მუნიციპალიტეტს დროშა და გერბი ექნება

(გურია ნიუსი, ოზურგეთი) _ ოზურგეთის მუნიციპალიტეტის დროშისა და გერბის  შემუშავების საორგანიზაციო სამუშაო ჯგუფი უკვე 4 თვეა მუშაობს.
ამ ჯგუფმა, სექტემბერში, საკრებულოს სამუშაო ჯგუფის დებულება და კონკურსის ჩატარების წესი წარუდგინა.
როგორც “გურია ნიუსს” აღნიშნული ჯგუფის თავმჯდომარემ, ავთანდილ მექვაბიშვილმა უთხრა, საკონკურსო წესში განისაზღვრა ვადები და პრემიის ოდენობა: _ სამუშაო ჯგუფმა რამდენიმე შეხვედრა ჩაატარა, მათ შორის, საჯარო შეხვედრაც. საკრებულოს სხდომას უკვე წარვუდგინეთ ნამუშევრები. სულ წარმოადგინეს დროშის ნიმუშის ხუთი, ხოლო გერბის _ 36 ვარიანტი. განსაკუთრებით საინტერესოდ მივიჩნიეთ და გამოვყავით თამაზ დარჩიას ნამუშევრები. ასევე, ძალიან საინტერესო იყო თამაზ ლომჯარიას და ვახტანგ მამეშვილის ნაშრომები, _ გვითხრა ავთანდილ მექვაბიშვილმა, _ ნამუშევრები უნდა ასახავდეს მუნიციპალიტეტის ბუნებას, ისტორიის ან მატერიალური კულტურის ნიმუშს. ოზურგეთელი მხატვრები და დიზაინერები დღესაც აგრძელებენ მუშაობას. აქედან გამომდინარე, გვაქვს იმედი, რომ უახლოეს პერიოდში ოზურგეთის  მუნიციპალიტეტს გერბი და დროშა ექნება. ვფიქრობთ, შემუშავებული იქნება ის ვარიანტი, რომელიც საზოგადოებისთვის არის მისაღები. თუმცა, უნდა გითხრათ, რომ გერბის შემუშავება გაცილებით რთულია, ვიდრე _ დროშის. მანამ, სანამ საკრებულო დაამტკიცებს გერბს და დროშას, შესასწავლად და შესათანხმებლად საქართველოს პარლამენტთან არსებულ ჰერალდიკის საბჭოს გადაეგზავნება.