“გურია ნიუსი” ყოფილ მოსამართლეს ნონა თოლორაიას დაუკავშირდა.
_ ქალბატონო ნონა, საუბრობენ, რომ თქვენ სამეგრელო ზემო-სვანეთის საოლქო პროკურორის მოადგილე გახდით. იგი საკმაოდ რთული რეგიონია და არ გაგიჭირდებათ საქმისთვის თავის გართმევა?
_ ოფიციალურად არ ვარ დანიშნული. ადრე ხომ არ არის, რომ კომენტარი გავაკეთო? სხვათაშორის, უამრავი ადამიანი მირეკავს. ადვილი საქმე ნამდვილად არ იქნება, თუმცა, წინამორბედ ხელისუფლების მიერ საქმესთან მიდგომას შორის დიდი განსხვავებას დაინახავთ. ჩვენ ვიქნებით ფრთხილი, აუცილებლად კანონიერი, ობიექტური, ლმობიერიც კი, მაგრამ სამართლიანობა უნდა აღსდგეს. როცა ადამიანები დაინახავენ, რომ ისე არ არის საქმე, როგორც ადრე იყო, შესაძლებელი იქნება სამართლიანობის მიღწევა. სამართლიანობა უნდა აღსდგეს; კანონიერების პრინციპი უნდა იქნას დაცული. მთავარია თითოეულმა იმ ადამიანმა, რომელიც ახლა თანამდებობას დაიკავებს, ერთი რამე უნდა გაითავისოს _ სკამი და ძალაუფლება არ იქნება განმსაზღვრელი თანამდებობრივ საქმიანობაზე. ის უნდა დაემორჩილოს კანონს, კანონის უზენაესობას და იგივე მოითხოვოს ნებისმიერი ადამიანისგან. თუ ასე დავიწყებთ, მე მგონი, ფონს გავალთ.
_ წლებია საუბრობენ იმაზე, რომ აღძრულია სისხლის სამართის საქმე სამეგრელო ზემო-სვანეთის გუბერნატორის ზაზა გოროზიას და ზუგდიდის მუნიციპალიტეტის გამგებელის ალექსანდრე ქობალიას წინააღმდეგ. თუ დაგხვდათ მათ მიმართ საქმე აღძრული დაა რამდენად არის მოსალოდნელი დაკითხვაზე დაიბაროთ ორივე ჩინოვნიკი?
_ არის კატეგორია თანამდებობის პირებისა, რომელთა საქმეებიც არ იქნება ზუგდიდის პროკურატურის და საოლქო პროკურატურის გამოსაძიებელი. მე ნამდვილად არ ვიცი, რა არის და როგორ იქნება, ამიტომ ამაზე წინასწარ ვერ ვილაპარაკებ. შეიძლება, ეს საკითხი დადგეს, მაგრამ, ისიც შეიძლება, საერთოდ არ იყოს ზუგდიდის პროკურატურის და საოლქო პროკურატურის გამოსაძიებელი გოროზიას საქმე.
_ ზუგდიდში, არჩევნებამდე რამდენიმე თვით ადრე, სოფელ ანაკლიაში მცხოვრები 72 წლის ქალბატონი ცინარა აბულაძე ზუგდიდის პოლიციის მაღალჩინოსნებმა სცემეს. როგორც “გურია ნიუსისთვის” ცნობილია, კონკრეტულ საქმესთან დაკავშირებით სამეგრელო ზემო-სვანეთის საოლქო პროკურატურაში დაწყებულია მოკვლევა, მაგრამ ჯერჯერობით არავინ დასჯილა. დაინტერესდებით თუ თუ არა იმ საქმეებით, რომლებიც კონკრეტულად სამართალდამცავი ორგანოს წარმომადგენლების მიერ არის ჩადენილი?
_ ვიცი ამ ფაქტის შესახებ. ჩვენ ყველა იმ საქმით დავინტერესდებით, რომელიც უკვე დაწყებულია და გამოძიებული არ არის. ყველა ასეთი საქმე ბოლომდე იქნება მიყვანილი. ყველა განცხადებაზე, რომლითაც მოგვმართავენ მოქალაქეები, გამოძიება დაიწყება. ნებისმიერ საქმეზე იქნება რეაგირება და პასუხი თანმიმდევრულად იქნება გაცემული, თუ კი ჩავთვლით, რომ მასში გამოიკვეთება დანაშაულის ნიშნები.
თუმცა, ისე არ არის როგორც წარმოუდგენიათ _ აი, რაღაც მოხდა და დაზარალებულად მიიჩნიეს საკუთარ თავს. მთავარია, საქმეზე დაიდოს მტკიცებულება. თუ მტკიცებულება არ იქნა, როგორც წინა პროკურატურა აკეთებდა, ისე ნამდვილად არ იქნება, რადგან მაშინ პროკურორს არ ჰქონდა უფლება უარი ეთქვა ბრალდებაზე. დღეს პროკურორი ვალდებულია, როდესაც ის დაიწყებს სისხლის სამართლებრივ დევნას და ვერ მიიღებს მტკიცებულებებს, რომელიც საკმარისია ბრალის დასადგენად, მაშინ ის ვალდებულია უარი თქვას ბრალდებაზე. ასეთი რამ ჩვენს წინამორბედ პროკურორს აკრძალული ჰქონდა.
_ თქვენ, დიდი ხანია, რაც “რესპუბლიკური პარტიის” რეგიონული განყოფილების თავმჯდომარე ბრძანდებით. როგორ შეუთავსებთ პარტიულ საქმიანობას და პროკურორობას ერთმანეთს?
_ მტკივნეული თემა. უნდა დავწერო განცხადება და წავიდე პარტიიდან, რადგან სამსახურეობრივი საქმიანობიდან გამომდინარე, შეუთავსებელია პარტიული საქმე, პარტიის წევრობა და პროკურორობა.
_ რამდენად გამჭვირვალე იქნება სამეგრელო ზემო-სვანეთის საოლქო პროკურატურის მუშაობა მედიისთვის?
_ რა თქმა უნდა, მედიასთან აბსოლუტურად გამჭვირვალე თანამშრომლობა იქნება. პირადად მე, როგორც პიროვნება და ერთ-ერთი სამართალმცოდნე, ხშირ შემთხვევაში არ ვარ მომხრე, გამოძიების ეტაპზე ყველა დეტალი იცოდეს მედიამ. დეტალებში ვგულისხმობ ჩვენებების ანალიზს და საქმის მტკიცებულებების ღიად და საჯაროდ გამოქვეყნებას. ამას, ხშირ შემთხვევაში, გამოძიებისთვის საზიანო შედეგი მოაქვს. ყველა სხვა შემთხვევაში მედიასთან ვიქნებით გამჭვირვალე, რადგან აუცილებელია ადამიანებს სამართალდამცავების მეტი რწმენა ჰქონდეთ.
განსაკუთრებულად მინდა ვითანამშრომლო ჟურნალისტებთან _ როგორც კი შევუდგებით მუშაობას, მინდა სხვა სახე ვაჩვენოთ. მინდა მივიტანო ის პათოსი, ის განწყობა, რაზედაც საუბარია პროკურატურის შიგნით, როგორ უნდა წარმოვჩინდეთ და როგორ უნდა შევიცვალოთ. ასე მინდა დავენახო ზუგდიდს _ მთავარია ჯერ სტატუსის მქონე ჩავიდე იქ.
