ჩვენი წყაროს ინფორმაციით, ადგილობრივი პოლიტიკური ჯგუფის ერთი ნაწილი, თბილისში ირაკლი კუჭავას კანდიდატურას ლობირებს. ჩვენთან საუბრისას, კუჭავა ამ ინფორმაციას უარყოფს და ამბობს, რომ ეს ინფორმაცია პირველად ჩვენგან გაიგო, თუმცა, ჩვენი წყარო ამბობს, რომ “ყველაფერი შეთანხმებულია და მხოლოდ ტექნიკური საკითხები დარჩა მოსაგვარებელი”.
_ პირველად მესმის; არანაირი ოფიციალური ან არაოფიციალური საუბრები ამ საკითხზე არ ყოფილა, _ აღნიშნა ირაკლი კუჭავამ.
ამ “შეთანხმების” შესახებ არაფერი იციან კოალიციის ჩოხატაურის ოფისში. შტაბის ხელმძღვანელი, გოჩა ჯიქია ამბობს, რომ კუჭავას კანდიდატურის შესახებ შტაბში საუბარი არ ყოფილა: _ კუჭავას შესახებ პირველად მესმის და მისი კანდიდატურა ჩვენთვის მიუღებელია. ირაკლი კუჭავა საერთოდ არ ყოფილა ჩართული ჩვენი შტაბის მუშაობაში.
როგორც გავარკვიეთ, ჯიქიამ ჩოხატაურის გამგებლის კანდიდატად თამაზ ჯინჭარაძე დაასახელა: _ შტაბმა და მე, როგორც შტაბის ხელმძღვანელმა, ჩოხატაურის გამგებლის პოსტზე წარვადგინეთ თამაზ ჯინჭარაძე, _ გვითხრა ჯიქიამ.
_ კი, მაგრამ ჩოხატაურს მოქმედი გამგებელი ჰყავს. ეს კანონთან შესაბამისობაში როგორ მოდის _ რის საფუძველზე უნდა წავიდეს იმედაშვილი?
_ ლელა იმედაშვილი იმ დანაშაულების საფუძველზე უნდა წავიდეს, რაც “ნაციონალურმა მოძრაობამ” ჩაიდინა.
_ გამგებლის ცვლილება კანონთან შესაბამისობაში როგორ უნდა მოვიდეს?
_ ახალი გამგებელი საკრებულოს მიერ იქნება არჩეული და კანონთან შესაბამისობაშიც მოვა.
_ ბატონო გოჩა, არის თუ არა დაპირისპირება კოალიციაში? ვიღაცას საკრებულოს თავმჯდომარეობა უნდა, ვიღაცას _ გამგებლობა… ჩვენი ინფორმაციით, თბილისში საქმეების “მოგვარება” უკვე დაწყებულია; მუდმივად ხელისუფლებაში ყოფნის პრეტენდენტები, ისეთები, რომლებიც ციხის კადრების გავრცელების შემდეგაც კი, დუმილს და ხელისუფლებასთან კეთილი ურთიერთობის შენარჩუნებას ამჯობინებდნენ, თქვენს ზოგიერთ თანაგუნდელთან ერთად, თქვენგან ფარულად ცდილობენ საქმე მოაგვარონ. თქვენს შტაბშიც იყვნენ ადამიანები, რომლებიც ხელისუფლებასთან ფარულ გარიგებებში იყვნენ შემჩნეულები. გაქვთ თუ არა ეს ინფორმაცია და იცით თუ არა, ვინ არიან ეს ადამიანები?
_ მაგაზე არის საუბარი. დღესაც ვისაუბრეთ ვინ როგორ იყო, მაგრამ მტკიცებულებების გარეშე ვერაფერს ვიტყვით. მე გეტყვით ერთ რამეს: როდესაც გამგებლის კანდიდატურაზე იყო საუბარი, მე ის ადამიანი წარვადგინე და იმას გავუწიე რეკომენდაცია, რომელშიც ასი პროცენტით ვარ დარწმუნებული, რომ არავისთან არ იყო შეკრული. მე არ ვარ ის ადამიანი, ყველას კუდში ვდიო. რაც მთავარია, ჩვენ ვაკონტროლებდით იმას, რაც უნდა გვეკონტროლებინა _ ისეთს არაფერს ვაკეთებდით, რომ ვიღაცას რაღაც დაეშავებინა. თუ ვინმემ იცის, კონკრეტულად ვინ ვისთან იყო გარიგებული, კეთილი ინებოს და თქვას, რადგან ეს მომავალს წაადგება.
_ თქვენ პირადად არ შემოგთავაზეს რაიმე თანამდებობა? შტაბის უფროსი ხომ თქვენ ხართ…
_ შტაბი იყო ჩემს კანდიდატურაზე ჩამოყალიბებული, მაგრამ იყო მიზეზები, რის გამოც ვთქვი უარი. სხვა დროს გაგიმხელთ ამ მიზეზებს.
რაც შეეხება თამაზ ჯინჭარაძეს, ის ამბობს, რომ ჯერ გადაწყვეტილი არაფერი აქვს: _ ჩემთან დაკავშირებით ნამდვილად იყო ამაზე საუბარი და ამას დაეთანხმა ბატონი თემურ ჭკუასელი, მაგრამ მე ჯერჯერობით გადაწყვეტილება არ მიმიღია. აღებული მაქვს რამდენიმე დღე ფიქრისთვის. შეიძლება გადაწყდეს, შეიძლება არ გადაწყდეს.
_ ბატონო თამაზ, თემურ ჭკუასელს, კანონიდან გამომდინარე, არანაირი უფლება არ აქვს საკადრო გადაწყვეტილებებში ჩაერიოს, გამგებლის არჩევასაც თავისი პროცედურები აქვს _ ორი კვირით ადრე კონკურსიც უნდა გამოცხადდეს…
_ ეს შიდა შეთანხმებაა.
_ თუკი გახდით გამგებელი, საინტერესოა, როგორი იქნება თქვენი პოზიცია იმ კადრებთან მიმართებაში, რომლებიც ყოფილი მმართველი პარტიიდან “ქართულ ოცნებაში” ცდილობენ გადმობარგებას. იქნებიან თუ არა “ქართული ოცნების” სახელით აღმასრულებელ ხელისუფლებაში წარმოდგენილი “ნაციონალური მოძრაობის” სახეები”?
_ ამას მაშინ გეტყვით, როცა კონკრეტულ გადაწყვეტილებას მივიღებ. თუმცა, არც ახლა ავარიდებ კითხვას თავს და გეტყვით, რომ ყველაფერს უნდა დაერქვას თავისი სახელი და ამაში ბევრი რამ იგულისხმება _ შეიძლება დრო გავიდეს, ცხოვრების წესით, პატიოსნებით ამ ადამიანებმა ხალხის ნდობა მოიპოვონ და ხუთი, ათი წლის შემდეგ ისევ პოლიტიკას დაუბრუნდნენ, მაგრამ ახლა კატეგორიულად მიუღებლად მიმაჩნია, რომ ხელისუფლება ისევ იმ პიროვნებებმა ჩაიბარონ, რომლებმაც “ნაციონალური მოძრაობა” მხოლოდ არჩევნების შემდეგ დატოვეს!
