შეგახსენებთ, რომ ოზურგეთის რაიონული პროკურატურის პროკურორებს, ერთი კვირაა, განცხადებები აქვთ დაწერილი სამსახურიდან წასვლის შესახებ.
როგორც ცნობილია, საქართველოს მთავარი პროკურორი არჩილ კბილაშვილი საქართველოს პროკურატურაში მასშტაბურ საკადრო ცვლილებებს გეგმავს, რომელიც ერთ კვირაში უნდა გახორციელებულიყო.
“გურია ნიუსმა”, არჩევნების დღეს, ოზურგეთის 60/57 ანასეულის საარჩევნო უბანზე, ოზურგეთის მუნიციპალიტეტის ზედამხედველობის სამსახურის უფროსის შუქრი გაბრიჩიძის მანქანაში, უბანზე სამუშაო გეგმა აღმოაჩინა. შედგენილ სიას სწორედ ასე ერქვა სახელად _ “უბანზე სამუშაო გეგმა”.
“გურია ნიუსის” მიერ დაფიქსირებულ სიაში, ანასეულის უბანზე პასუხისმგებელ თანამდებობის პირებში ჩამოთვლილი არიან: ზედამხედველობის სამსახურის უფროსი შუქრი გაბრიჩიძე, პროკურორი მალხაზ სირაძე, სპორტისა და ახალგაზრდულ საქმეთა სამინისტროს წარმომადგენელი გურიის გუბერნიაში ოთარ რევიშვილი…
მალხაზ სირაძეს 2011 წელს 19 მაისს ოზურგეთში კოსტავას #125 საცხოვრებელი ბინის ეზოში შსს სამხარეო მთავარი სამმართველოს თანამშრომლების მიერ ჩატარებული სპეცოპერაციაც, რომლის დროსაც დაკავებულ გოჩა გუჯაბიძესა და ივანე გობრონიძეს, თვითმხილველების თქმით, პოლიციამ სპორტულ ჯიბეში ნარკოტიკი ჩაუდო. სწორედ ამ ახალგაზრდების საქმეს იძიებდა პროკურორი მალხაზ სირაძე.
გავრცელებული ინფორმაციით, მალხაზ სირაძეს ლობირებენ ყოფილი პროკურორი ია დოლიძე და კოალიცია “ქართული ოცნების” ოზურგეთის ორგანიზაციის ერთ-ერთი ლიდერი დავით დარჩია, რომელიც ია დოლიძის ახლობელია და ბიძინა ივანიშვილის კურსელი, მეგობარი. უფრო მეტიც _ ივანიშვილმა მას ოზურგეთში საარჩევნო კამპანიის წარმართვა ანდო.
გავრცელებული ინფორმაციით, ია დოლიძეც, შესაძლოა, პროკურატურაში დააბრუნონ.
დავით დარჩიამ, “გურია ნიუსთან” უარყო ინფორმაცია იმის შესახებ, რომ ის ლობირებას უწევს მალხაზ სირაძეს პროკურორად დანიშვნის თაობაზე, თუმცა აცხადებს:
_ მივესალმები მალხაზ სირაძის კანდიდატურას. ძალიან კარგი კადრია. თუ დატოვებენ, ყველანი მოხარულნი ვიქნებით. რაც შეეხება ლობირებას, ამას კატეგორიულად გამოვრიცხავ, _ ამბობს დარჩია “გურია ნიუსთან”.
ყოფილი პროკურორი ია დოლიძე, რომელიც მალხაზ სირაძის მეგობარი და ყოფილი კოლეგაა, “გურია ნიუსთან” აცხადებს: _ მერე რა, რომ ის “ქართულ ოცნებასთან” დაახლოებული პირია, ეს იმას არ ნიშნავს, რომ ამით მალხაზის იქედან ლობირებას უწევს ვინმეს. რაც შეეხება მის პროკურატურაში დაბრუნების საკითხს, ამ ინფორმაციას კატეგორიულად უარვყოფ, _ ამბობს ია დოლიძე.
მალხაზ სირაძემ თავდაპირველად ჩვენს ზარებს უპასუხა, თუმცა, როგორც კი გაიგო, რომ “გურია ნიუსიდან” ვინ ვიყავით, მაშინვე გაგვითიშა ტელეფონი. შემდეგ კი არაერთი მცდელობის მიუხედავად, სატელეფონო ზარებს არ უპასუხა.
პროკურატურის პრესსამსახურის თანამშრომლის ეკა ჩიჩუას განცხადებით, მას ოფიციალური პასუხი ამ საკითხთან დაკავშირებით არ აქვს: _ ვერ გავაკეთებ კომენტარს მანამ, სანამ ბატონი არჩილ კბილაშვილი ოფიციალურ განცხადებას არ გააკეთებს, _ გვითხრა ჩიჩუამ.
