საქართველოს მთავარი პროკურორი არჩილ კბილაშვილი ამბობს, რომ ოლქის პროკურორად ჯალაღანიას დანიშვნა მისმა შეუბღალავმა წარსულმა განაპირობა. როგორც აღმოჩნდა, მთავარი პროკურორი ჯალაღანიას შესახებ სრულ ინფორმაციას არ ფლობდა:
_ როდესაც ვარჩევდი ოლქის პროკურორს, მინდოდა ყოფილიყო ისეთი ადამიანი, რომელსაც გამოცდილება ექნებოდა დასავლეთის ოლქში მუშაობის. იქნებოდა პროფესიონალი და იმავდროულად მისი რეპუტაცია არ იქნებოდა რაიმე ნიშნით შებღალული. რამდენიმე კანდიდატურა დამისახელეს _ მათ შევხვდი, მათ შორის ილია ჯალაღანიასაც და მან დატოვა ჩემზე კარგი შთაბეჭდილება. მას უმუშავია ოზურგეთში 5 წლის განმავლობაში პროკურორად და ამ ნიშნით ის აკმაყოფილებდა ასე ვთქვათ რა მოცემულობაც იყო და ასევე, აქ, მთავარ პროკურატურაში, ადამიანები, რომლებიც მას იცნობდნენ მიხასიათებდნენ დადებითად, _ გვითხრა კბილაშვილმა.
_ ბატონო არჩილ, როგორც ჩანს კარგად არ შეგისწავლიათ ჯალაღანიას წარსული. გუშინ, “გურია ნიუსის” ვებ გვერდზე გამოქვეყნდა სიუჟეტი, სადაც ადამიანები ჯალაღანიას ბრალს უკანონო ქმედებებში დებენ. ასეთი ადამიანების რიცხვი, გურიაში საკმაოდ დიდია. მხოლოდ ჩოხატაურს, მისი მოღვაწეობისას სამი პოლიტპატიმარი ჰყავდა _ ერთს იარაღი ჩაუდეს, მეორეს ტროტილი, მესამე 1974 წელს გამOშვებული ტყვიის შენახვის გამო გაუშვეს ციხეში. ყველა ამ საქმემ ილია ჯალაღანიას ხელში გაიარა. თქვენ მიერ დანიშნული საოლქო პროკურორი უშუალოდ იყო ჩართული რაი-კავშირის მფლობელებისთვის ქონების ჩამორთმევის არაკანონიერ პროცესში. შესაბამისად კითხვები, რა პრინციპით შეარჩიეთ ჯალაღანია ყველას აქვს. ამას შეგვიძლია დავუმატოთ ჟურნალისტების შეურაცხყოფისა და ცემის ფაქტები. უფრო რომ დავკონკრეტდეთ გეტყვით, რომ ეს ეხებოდა “გურია ნიუსის” ჟურნალისტებს და ეს საქმეები, რომელშიც ლომის წვლილი ჯალაღანიას ქვემდებარე პროკურორებს მიუძღვით გამოუძიებელია. სწორედ პროკურორები აკითხავდნენ მოწმეებს სახლში და ჩვენებების შეცვლას აიძულებდნენ. თქვენმა გადაწყვეტილებამ ჯალაღანიას ოლქის პროკურორად დანიშვნის შესახებ ადამიანებს სამართლის განცდა დაუკარგა. საქმეები, რომელთა ხელახალი გამოძიება მათ სურთ, ისევ იმ პირის ხელში უნდა მოხდეს, რომელიც ამ ყველაფრის ერთ-ერთი მონაწილე იყო.
_ ეს არის ინფორმაცია კონკრეტული ფაქტების შესახებ, რომლებიც მეტყველებს ილია ჯალაღანიას მიერ, დავარქვათ ასე, არასწორ ქმედებებზე. იუსტიციის სამინისტროს გენერალური ინსპექცია არის მოწოდებული იმისათვის, რომ ყველა მოქმედი პროკურორის მიმართ ნებისმიერი სახის კომპრომატი, იქნება ეს უბრალო სამსახურებრივი გადაცდომა, იქნება ეს დანაშაული და ასე შემდეგ, იქნეს შესწავლილი და დადგენილი. ამიტომაც, ჩემი პირდაპირი რეკომენდაცია იქნება _ თქვენ, იმ ადამიანებმა, ვინც იციან, რომ ილია ჯალაღანიამ ჩაიდინა არაკანონიერი ქმედება, კონკრეტული ინფორმაცია მიაწოდოს და გაუგზავნოს გენერალური ინსპექციის უფროსს ნიკოლოზ პიწკინიშვილს. ეს სამსახური ვალდებულია, მიიღებს რა ინფორმაციას ჩაატაროს გამოძიება და ეს საკითხი უნდა გადაწყდეს ან ასე, ან ისე. ამიტომაც, მე ვთვლი, რომ სწორი გზა ამ საკითხისა არის ამგვარი გადაწყვეტა და ამას მოგიწოდებთ თქვენც, რომ თქვენი ჟურნალისტური გამოძიების შედეგად მოპოვებული ინფორმაცია გადაუგზავნოთ გენერალურ ინსპექციას, _ აღნიშნა კბილაშვილმა.
კბილაშვილის მოწოდება, რომ ჟურნალისტური გამოძიების შედეგად მოპოვებული ინფორმაცია გენერალურ ინსპექციას გადავუგზავნოთ, ჩვენთვის მისაღებია და ასეც მოვიქცევით, თუმცა, საინტერესოა, თავად გენერალური ინსპექცია არ უნდა დაინტერესდეს მედიაში გამოქვეყნებული მასალებით და ელოდოს, მას ესა თუ ისე მედიასაშუალება როდის მიაწვდის ინფორმაციას მისი თანამშრომლების შესახებ?
