამ ახლა გეუბნებით თქვენ, რომ მე ვტოვებ თანამდებობას!” _ განაცხადა ზაალ მიქელაძემ.
კომპანია “ალდაგის” პრესსამსახურის უფროსი მაია ივჩენკო “გურია ნიუსთან” საუბარში აცხადებს, რომ ქობულეთის სამედიცინო ცენტრი “ჩვენი ოჯახის კლინიკას” ეკუთვნის, თუმცა არ უარყოფს რომ ეს კომპანია “ალდაგი ბისიაის” შვილობილია.
“ჩვენი ოჯახის კლინიკის” პრესსამსახურში აცხადებენ, რომ ისინი არ გეგმავენ მასობრივ გათავისუფლებას, უბრალოდ რესტრუქტურიზაციის შედეგად კლინიკაში პაციენტთა ნაკადი დასტაბილურდა და 15 თანამშრომელს დროებით მოუწევს სამსახურის დატოვება.
