განცხადება გადმოვიტანეთ უცვლელად, ე. წ copy-paste-ის პრინციპით, სადაც ეწერა: “ქალაქ თბილისის მერი გიგი უგულავა, მიმდინარე წლის 15 ნოემბერს, ოფიციალური ვიზიტით იტალიაში გაემგზავრა.” სოციალურ ქსელში, მერიის ოფიციალური ვებგვერდის ბმულის დადების შემდეგ აღმოვაჩინეთ, რომ ინფორმაციაში სიტყვა “ორდღიანი” გაჩნდა.
შესაბამისად, მივიღეთ ასეთი ინფორმაცია: “ქალაქ თბილისის მერი გიგი უგულავა, მიმდინარე წლის 15 ნოემბერს, ორდღიანი ოფიციალური ვიზიტით იტალიაში გაემგზავრა.” იმ შემთხვევაშიც კი, თუკი სიტყვა “ორდღიანი” ტექნიკური ხარვეზის გამო ამოვარდა ჩვენს მიერ გადმოტანილი ციტატიდან, ყველაზე მნიშვნელოვანი დეტალი, ვის ხვდება მერი იტალიაში და რა მიზნით გაემგზავრა, ან ვისთან ერთად, დაკონკრეტებული მაინც არ არის.
ჩვენ ვცდილობდით, დავკავშირებოდით თბილისის მერიის პრესსამსახურს, მაგრამ უშედეგოდ, მათ ჩვენს სატელეფონო ზარებს არ უპასუხეს.
თუმცა, “ნეტგაზეტისთვის” გაკეთებულ კომენტარში ვკითხულობთ:
“თბილისის მერიის პრესსამსახურის განცხადებით, მოგვიანებით გახდება ცნობილი დეტალები, თუ ვისთან გამართავს შეხვედრებს თბილისის მერი იტალიაში და ვინ იმყოფება მასთან ერთად დელეგაციაში.”
ქალაქის მერის ოფიციალური ვიზიტის ასეთი გასაიდუმლოებული შეხვედრა, საიდუმლო თანმხლები პირებით, ცოტა არ იყოს, უცნაურია. ოფიციალური ვიზიტები, რამდენიმე ხნით ადრე იგეგმება და შესაბამისად, პროგრამაც გაწერილია და თანმხლები პირების ვინაობაც ცნობილია.
ზოგადად, ინფორმაციების შეცვლა, ჩამატება, ამოღება, მერე ისევ ჩამატება, ზოგიერთი სახელმწიფო სტრუქტურის ვებგვერდისთვის “უცხო ხილი” ნამდვილად არ არის.
ასე მაგალითად, 2012 წლის 3 სექტემბერს, შსს-ს ოფიციალურ ვებგვერდზე, ამჟამად დაკავებულ ვიცე-მერის, შოთა ხიზანიშვილის განცხადება რომელსაც თან ახლდა ვიდეოფაილი, საერთოდ გაქრა. მაშინ “გურია ნიუსი” წერდა:
“შინაგან საქმეთა სამინისტროს მიერ, ოფიციალურ ვებგვერდზე განთავსებული განცხადება, რომელსაც თან ვიდეო ფაილი ახლდა და რომლის ავტორი, მინისტრის მოადგილე, შოთა ხიზანიშვილი იყო, ვებ გვერდიდან გაქრა.
მანამდე, სამი დღით ადრე, ხიზანიშვილი ამბობდა, რომ ლოპოტაში ჩატარებული სპეცოპერაციის რიგი საკითხები ძიების პროცესშია. დანამდვილებით შეგვიძლია გითხრათ, რომ ჩვენ მიერ ლიკვიდირებული 11 (თერთმეტი) ადამიანიდან არც ერთი არ არის საქართველოს მოქალაქე. თუმცა ნებისმიერი ქვეყნის მოქალაქე, რომელიც გადაადგილდება საქართველოს ტერიტორიაზე შეიარაღებული, იტაცებს ადამიანებს, აყავს მძევლები, არ ემორჩილება პოლიციის კანონიერ მოთხოვნებს, მძევლების გათავისუფლების ოპერაციის დროს კლავს შინაგან საქმეთა და თავდაცვის სამინისტროს ოფიცრებს – ასეთ შემთხვევაში სახელმწიფოს რეაქცია მათ მიმართ იქნება ისეთი, როგორიც იყო და მომავალშიც თუ ანალოგიურ ფაქტს ექნება ადგილი, საქართველოს ხელისუფლება ანალოგიურად იმოქმედებს. გამომდინარე იქიდან, რომ საქართველოში მცხოვრები ყველა ადამიანის უსაფრთხოება უნდა იყოს დაცული და უზრუნველყოფილი”.
შეგახსენებთ, რომ შსს-მ დღეს გაავრცელა ინფორმაცია, სადაც ადასტურებენ, რომ ლოპოტას ხეობაში ჩატარებული სპეცოპერაციის დროს ლიკვიდირებულებიდან, 2 საქართველოს მოქალაქე იყო.”
