სამართლიანობა გამორჩეული და უფრო ფუნდამენტური კატეგორიაა ვიდრე სიკეთე, ქველმოქმედება, მოწყალება, ხელგაშლილობა და თანაგრძნობა. სწორედ სამართლიანობას, მის არსებობას ან აღდგენას შეუძლია დააკმაყოფილოს ადამიანის ფუნდამენტური მოთხოვნები.
2012 წლის 17 ოქტომბერი… გზა მცხეთისკენ… რესტორანი “ტევრი”… უხვად გაშლილ სუფრას, სხვებთან ერთად, შსს-ს მომსახურების სააგენტოს დირექტორი, ლევან სანაძე და მისი მოადგილე, არჩილ ხაბეიშვილიც ამშვენებენ. შესაძლოა, რიცხვი ზუსტად არ მახსოვას და ერთ-ორი დღით ვცდები, თუმცა ამას საქმესთან არსებითი მნიშვნელობა არ აქვს. რესტორნში მე და ჩემი მეგობარიც ვართ.
ცნობისმოყვარეობისა და შესაბამისად, დაცქვეტილი ყურების მიუხედავად, სააგენტოს „ლომების“ თავშეყრის მიზეზი ბოლომდე ვერ გავარკვიე. ის კი ცხადი იყო, რომ რაღაცას ზეიმობდნენ. მიუხედავად იმისა, რომ ბევრჯერ და ბევრისგან ადრეც მქონდა გაგონილი, გაოცებისაგან მაინც გავშეშდი, როცა სანაძე და ხაბეიშვილი სკამებზე მარდად ახტნენ და „მარჩენალი მამის“, ვანო მერაბიშვილის, კაცობისა და დიდების სადღეგრძელო ასე სამაგალითოდ შესვეს.
მინდა გითხრათ, გულში გამეცინა და ვიფიქრე: “ცოტაც და თქვენც წარსულს ჩაბარდებით…”
სხვათაშორის, სანაძე, ხაბეიშვილისა და მღებრიშვილის მიერ უფლებამოსილების გადამეტების შესახებ ხშირად და ბევრი მსმენია. საუბარი იყო პოლიტიკურად არასაიმედო თანამშრომლების გათავისუფლებასა და საკუთარი და ნაციონალების სახეების ოჯახის წევრების დასაქმებაზე (დონაძის და ბურჯალიანის დები, მღებრიშვილის მეუღლე, ხაბეიშვილის ძმები და სხვანი) და იმაზე, თუ როგორ აიძულებდნენ თანამშრომლებს, თავად დაეწერათ განცხადება და თუ ისინი ამას არ გააკეთებდნენ, მათ საქმეების გენერალურ ინსპექციაში გადაგზავნით ემუქრებოდნენ და აშანტაჟებდნენ.
ასევე, საუბარი იყო არჩევნების დროს არაორაზროვანი მითითებების გაცემაზე იმასთან დაკავშირებით, თუ ვისთვის უნდა მიეცათ ხმა თანამშრომლებს, მუდმივი საუბარი მოგებულ ომზე, დამარცხებულ რუსეთზე და ვანო-მიშას უძლეველობასა და სიმაგრეზე; დაახლოებით წელიწადნახევარში ერთხელ ავტოპარკის ცვლაზე (როგორც ჩანს, წლინახევრის „კამრები“ მათი შესაფერისი აღარ იყო); სამსახურის მიერ სანაძისათვის გამოყოფილი ორი მანქანიდან ერთის მისი ოჯახისათვის გამწესებაზე; სამსახურის მანქანით ხაბეიშვილის ოჯახის წევრების გაუთავებელ წინ და უკან სიარულზე და ამ ბატონის გაურკვეველ ვოიაჟებზე ევროპაში ავტომრბოლელებთან ერთად სააგენტოს ხარჯზე. თუ ვინმე „მარჩენალი მამის“ იდეოლოგიის საწინააღმდეგო აზრის გამოთქმას გაბედავდა, ხაბეიშვილს პასუხი მზად ჰქონდა: „მადლობა თქვით, რომ მუშაობთ და ხელფასს იღებთ!“ რთული არ არის ვივარაუდოთ, რომ ხაბეიშვილის აზრით, სხვაგვარად მოფიქრალი ადამიანები საშიმშილოდ უნდა ყოფილიყვნენ განწირულები.
მოკლედ, 17 ოქტომბერს, რესტორან „ტევრში“ ვანო მერაბიშვილის სადღეგრძელოს სკამზე შემოსკუპებულები სვამდნენ ადამიანები, რომლებიც დაახლოებით შვიდი წელი ყველაფერს აკეთებდნენ იმისათვის, რომ ვანო-მიშას ხელისუფლება არ შეცვლილიყო და, შესაბამისად, მათაც არ მოკლებოდათ ზემოაღნიშნული პრივილეგიების საძოვარი.
მჯერა, რომ ადამიანები იცვლებიან და, შესაბამისად, იცვლება მათი აზროვნებაც. თუმცა, ეს ის შემთხვევა არ გახლავთ. რატომ?
ჯერ კიდევ 2010 წლის ადგილობრივი არჩევნების დროს, როცა ირაკლი ალასანია ქალაქ თბილისის მერად იყრიდა კენჭს, ხაბეიშვილი თავგამოდებული არწმუნებდა ყველას, საკუთარი თანამშრომლების ჩათვლით, რომ ალასანია ახალგაზრდობაში „კულინარელი ძველი ბიჭი“ იყო, უშიშროებაში მუშაობის დროს კი ქურდული სამყაროს მიერ იმართებოდა და, შესაბამისად, მისი მოსვლა ხელისუფლებაში დიდ საშიშროებას წარმოადგენდა. როგორც ამბობდნენ, საკუთარი სიტყვების სარწმუნოობას ხაბეიშვილი იმ ფაქტით ამყარებდა, რომ თავადაც უშიშროებაში მუშაობდა იმ დროს, კარგად იცნობდა შიდა სამზარეულოს და ყველაფერი კარგად იცოდა.
მოკლედ, ვუყურებდა ამ ადამიანებს რესტორან “ტევრში,” 17 ოქტომბერს და მეღიმებოდა. სამწუხაროდ, დღეს სანაძე სააგენტოს დირექტორის მოადგილეა, ხოლო ხაბეიშვილს დაწინაურებას უწინასწარმეტყველებენ (ესეც ჩემი წყაროს მიერ მოწოდებული ინფორმაციაა).
ამ სტატიის მიზანი დღევანდელი ხელისუფლებისათვის სამართლიანობის აღდგენის პროცესში დახმარების გაწევაა, რადგან საქართველოს მოსახლეობა კოალიცია “ქართული” ოცნებისაგან ყველაზე მეტად სწორედ ამას ელის. შეუძლებელია ერთმა ადამიანმა ან ადამიანთა ჯგუფმა ყველაფერი იცოდეს. ინფორმაცია კი ყველაზე ძვირადღირებული პროდუქტია. ხოდა, მეც იმ ინფორმაციას გაწვდით, რომელიც სწორი და სამართლიანი გადაწყვეტილებების მიღებაში დაგეხმარებათ.
მე არ მინდა “ნაციონალების” დაბრუნება და ყველაფერს გავაკეთებ, რომ ეს არ მოხდეს. თუმცა, ვანოს ერთგული კადრების თანამდებობებზე დატოვებამ და, მითუმეტეს, დაწინაურებამ, შესაძლოა, სწორედ ეს გამოიწვიოს. პარლამენტის სხდომების ყურება კი სწორად იმაზე მიუთითებს, თუ რა გააფთრებით ცდილობენ ამას ნაციონალები. ძალოვან სტრუქტურებში მომუშავე და მათი მოტრფიალე ძველი კადრების დახმარება კი მათთვის პირდაპირ მისწრება იქნება. ვერავინ დამაჯერებს, რომ სანაძემ და ხაბეიშვილმა ასე ძირფესვიანად შეიცვალეს საკუთარი მრწამსი 17 ოქტომბერს წარმოთქმული იმ გულმხურვალე სადღეგრძელოს შემდეგ.
იმედია, რომ შსს-ს გენერალური ინსპექცია გაითვალისწინებს ზემოაღნიშნულს და სამართლიანობის პრინციპების დარღვევის გარეშე მოახერხებს შსს მომსახურების სააგენტოში ადამიანური რესურსების არასწორი გამოყენების, პოლიტიკური ნიშნით ადამიანების გათავისუფლებისა და ფინანსების არამიზნობრივი ხარჯვის ფაქტების გამოვლენას და სათანადო ზომების გატარებას.
“ნაციონალების” ერთგული კადრების მნიშვნელოვან აღმასრულებელ თანამდებობებზე დატოვება და მათი დაწინაურება აუცილებლად გამოიწვევს არა მხოლოდ ყოფილი ხელისუფლების მიერ დაჩაგრული ადამიანების პროტესტს და ყველა იმ ადამიანის აღშფოთებას, რომლებიც იმედის თვალით უყურებენ მომავალს, არამედ მძიმე შედეგებს მოუტანს ჩვენს სამშობლოს, რადგან “არ გათეთრდების ყორანი…”
მე კი ჩემს საკუთარ, აზრს მოგახსენებთ: არა მგონია, რომ ის ადამიანები, რომლებიც 17 ოქტომბერს ვანო მერაბიშვილის სადღეგრძელოს სკამებზე დამდგრები სვამდნენ, იმ ადამიანების მორალურ სივრცეში მოექცევიან, რომლებიც საქართველოს მოსახლეობისათვის იღწვიან. ამ ეტაპზე დარწმუნებით არ შემიძლია დავასახელო ადამიანები, რომლებიც სანაძეს და ხაბეიშვილს ლობირებენ, თუმცა არც ამის დაზუსტებაა რთული.
ამ კადრებთან დაკავშირებით ინფორმაცია “გურია ნიუსმა” შს სამინისტროს პრესსამსახურში გადაამოწმა. სალომე მახარაძემ „გურია ნიუსთან“ განაცხადა, რომ ლევან სანაძე, რომელიც მანამდე შსს მომსახურების სააგენტოს უფროსი იყო, ახლა ამ სააგენტოს უფროსის მოადგილეა, ხოლო მისი ყოფილი მოადგილე, არჩილ ხაბეიშვილი, ჯერჯერობით, კადრების განკარგულებაშია. „გურია ნიუსის“ ინფორმაციით, მას დაწინაურებას უპირებენ.
