არჩევნების წინა პერიოდში, სისტემატურად იყო საუბარი იმაზე, რომ სახელმწიფო ბიუჯეტზე მყოფ ორგანიზაციებში შტატები არაბუნებრივად იყო გაზრდილი და ეს გარკვეულწილად ამომრჩეველთა მოსყიდვას ემსახურებოდა.
მას შემდეგ, რაც “ნაციონალური მოძრაობა” არჩევნებში დამარცხდა, ჯერ კიდევ შემორჩენილ ძალაუფლებას იმისთვის იყენებს, რომ ჯავრი რიგით საჯარო მოხელეებზე იყაროს და ისინი უაპელაციოდ დაითხოვოს სამსახურიდან.
ლანჩხუთის კულტურის ცენტრი ერთ-ერთია იმ ორგანიზაციებიდან, სადაც ხელშეკრულებით აყვანილი თანამშრომლების ვადამდე ადრე გათავისუფლება მოხდა. ხელშეკრულებები თვენახევრით ადრე შეუწყვიტეს კულტურის ცენტრთან არსებულ ყველა ანსამბლს. პარადოქსია, მაგრამ ფაქტია, ანსამბლის რიგითი წევრები სახლში გაუშვეს, ხოლო ხელმძღვანელები სამსახურში დატოვეს. გაურკვეველია, რა უნდა აკეთონ ანსამბლის ხელმძღვანელებმა მომღერლებისა და მოცეკვავეების გარეშე.
ხელშეკრულება შეუწყვიტეს კულტურის ცენტრის სამ თანამშრომელსაც: ირმა ხურციძეს, მზია რამიშვილს და ციალა ჩხაიძეს.
კულტურის ცენტრის დირექტორი სოფო ჭელიძე ამ ფაქტთან დაკავშირებით მოკლე და აბსტრაქტული კომენტარით შემოიფარგლა: _ მხოლოდ ის შემიძლია გითხრათ, რომ ამ დროისთვის ხელშეკრულებით რამდენიმე თანამშრომელთან გაუქმდა ხელშეკრულება.
_ რა გახდა ამის მიზეზი?
– შრომითი კანონმდებლობა ითვალისწინებს ასეთ შემთხვევებს. ჩვენი მხრიდან არ მომხდარა ამ კანონმდებლობის დარღვევა. არ გამოვრიცხავ, რომ მათ რაღაც დროის გასვლის შემდეგ, კვლავ გაუგრძელდეთ ხელშეკრულება.
_ არსებობს შესაძლებლობა, რომ ეს ხალხი დაუბრუნდეს თავიანთ სამსახურს?
_ წინასწარ ვადებს ვერ დავასახელებ, მაგრამ ეს აუცილებლად მოხდება.
ლანჩხუთის საკრებულოს თავმჯდომარის რევაზ ჩიტიძის განმარტებით, ხელშეკრულებით აყვანილი თანამშრომელი განსაზღვრულია კონკრეტული სამუშაოს შესასრულებლად და თუ ადმინისტრაცია გადაწყვეტს, რომ მან თავისი საქმე უკვე შეასრულა, უფლება აქვს, დროზე ადრე შეუწყვიტოს ხელშეკრულება.
შრომითი კანონმდებლობა განსაზღვრავს შემდეგს: თუ ხელშეკრულების შეწყვეტა მოხდა დამქირავებლის ინიციატივით, იგი ვალდებულია დაქირავებულს გადაუხადოს კომპენსაცია ერთი თვის ხელფასის ოდენობით. გაშვებულ თანამშრომლებს კულტურის ცენტრი ამ თანხის გადახდას კი პირდება, მაგრამ ისინი პასუხს სხვა კითხვებზეც ელიან _ რა პრინციპით მოხდა მათი შერჩევა, რატომ შეუწყდათ ვადაზე ადრე ხელშეკრულება და ა.შ. ამ კითხვებზე პასუხის გაცემა კი არავის სურს. ხელისუფლება ფიქრობს, რომ მათი გათავისუფლება იმიტომ მოხდა, რომ კულტურის ცენტრს ბიუჯეტი აღარ ყოფნის ხელფასების დასაფინანსებლად და მათ ხარჯზე ცდილობს ეკონომიის გაკეთებას.
ამ მოსაზრებას არ ეთანხმება საკრებულოს თავმჯდომარე რევაზ ჩიტიძე: _ კულტურის ცენტრს აქვს ბიუჯეტი და თუ წლის ბოლომდე, ეს ბიუჯეტი კონკრეტული ღონისძიებისთვის საკმარისი არ არის, ადმინისტრაციას შეუძლია შეკვეცოს ან საერთოდ გააუქმოს ისინი.
