(გურია ნიუსი, ლანჩხუთი) _ გასულ კვირაში, www.goli.ge-მ საქართველოს ფეხბურთის ფედერაციის პრეზიდენტის ზვიად 
სიჭინავას ინტერვიუ გამოაქვეყნა. ქართული ფეხბურთის მესაჭე აცხადებს, რომ ლანჩხუთის “გურიას” ესპანელები მიხედავენ: _ თვის ბოლოს ესპანელები ჩამოვლენ და მზად არიან, ლანჩხუთის “გურია” აიღონ იმავე პირობით, როგორც “ვისოლმა” აიღო “ტორპედო”. მათი წარმომადგენელი უკვე ჩამოსულია თბილისში და ჩვენ მასთან მოლაპარაკებებს ვაწარმოებთ. თვის ბოლოს კი სრული დელეგაცია ჩამოვა და პირობებზე დავილაპარაკებთ, დასახელდება კონკრეტული თანხა, რომელიც გუნდში ჩაიდება. გრიგოლეთის ბაზაც ესპანელების მფლობელობაში გადავა და თვის ბოლოს დაიწყება მისი რეკონსტრუქციაც _ ამბობს სიჭინავა.
ჩვენ უცხოელების მიერ ლანჩხუთური კლუბის დაინტერესების შესახებ ინფორმაციას თითქმის ერთი თვეა ვფლობთ, მაგრამ იმის გამო, რომ “გურიის” ადმინისტრაცია თემაზე კომენტარს არ აკეთებდა, ჩვენც მისი გახმაურებისაგან თავი შევიკავეთ. ჩვენი ინფორმაციით, “გურიაში” ინვესტიციის ჩადებით ირლანდიური კომპანია გახლავთ დაინტერესებული. როგორც ჩანს, ფეხბურთის ფედერაციის თავკაცს უნებლიე შეცდომა მოუვიდა, რადგან ბრიტანელებით დაინტერესების შესახებ ინფორმაცია უკვე დაგვიდასტურეს და ნაკლებ სავარაუდოა, რომ ერთდროულად ორი უცხოური კომპანია დაინტერესებულიყო “გურიის” შეძენით.
ჩვენთან საუბარში ინფორმაციას “გურიით” უცხოელების დაინტერესების შესახებ რეგიონული ფეხბურთის ფედერაციის ხელმძღვანელი კახა ებრალიძეც ადასტურებს: _ “გურიაში” ინვესტიციის ჩადებით უცხოური კომპანიაა დაინტერესებული. მათ წარმომადგენლებს თვის ბოლოსთვის ველოდებით ლანჩხუთში და სხვა დეტალების გახმაურება მხოლოდ შემდეგ შეგვეძლება, _ გვითხრა გრფფ-ის ხელმძღვანელმა.
ჩვენი ინფორმაციით, კახა ებრალიძესთან ერთად, უცხოელებთან მოლაპარაკებაში აქტიურად არის ჩართული ლანჩხუთის გამგებელი გია გოგუაძე. მეტიც, ამ საქმის ერთ-ერთი ინიციატორი სწორედ გოგუაძეა:
_ ბატონო გიორგი, ჩვენთვის ცნობილია, რომ თქვენ ჩართული ხართ მოლაპარაკებებში, რომელსაც “გურიასთან” უცხოური კომპანია აწარმოებს, რა სტადიაშია მოლაპარაკება?
_ ამ ეტაპზე ვერაფერს გეტყვით.
_ ფეხბურთის ფედერაციის თავკაცმა უკვე გაავრცელა განცხადება ამის შესახებ და დამალვას რა აზრი აქვს?
_ როცა კომპანიის წარმომადგენლები ჩამოვლენ, აუცილებლად შეგახვედრებთ და ამას პირველი თქვენ გაიგებთ. დიახ, ვაწარმოებთ მოლაპარაკებას, თუმცა, დეტალების გამხელა არ მინდა, რადგან ეს ცუდად მაქვს დაცდილი. გახსოვთ, რომ მოლაპარაკებას ვაწარმოებდით უკრაინელებთან, მაგრამ რატომღაც თავს იკავებენ. რაც შეეხება ახალ ვარიანტს, უცხოელები 2 კვირაში ჩამოვლენ და ყველაფერს გაიგებთ.
_ როგორც ვიცი, ირლანდიელები არიან…
_ დიახ, ასეა.
ჩვენ ვეცადეთ გაგვერკვია, თუ რას წარმოადგენს ეს კომპანია და რა ინვესტიციის განხორციელებას აპირებს ის ლანჩხუთურ კლუბში. როგორც გავიგეთ, ეს არის წარმატებული ბრიტანული კომპანია “Creen Co 2” და მისი ხელმძღვანელია პეტერ გრეი. აღნიშნულ კომპანიას აქვს სურვილი კლუბში განახორციელოს გრძელვადიანი ინვესტიცია, რომელშიც შედის თანამედროვე ტიპის სტადიონის აშენება, მინდვრის საფარის თანამედროვე დონეზე კეთილმოწყობა, საფეხბურთო მოედნის, ბაზისა და საცხოვრებელი კომპლექსის მოწყობა და საფეხბურთო აკადემიის ჩამოყალიბება. ამასთან, კომპანია სტადიონის ტერიტორიაზე კომერციული ფართების განთავსებას გეგმავს. “Creen Co 2” აპირებს უცხოელი ლეგიონერების მოწვევას, ხოლო ადგილობრივი კადრების საზღვარგარეთულ კლუბებში გაგზავნას. კომპანია გრძელვადიან ინვესტიციაზე ფიქრობს, რომ “გურიას” ძველი დიდება დაუბრუნოს. სავარაუდოდ, სწორედ წარსულისა და ტრადიციების გამო დაინტერესდნენ ბრიტანელები ლანჩხუთით.
დასასრულ, ისევ ზვიად სიჭინავას კომენტარს დავუბრუნდეთ _ მან ოზურგეთში სტადიონის მშენებლობასთან დაკავშირებით ახალი დეტალები გაახმაურა: _ ჩვენ დავამთავრეთ მოლაპარაკება ფიფასთან, ბატონმა ბლატერმა ბონუსი გამოგვიყო. გვინდა, რომ ეს თანხა ჩავდოთ გურიაში. ახლა მუნიციპალიტეტმა საბუთები უნდა მოგვაწოდოს. ახლო მომავალში კლუბს მუნიციპალიტეტს გადასცემენ _ საბუთები უკვე შეტანილია ეკონომიკის სამინისტროში. ამ საკითხის მოგვარების შემდეგ, ჩვენ დავიწყებთ რეკონსტრუქციას, _ ამბობს სიჭინავა.
