_ ასე განაცხადა შოთა ხიზანიშვილის სასამართლო პროცესიდან გამოსულმა გიგი უგულავამ, რომლის თავდებაც გირაოთი გათავისუფლების შესახებ მოსამართლემ არ გაითვალისწინა. ყოფილ ვიცე-მერს დღეს აღმკვეთ ღონისძიებად პატიმრობა შეეფარდა.
“თვითონ საქმე არის პირადად ივანიშვილის მიერ ინიცირებული. როგორც ჩანს, იგი ცდილობს ნამუსი მოიწმინდოს და თავის კოლეგებს დაუმტკიცოს, რომ ის მათ არ უსმენს. მათ კოლეგებს მინდა შევახსენო, დაგუგლონ “რასისკი კრედიტი” და ამოუგდებს უამრავ მაგალითს, როცა იგი მართავდა, მისი მართვის მეთოდი იყო მოსმენა, ერთმანეთის ჩაშვება და თანამშრომლების კინკლაობა. დღეს პრემიერ-მინისტრია და ამიტომ ცდილობს, რომ ნამუსი მოიწმინდოს თუმცა საქმე არსებითად განხილვაში ალბათ ორ-სამ თვეში წავა, ნათელი უნდა მოეფინოს, რა თქმა უნდა, ამ ყველაფერს, ამის წინააღმდეგი არავინ არ არის. არანაირი საფუძველი არ არსებობდა შოთა ხიზანიშვილის აღმკვეთი ღონისძიების წინასწარი პატიმრობის შეფარდებისთვის. ყველამ კარგად იცის, მათ შორის ჟურნალისტებმა, რომ ხიზანიშვილი სამინისტროში არ აწარმოებდა არანაირ ოპერატიულ საქმიანობას. სამინისტროში მისი თანამდებობა არასდროს არ ითვალისწინება ოპერატიულ თანამშრომლებთან თანამშრომლობას. აქედან გამომდინარე, მის მიმართ ბრალდება არის შეთითხნილი და ემსახურება მხოლო და მხოლოდ პოლიტიკურ მიზანს, პოლიტიკური მიზანი ძალიან მარტივია, ეს უკავშირდება პირადად ვანო მერაბიშვილს, მასთან დაახლოებული პირია, მისი ადმინისტრაციის უფროსი იყო შვიდი წლის განმავლობაში, მიკავშირდება ასევე მე, იმიტომ რომ ბოლო ერთი თვის განმავლობაში შოთა ხიზანიშვილი ჩემი მოადგილეა.
პროცესზე გამახსენდა სოლჟენიცინის გამონათქვამი, რომ თეთრგვარდიელებს და ყველა რეპრესირებულს ბოლომდე რომ გამოეყენებინათ თავისი უფლება, ბოლომდე სისხლი რომ გაეშრო ყველა რიგითი ჩეკისტისთვის, რომელიც „ვარონკით“ მიდიოდა და შუაღამეს იჭერდა ხალხს, მაშინ ამდენ ბოროტებას ეს რეჟიმი ვერ ჩაიდენდა. აქედან გამომდინარე, ჩვენ ყველა ლეგალური საშუალება უნდა გამოვიყენოთ, მათ შორის შევარცხვინოთ ყველა პოლიციელი, რომელმაც 90-იანი წლების პრაქტიკა აღადგინა და იმდენად თვალნათელი იყო ეს ყველაფერი, რომ გუნავას მიმართ სასამართლომ ვერ გაბედა აღკვეთი ღონისძიების, პატიმრობის შეფარდება. ყველა ლეგალური საშუალება უნდა გამოვიყენოთ, ყველა უფლება, რომელიც ადამიანს გააჩნია, ყველა პუნქტის მიხედვით,რომ ამ ახლადგამომცხვარ ჩეკისტებს არ მივცეთ შესაძლებლობა ქვეყანა დაანგრიონ,” _ განაცხადა უგულავამ.
