_ ჩვენ არ გამოვდივართ სახელმწიფოს ან ენერგეტიკის სამინისტროს წინააღმდეგ, ეს იქნება კომპანიის შიდა მენეჯმენტის წინააღმდეგ მიმართული აქცია, _ აცხადებს საინიციატივო ჯგუფი “გურია ნიუსთან”.
მათი განცხადებით, ზურაბ არსოშვილი “თელასის” გენერალურმა დირექტორმა აშოტ მანუკიანმა 80 000 ლარით “გააცილა” სამსახურიდან. როგორც ისინი ამბობენ, ეს თანხა, ანუ ათი თვის კომპენსაცია არსოშვილმა გაწყვეტილი ხელშეკრულების სანაცვლოდ მიიღო. რაც შეეხება არსოშვილის ყოფილ მოადგილეს, ავთანდილ მეტივიშვილს, რომელიც არსოშვილის “მარჯვენა ხელი” და დამხმარე ძალა იყო, ყოფილი თანამშრომლების განცხადებით, აშოტ მანუკიანმა ის მრჩევლად დანიშნა.
როგორც “თელასის” ყოფილი თანამშრომლები ამბობენ, დღეს მათ შეხვედრა ჰქონდათ გენერალურ დირექტორთან, აშოტ მანუკიანთან, რომელმაც განაცხადა, რომ ამ ხალხს სამსახურიდან ვერ გაუშვებდა.
_ ასე გვითხრა, ამ შეხვედრის დასრულების შემდეგ, განცხადებას დავწერ და თანამდებობიდან გადავდგებიო. ჩვენს კითხვაზე, რა დამსახურებისთვის დააჯილდოვა ზურაბ არსოშვილი 80 000 ლარით, რომელმაც სულ ოთხი თვე იმუშავა, მანუკიანმა გვითხრა, ეგ ჩემი პირადი გადაწყვეტილებაა და ვალდებული არ ვარ, პასუხი გაგცეთო. ჩვენს სამსახურში დაბრუნებასთან დაკავშირებით კი გვითხრა, თუ ვაკანსიები გამოჩნდება, დაგაბრუნებთო.
არადა, ენერგეტიკის მინისტრი, კახი კალაძე მაშინვე შეგვხდა, როგორც კი ჩვენს შესახებ შეიტყო და პირდაპირ განუცხადა კომპანიის ხელმძღვანელობას: მე სისხლხორცეულად ვარ დაინტერესებული, აღდგეს სამართალი და ეს 125 ადამიანი დაბრუნდეს სამსახურშიო, თუმცა მისი ეს სიტყვები არავინ გაითვალისწინა სამწუხაროდ, _ აცხადებენ “თელასის” ყოფილი თანამშრომლები.
“გურია ნიუსი” თელასის საზოგადოებასთან ურთიერთობის სამსახურის ხელმძღვანელს, ვალერი ფანცულაიას დაუკავშირდა, რომელმაც გაგვიცხადა, რომ არასამუშაო საათები იყო და მხოლოდ სადისპეჩერო მუშაობდა:
_ თუ ამ მხრივ გაქვთ რაიმე პრობლემა, შემიძლია გადავრეკო და გავარკვიო, _ გვითხრა მან, რომელიც ალბათ ელექტროენერგიის მოწოდების პრობლემას გულისხმობდა.
მოსალოდნელი და არსებული საკადრო ცვლილებების შესახებ ვალერი ფანცულაია, დღეს, 20:30 წუთზე ინფორმაციას არ ფლობდა და ხვალისთვის დაკავშირება შემოგვთავაზა. რაც შეეხება ზურაბ არსოშვილის “საპატიო” ჯილდოთი გაცილებას, მან თქვა, რომ ეს პირადი შეთანხმების საკითხია და დეტალები კონფიდენციალური.
წინასაარჩევნო პერიოდში გათავისუფლებული 120-მდე პროფესიონალი თანამშრომელი, მუქარის ქვეშ დაწერილი უთარიღო განცხადებები, ყოველდღიურად გათავისუფლების მოლოდინში მყოფი, პოლიციურ რეჟიმში მომუშავე კოლექტივი და ჩაბნელების საფრთხის წინაშე მდგარი დედაქალაქი…
_ ასეთია გახლდათ ზურაბ არსოშვილის “თელასში” ოთხთვიანი “მოღვაწეობის” შედეგი. ყოფილი თანამშრომლები “გურია ნიუსთან” საუბარშიჯერ კიდევ 16 ოქტომბერს ყვებოდნენ, რომ გათავისუფლებული პროფესიონალების ნაცვლად, ინიშნებოდნენ პოლიციის თანამშრომლები, ზურაბ არსოშვილის ახლობლები და მეგობრები.
ვმუშაობდით სს “თელასში” წლების მანძილზე, კეთილსინდისიერად და პატიოსნად. 2012 წლის 20 ივნისს, სს. “თელასში” შეიცვალა დირექცია, რომელიც გადმოვიდა საქართველოს ენერგეტიკის სამინისტროდან, რის შემდეგ დაიწყო თანამშრომლების უმიზეზოდ, ეტაპობრივი გათავისუფლება. კერძოდ, ზოგიერთ ბიზნეს-ცენტრების მენეჯერებს დაავალეს, რომ ყველა თანამშრომელს და მათ შორის თვითონაც დაეწერა განცხადება თარიღის დასმის გარეშე სამსახურიდან პირადი სურვილით გათავისუფლების თაობაზე ყოველგვარი ახსნა-განმარტებების გარეშე. იმ მიზეზის გამო, რომ ვიცოდით არსებული ხელისუფლების პირობებში კანონი არ დაგვიცავდა, ჩვენ იძულებულები გავხდით დაგვეწერა განცხადებები, რასაც რამდენიმე დღეში მოჰყვა ჩვენი გათავისუფლება. ჩვენს ადგილზე კი ეგრევე დანიშნეს პირები, რომლებსაც ენერგეტიკასთან არავითარი შეხება არ ჰქონიათ.
ზემოთ აღნიშნულიდან გამომდინარე, მიგვაჩნია, რომ ჩვენ გავხდით არსებული ხელისუფლების უკანონობის მსხვერპლნი, შეილახა ჩვენი უფლებები, დაგვტოვეს უმუშევრები. მსგავსს სიტუაციაში რამდენიმე ათეული თანამშრომელია. ამიტომ, გთხოვთ დახმარებას ჩვენს სამსახურში აღდგენასთან დაკავშირებით”, _ ამბობდნენ ისინი “გურია ნიუსთან”.
