მისი თქმით, სოციალური დაცვის სამსახურში მათ განუცხადეს, რომ ივნისიდან მოყოლებული, ხუთი თვის პენსია, რომელიც უკვე აღებული აქვთ, უკან უნდა დააბრუნონ. გაუწიეს მხოლოდ ერთი “შეღავათი” _ განცხადებაში ჩააწერინეს, რომ თანხას ნაწილ-ნაწილ დააბრუნებენ. ბრძანება ამის შესახებ, თურმე, ივნისის თვეში სოციალური მომსახურების სააგენტოდან მიიღეს. ჩვენი რესპოდენტის განმარტებით, ანალოგიური განცხადება მასთან ერთად კიდევ ერთი სკოლის დირექტორს დააწერინეს.
_ გული გამისკდებოდა, მეგონა. თუ ეს ბრძანება ივნისში უკვე გაცემული იყო, რაღა ახლა შეგვახსენეს, როცა ხუთი თვის პენსია უკვე მიღებული გვაქვს? ახლა ადვილი მისახვედრია, რომ ფეხი არჩევნების გამო აითრიეს და დაგვიმალეს, _ უთხრა “გურია ნიუსს” ერთ-ერთმა თანამდებობაზე მყოფმა საჯარო პირმა, რომელიც ამავდროულად პენსიონერიცაა.
სოციალური მომსახურების სააგენტოს გურიის რეგიონული ცენტრის ხელმძღვანელი ვასილ ხომერიკი ამ ინფორმაციას უარყოფს და ამბობს, რომ თუ ვინმე კონკრეტულ პირს აქვს პრობლემა, წერილობით წარმოადგინოს და ყველანაირად დავეხმარებითო.
_ ბატონო ვასილ, თქვენი სამსახური თხოვს თუ არა პენსიაში მყოფ საჯარო სკოლების დირექტორებს ,ხუთი თვის პენსიის უკან დაბრუნებას იმ მოტივით, რომ ეს კანონით დაუშვებელია?
_ კითხვა გაუგებარია (?) მე ვერ გავასაჯაროებ პირად ინფორმაციას, ისე კი ნებისმიერ ადამიანს მივაწვდი ინფორმაციას, ვინც განცხადებით მომმართავს. ვისაც აქვს პრობლემა, შეუძლია, მობრძანდეს სააგენტოში და გავარკვევთ, დავეხმარებით. თქვენ ვინ მოგმართათ, დაგვისახელეთ პიროვნება.
_ ის პიროვნება ჯერ არ ასაჯაროებს თავის ვინაობას. ისე კი ნამდვილად აცხადებს, რომ გუშინ დაბარებული იყო აქ და დაწერა განცხადება, რომ ხუთი თვის პენსიას ნაწილ-ნაწილ უკან დაუბრუნებს სახელმწიფოს.
_ ვერ გეტყვით, ასეთ კითხვას ვერ გავცემ პასუხს. ადამიანი როცა ჩვენთან მოდის, საბუთები უნდა წარმოადგინოს. თუ აღმოჩნდა, რომ წარმოდგენილი შეცდომაა, მაშინ…
_ ესე იგი, ამ ადამიანებს თავის დროზე პენსია არასწორი საბუთებით დაენიშნათ თუ როგორ გავიგო ეს ნათქვამი?
_ თუ უკანონოდ არის აღებული, ექვემდებარება დაბრუნებას. ვისაც რა პრობლემა აქვს, მოვიდეს და გავარკვევთ, დავეხმარებით.
_ როგორც გვითხრეს, სამინისტროდან, იურიდიული დეპარტამენტის თავმჯდომარისგან, ავთანდილ ვასაძისგან მიიღეთ ასეთი ბრძანება.
_ კი, ასეთი მოხელე ნამდვილად არსებობს. ვინ გითხრათ, რომ მისგან მივიღეთ?
ჩვენი საუბარი ისე წარიმართა, უნებლიედ, იძულებული გავხდი, არ დამეკონკრეტებინა ოზურგეთის სოციალური სამსახურის იმ თანამშრომლის გვარი, ვინც სრულიად გულწრფელად დამისახელა ავთანდილ ვასაძის პიროვნება.
ამის შემდეგ, “გურია ნიუსი” ჯანდაცვის სამინისტროს პრესსამსახურს დაუკავშირდა. ხელმძღვანელმა სოფო გვალიამ კითხვა ჩაინიშნა და შეგვპირდა, რომ ყველაფერს დააზუსტებდა და თვითონ დაგვირეკავდა. საკმაო ლოდინის შემდეგ, ჩვენ არაერთხელ დავრეკეთ სამინისტროში. ცხელი ხაზის ოპერატორი გვპასუხობდა, რომ მონაცემები ჩანიშნულია და თვითონ დაგვირეკავდნენ. რადგან პასუხი მაინც ვერ მივიღეთ, არაერთხელ ვცადეთ ქალბატონ სოფო გვალიასთან დაკავშირება, თუმცა, უშედეგოდ.
ჩვენ შევეცადეთ ინფორმაცია ჯანდაცვისა და სოციალური დაცვის მინისტრთან დავით სერგეენკოსთან გადაემოწმებინა. მან ჩვენს სატელეფონო ზარებს არ უპასუხა, რის შემდეგაც ტექსტური შეტყობინებაც გავუგზავნეთ, მაგრამ პასუხი, ჯერჯერობით, არც მასზე მიგვიღია.
