როგორც მშობლები ამბობენ, ეს თანხა 200 000 ლარამდე იყო, რაშიც მხოლოდ გარე ფასადის რემონტი შედიოდა. ბაღი პირველ ნოემბერს უნდა გახსნილიყო, თუმცა, ჯერჯერობით, ბაღი არ ფუნქციონირებს. საბავშვო ბაღში უნდა შეეყვანათ გაზი და წყალი, თუმცა, ეს სამუშაოები არ ჩატარებულა, შეღებილია მხოლოდ გარე ფასადი.
ამ ამბით შეწუხებულმა მშობლებმა დახმარებისთვის “გურია ნიუსს”მიმართეს.
ეკა ვასაძე, მშობელი: _ ბაღის რემონტი კარგა ხანია, დაწყებულია. თუმცა, სარემონტო სამუშაოებს თავი და ბოლო არ უჩანს, მშობლები გაურკვეველ სიტუაციაში ვართ _ მაისში დავტოვეთ ბაღი, გავიდა ამდენი თვე და გვატყუებენ, დღეს გაიხსნება, ხვალ გაიხსნებაო. პირველ ნოემბერს უნდა გახსნილიყო, მაგრამ იგივე მდგომარეობაა. აღსანიშნავია, რომ მუშები არ ჩანან, მიტოვებულია სამუშაოები, პასუხს კი ვერავინ გვცემს.
თამილა მამულაშვილი, მშობელი: _ დამთავრდა მხოლოდ გარე ფასადის რემონტი, შიგნით საშინელი სიტუაციაა. როგორც ვიცით, გადმორიცხული იყო ძალიან დიდი თანხა, მაგრამ სად წავიდა, ვერ გეტყვით.
არც წყალია შენობაში და არც გაზია შეყვანილი, რაც პროექტით უნდა გაკეთებულიყო. გვითხრეს, რომ სამუშაოები დააფინანსა სახელმწიფომ, გაზისა და წყლის გაკეთებისთვის 40 ათასი ლარია საჭირო. ისე კი 200 ათასი ლარი იყო გამორიცხულიო _ ასეთი ინფორმაცია გვაქვს მშობლებს.
_ ახლა აბრალებენ მუშებს, არ დადიანო. გადაანაწილონ ეს ბავშვები სხვა ბაღებში. რა უნდა ვქნათ, აღარ ვიცით. ორშაბათიდან, ალბათ, სხვა ზომებს მივიღებთ, _ ამბობენ მშობლები “გურია ნიუსთან”.
ბაღის გამგე ნინო მშვიდობაძე აღნიშნავს, რომ “ბაღის თანამშრომლებმა და მშობლებმა თავისი გასაკეთებელი გააკეთეს”:
_ ჩვენ, თქვენ თვითონაც ხედავთ, ვალაგებთ, ვასუფთავებთ, რაც ჩვენზეა დამოკიდებული ყველაფერი გავაკეთეთ და ვემზადებით, როდის გაიხსნება ბაღი. არ გვაქვს წყალი, მეზობლიდან გვაქვს შემოყვანილი დროებით _ ჭურჭელი რომ დავრეცხოთ. არ ვიცით, რა ხდება, პასუხს ვერავინ გვცემს. ჩვენ ვიცით, რომ ამ ბაღის რემონტისთვის, დაახლოებით, 200 ათასი ლარი იყო გამოყოფილი, ხოლო ახლა წყლისთვის და გაზისთვის კიდევ 40 000 ლარია საჭირო. კომპეტენტური პირი არ არსებობს, ვინც გვეტყვის, ბაღი როდის გაიხსნება.
_ მუშებისთვის უფროსს უთქვამს, თუ წყალკანალმა და გაზის კომპანიამ არ მოიყვანა აქამდე წყალი და გაზი, ჩვენ რა უნდა ვქნათო. ასე აბრალებენ ერთმანეთს! _ ამბობენ მშობლები.
ოზურგეთის მუნიციპალიტეტის გამგებელი, ილია ვაშაყმაძე “გურია ნიუსთან” ამბობს, რომ ბაღი ამ დღეებში დაიწყებს ფუნქციონირებას.
ოზურგეთის მუნიციპალიტეტის საკრებულოს სპორტის, განათლების, ჯანდაცვისა და სოციალურ საკითხთა კომისიის თავმჯდომარე, ირინა საჯაია კი ამ საკითხთან დაკავშირებით აღნიშნავს, რომ ბაღის რემონტთან დაკავშირებული პრობლემები მუშების ბრალია: _ გვინდა ორშაბათს გავხსნათ. ვთვლი, რომ ეს არის მშენებლების უპასუხისმგებლობა. დამთავრებულია ყველანაირი სამუშაოები, დარჩენილია მხოლოდ გაზისა და წყლის შეყვანა. ამ დღეების განმავლობაში, საკრებულოს თავმჯდომარე და წევრები _ ყველა ვართ ამ პროცესში ჩართული. ვესაუბრეთ მშენებლების უფროსსაც, თუ იმუშავებენ ნორმალურად, შეიძლება, ორშაბათს გავხსნათ, თუ არადა, ალბათ, რამდენიმე დღე ისევ დააგვიანდება.
_ ვინ უნდა აგოს შეუსრულებელ სამუშაოებზე პასუხი?
_ მე როგორც ვიცი, მიღება-ჩაბარების აქტი არ აქვთ ჩაბარებული და ხელმოწერილი. თუ საქმეს ვერ მიიყვანენ ბოლომდე, ისევ მათ შეექმნებათ პრობლემა, მაგრამ ეს ჩვენთვის არ არის შეღავათი, _ ამბობს საჯაია.
“გურია ნიუსი” აგრძელებს ამ თემაზე მუშაობას, დოკუმენტების ოფიციალურად გამოთხოვის შემდეგ კი, მკითხველს ვუამბობთ, რეალურად დაიხარჯა თუ არა 200 000 ლარი წყლის და გაზის გარეშე დარჩენილი საბავშვო ბაღის რემონტზე.
